Padarožnik z Kazachstana raskazaŭ, jak praryvaŭsia praź miažu Biełarusi i ES. Atrymałasia tolki z treciaj sproby
Biełarusy ŭžo pryzvyčailisia, što trapić na mašynie ŭ Jeŭrasajuz nie tak prosta, jak heta było raniej. Adnak dla padarožnikaŭ, jakija jeduć aŭtamabilem z Ałmaty ŭ Prahu, mnohija zvykłyja dla nas rečy akazalisia niepryjemnym siurpryzam.
Skrynšoty videa: bit_kocharu / Instagram
Čarha na dvoje sutak i niuansy sa strachoŭkaj
Padarožnik z Ałmaty (Kazachstan) Pavieł raskazaŭ u videa, što kali dabraŭsia da biełaruska-polskaj miažy, to daviedaŭsia, što čarha raściahnułasia na dvoje sutak. Adnak jamu i jaho siamji pašancavała — bo jany jechali razam z dvuma dziećmi, adzin ź jakich byŭ małodšy za try hady. A značyć, stajać ŭ čarzie sutkami im nie daviałosia.
Jak i ŭsie inšyja, jany apłacili 12 rubloŭ za rehistracyju ŭ elektronnaj čarzie, pošlinu na vyjezd pamieram 43 rubli i zajechali ŭ punkt propusku ź biełaruskaha boku.
Pieršaj niespadziavankaj dla turystaŭ akazaŭsia toj fakt, što trapić u Polšču možna tolki ŭžo majučy jeŭrapiejskuju strachoŭku na aŭtamabil, a nabyć jaje ŭ Biełarusi niemahčyma.
«Dumaju, nu zajedu ŭ Polšču — tam kuplu, jak zaŭsiody heta i rabiłasia. Ale tak nie atrymlivajecca. Kab zajechać u Jeŭropu, užo patrebna strachoŭka, a kab kupić strachoŭku, ty ŭžo pavinien być u Jeŭropie. Łahična, tak?» — ź ironijaj kaža kazachstaniec.
Praz adsutnaść strachoŭki im daviałosia viartacca ŭ Brest i nočyć u hateli.
Vyrašyć prablemu sa strachoŭkaj im dapamahli siabry z Prahi. Abyšłasia jana im prykładna ŭ 100 dalaraŭ na dva miesiacy.
Ale prajechać u Polšču im heta ŭsio adno nie dapamahło.
«Prapuskajem tolki jeŭrapiejcaŭ i biełarusaŭ»
«Prajšli biełarusaŭ, padjazdžajem da Polščy, jany bačać našy numary i kažuć: «Kazachi — razvaročvajciesia i jedźcie ŭ Litvu, bo tut my prapuskajem tolki jeŭrapiejcaŭ i biełarusaŭ».
Na druhuju sprobu trapić u Polšču siamja straciła piać hadzin. Palaki ich raźviarnuli, a na ŭjeździe ŭ Biełaruś im usio adno daviałosia prajści dezynfiekcyju aŭtamabila za 2 rubli, što taksama ździviła padarožnikaŭ z Kazachstana.
Jašče praź piać hadzin siamja z dvuma dziećmi dabrałasia da «Bieniakoniaŭ», dzie znoŭ zapłaciła 12 rubloŭ za rehistracyju ŭ elektronnaj čarzie i 43 rubli za vyjezd za miažu.
Niahledziačy na toje, što jany nie stajali ŭ čarzie ź biełaruskaha boku, na prachodžańnie biełaruska-litoŭskaj miažy ŭ ich syšło kala 7 hadzin.
Dzie techahlad?
Trapić u Litvu ŭ ich atrymałasia, ale, jak raspavioŭ mužčyna, i tam nie abyšłosia bieź siurpryzaŭ, bo na litoŭskim baku paśla pravierki pašpartoŭ i strachoŭki ŭ jaho spytali pra techahlad na aŭto.
Adnak dakumienta, jaki b paćviardžaŭ fakt jaho prachodžańnia, u kazachstanca być nie mahło, pakolki ŭ Kazachstanie aŭtamabili, maładziejšyja za 7 hadoŭ, jakija vykarystoŭvajucca ŭ pryvatnych metach, techahlad nie prachodziać.
Mužčyna pryznaŭsia, što praz adsutnaść techahladu jamu daviałosia ŭklučyć svajo abajańnie i zahavorvać supracoŭnika na miažy, adciahvajučy ŭvahu i raskazvajučy litoŭcu pra toje, na jakim cikavym kitajskim aŭto jany jeduć.
«Uvahu adciahvaju, i jon u mianie pytaje: «A mašyna jakoha hoda?» Ja kažu — 2025. «A, nu tady ŭ ciabie 100% techahlad u lubym vypadku jość. Navat praviarać nie budu».
Pryhody na rasijska-biełaruskaj miažy
Admietna, što sa składanaściami pry prachodžańni miažy kazachstancy sutyknulisia i na vyjeździe z Rasii. Dopyt na vyjeździe z Rasii ciahnuŭsia kala dźviuch hadzin.
Mužčyna raskazaŭ, što paśla standartnych pytańniaŭ u jaho pačali pytać, chto jon pa nacyjanalnaści, jakoj viery. Nie abyšłosia i biez pravierki telefona.
«A potym samaje cikavaje — zabiraje telefon i pačynaje prahladvać usie pierapiski, usie fota».