Akademikam Rasijskaj akademii navuk abrali «kravasisiu» časoŭ Janukoviča 

Były premjer-ministr Ukrainy Mikałaj Azaraŭ, jaki nie maje nivodnaj sučasnaj navukovaj raboty, byŭ abrany akademikam Rasijskaj akademii navuk (RAN). Pavodle paviedamleńniaŭ ŚMI, za jaho kandydaturu prahałasavali 527 akademikaŭ, suprać — 14, ustrymalisia — 15.

Mikałaj Azaraŭ. Fota: Sefa Karacan/Anadolu Agency/Getty Images

Jak paviedamlajecca, heta biesprecedentny vypadak, bo ŭpieršyniu akademikam staŭ čałaviek z nulavym indeksam Chirša, što aznačaje poŭnuju adsutnaść cytavańnia jahonych rabot u mižnarodnych navukovych bazach Scopus i Web of Science.

U krasaviku, paviedamlałasia, što vyłučeńnie Azarava padtrymała adździaleńnie navuk ab Ziamli RAN. 

Pres-słužba RAN zajaviła, što najaŭnaść indeksa Chirša nie źjaŭlajecca abaviazkovaj umovaj dla abrańnia ŭ akademiju — dastatkova padać nieabchodny pakiet dakumientaŭ, a rašeńnie prymaje ahulny schod akademikaŭ.

Mikałaj Azaraŭ — adzin z zasnavalnikaŭ Partyi rehijonaŭ i blizki paplečnik byłoha prezidenta Ukrainy Viktara Janukoviča. Jon zajmaŭ pasadu premjer-ministra Ukrainy z 2010 da 2014 hoda, ale paśla padziej Jeŭramajdanu źbieh u Rasiju. Na radzimie jon znachodzicca ŭ vyšuku pa niekalkich kryminalnych spravach.

Jak palityk siarod inšaha prasłaviŭsia tym, što za čverć stahodździa znachodžańnia na vysokich pasadach u niezaležnaj Ukrainie pry adzinaj dziaržaŭnaj ukrainskaj movie tak i nie zdoleŭ hetuju movu zasvoić choć by na kolki-niebudź prymalnym uzroŭni i mieŭ ciažkaści navat z čytańniem ukrainskaha tekstu z papierki. Heta asabliva vyjšła najaŭ paśla pryznačeńnia Azarava na pasadu premjera, dzie zusim nie karystacca ŭkrainskaj movaj nie było mahčyma navat pry prezidenctvie Janukoviča. Kalečanaja mova Azarava sparadziła šmat žartaŭ i miemaŭ, u narodzie jaje nazyvali «aziraŭkaj». Siarod inšaha, heta słovy «kravasisi» i «pisiany». 

Da 2022 hoda Azaraŭ byŭ členam-karespandentam Nacyjanalnaj akademii navuk Ukrainy, ale byŭ vyklučany paśla pačatku poŭnamaštabnaj vajny Rasii suprać Ukrainy.

U toj ža čas navukovaja supolnaść RAN nie padtrymała abrańnia ŭ akademiki dvuch sapraŭdnych navukoŭcaŭ — linhvista Aleny Bierazovič i dyrektara Instytuta ruskaj movy Fiodara Uśpienskaha, jakija ŭ 2022 hodzie padpisali list suprać rasijskaj ahresii va Ukrainie.

Bierazovič i Uśpienskamu vystavili patrabavańnie «pakajacca» za padpisańnie lista. Hetaha, u pryvatnaści dabivaŭsia akademik Valeryj Kašyn, jaki sam staŭ akademikam u 2022 hodzie i, zhodna ź jaho bijahrafijaj na sajcie RAN, «niepasredna ŭdzielničaŭ» u raspracoŭcy sistem vysokadakładnaj zbroi, u tym liku rakietnaha kompleksu «Kinžał».

U vyniku hałasavańnia Rasijskaja akademija navuk nie padtrymała kandydatur Uśpienskaha i Bierazovič u akademiki, niahledziačy na ich navukovyja zasłuhi.

Kamientary da artykuła