Lvoŭski: Da kanca stahodździa ŭ Biełarusi zastaniecca try miljony čałaviek, kali trendy nie źmieniacca

Ekanamist i akademičny dyrektar BEROC Leŭ Lvoŭski daje prahnoz demahrafičnaj situacyi ŭ krainie.

«U Biełarusi i tak była nizkaja naradžalnaść. Apošnija ličby da hetaha byli za 2019 hod. Tam siaredniaja biełaruska naradžała za svajo žyćcio 1,38 dzicia. Pa abnoŭlenych ličbach — kožnaja biełaruska ŭ siarednim za svajo žyćcio narodzić 1,08 dzicia», — zaŭvažyŭ Leŭ Lvoŭski ŭ efiry Deutsche Welle.

Jak tłumačyć ekśpiert, zychodziačy z aktualnych ličbaŭ nieabchodna istotnaja karekciroŭka demahrafičnych prahnozaŭ u niehatyŭny bok.

«Heta aznačaje, što da kanca stahodździa ŭ Biełarusi pavinna zastacca prykładna try miljony čałaviek. Kali biahučyja trendy nie źmieniacca», — prahnazuje Lvoŭski.

Ekanamist zaŭvažaje, što značna horš budzie toje, što istotnaja častka nasielnictva budzie piensijnaha ŭzrostu.

U Biełarusi dziejničaje salidarnaja piensijnaja sistema. Faktyčna hrošy, što pastupajuć u piensijny fond ad tych, chto ciapier pracuje, adrazu pieradajucca tym, chto ciapier na piensii. Čaściej za ŭsio hetych hrošaj nie chapaje, tamu davodzicca dadavać srodki ź biudžetu.

Zaraz, adznačaje ekanamist, na adnaho čałavieka pracazdolnaha ŭzrostu prychodzicca prykładna 0,4 piensijaniera. Deficyt Fondu sacyjalnaj abarony nasielnictva składaje kala 1% VUP. Heta nie vielmi dobra, ale pakul jašče nie katastrofa. Adnak, pačynajučy ź siaredziny stahodździa, hetyja pakazčyki značna pahoršacca:

«U siaredzinie stahodździa ŭ nas užo budzie 0,7 piensijaniera na adnaho čałavieka pracazdolnaha ŭzrostu. (…) Da kanca stahodździa, niedzie da hadoŭ 2080-ch, u nas demahrafičnaja piensijnaja nahruzka budzie 0,9 piensijaniera na adnaho čałavieka pracazdolnaha ŭzrostu».

Lvoŭski bačyć niekalki šlachoŭ vyjścia:

«Ci treba budzie piensii źnižać bolš čym u dva razy, ci zbory pavyšać na taki ž pracent. Što taksama nievierahodna. Ci možna jašče dakidvać ź biudžetu. Tady daviadziecca dakidvać pa 10% VUP u hod dla padtrymki prykładna biahučaj pakupnickaj zdolnaści piensii».

Značnuju rolu ŭ źnižeńni naradžalnaści ŭ Biełarusi adyhryvaje niestabilnaść.

«Kali vy kupili darahi aŭtamabil, i potym zrazumieli praz hod, što vy nie ciahniecie, nie možacie absłuhoŭvać, vielmi darahi, možna jaho pradać. Treba vam pierajechać — znoŭ ža pradaście. I ŭsio dobra.

Dzicia vy zavodzicie minimum na 18 hadoŭ. Heta vialiki kamitmient (ad anhł. sommitment — surjoznaje i praciahłaje abaviazacielstva. — NN). Pierajazdžać ź dziciem składaniej. Moža być, vy ciapier dobra zarablajecie, suženiec dobra zarablaje, ale vy baiciesia niestabilnaści, što moža heta ŭ luby momant skončycca — zvolniać suženca i hetak dalej. To tady heta ŭsio pavialičvaje niestabilnaść i jana vielmi mocna ŭpłyvaje na naradžalnaść».

Pa słovach Lvoŭskaha, upłyŭ niestabilnaści na naradžalnaść dobra daśledavany — naradžalnaść praz heta źnižajecca. U našym rehijonie jana źnižajecca da taho ž i na fonie vajny. Pry hetym vyhladaje na toje, što Biełaruś — lidar u hetym źnižeńni.

«Ludzi nie ŭpeŭnieny. Moža być, ciapier represii nie zakranuć. Ale moža być, muža ŭniasuć u «čorny śpis» tamu, što jon niedzie niešta łajknie praz try hady. I treba budzie niekudy terminova pierajazdžać. Moža, jon nie łajknie, a kiraŭnik jaho kampanii łajknie. I kampanii daviadziecca źjazdžać», — tłumačyć ekanamist.

Kamientary da artykuła