Samsung źbirajecca pastavić na smartfonach jašče adzin štučny intelekt, akramia Gemini
Samsung Electronics nabližajecca da zaklučeńnia šyrokamaštabnaha pahadnieńnia z amierykanskim startapam Perplexity AI, kab intehravać jaho technałohii pošuku i virtualnaha pamočnika ŭ svaje pryłady. Heta moža aznačać istotny pierahlad stratehii štučnaha intelektu karejskaha technałahičnaha hihanta, paviedamlaje Bloomberg.
Fota: vecteezy.com
Pavodle źviestak, Samsung płanuje ŭstaloŭvać prykładańnie i pamočnik Perplexity na budučyja pryłady Galaxy, a taksama intehravać funkcyi pošuku startapa ŭ veb-braŭzier Samsung Internet. Akramia taho, abmiarkoŭvajecca mahčymaść uklučeńnia technałohij Perplexity u virtualnaha pamočnika Bixby, što moža značna pavysić jaho funkcyjanalnaść.
Samsung maje namier abviaścić ab intehracyi Perplexity ŭžo ŭ hetym hodzie, z metaj uklučeńnia servisu ŭ jakaści varyjantu pamočnika ŭ liniejcy telefonaŭ Galaxy S26, zapusk jakoj zapłanavany na pieršuju pałovu 2026 hoda.
U dadatak da technałahičnaha partniorstva, Samsung płanuje stać adnym z najbujniejšych inviestaraŭ u novym raŭndzie finansavańnia Perplexity.
Hetaje šyrokaje supracoŭnictva moža dapamahčy Samsung skaracić zaležnaść ad Google i adkryć šlach dla pracy z roznymi raspracoŭščykami štučnaha intelektu, padobna da stratehii Apple. Dla Perplexity heta budzie najbujniejšaje mabilnaje partniorstva na siońniašni dzień, paśla niadaŭniaj ździełki z Motorola.
Pradstaŭniki Samsung i Perplexity admovilisia ad kamientaryjaŭ.