Spalnyja miescy ŭ «Minsk-Śviecie» mohuć vyklikać kłaŭstrafobiju. Jak ekanomiać prastoru ŭ sučasnych kvaterach-studyjach
U Minsku ŭsio čaściej u prodažy źjaŭlajucca mini-studyi, dzie spalnaje miesca raźmiaščajecca litaralna pad stollu.
Vyhladaje, što časy, kali siaredni pamier kvater ros, skončylisia — tamu časam navat brežnieŭki i chruščoŭki na fonie niekatorych śviežych kvater vyhladajuć prastornym žytłom.
Prynamsi ŭ Minsku ŭsio čaściej možna sustreć umoŭna dvuchuzroŭnievyja kvatery-studyi.
Adzin z takich prykładaŭ — adnapakajoŭka ŭ «Minsk-Śviecie». Ahulnaja płošča kvatery składaje 35,6 m², ale nad pałovaj kvatery navisaje druhi ŭzrovień płoščaj 18 m².
Takaja kvatera kaštuje 123 tysiačy dalaraŭ. Fota tut i dalej: realt.by
«Druhi pavierch» padzieleny na try zony: na adnoj staić dvuchspalny łožak, asobna aharodžanyja harderobnaja z bojleram, a ŭ kutku nad kuchonnaj zonaj — vuzki stoł i kresła.
U apisańni da kvatery paznačana, što vyšynia stoli ŭ joj 3,63 mietra. Praŭda, tyčycca heta tolki pałovy kvatery. U vannym pakoi, prychožaj i častcy kuchonnaj zony vyšynia stoli budzie kala 2 mietraŭ, a na druhim uzroŭni, adpaviedna, kala 1,5 mietra.
I heta, možna skazać, kvietački, bo isnujuć i kudy bolš ścipłyja varyjanty.
U adnoj z kvater spalnaje miesca zrabili nad prychožaj. U vyniku vyšynia stoli tam apuściłasia pryblizna da 2 mietraŭ (minimalnaja vyšynia standartnych dźviarej). A samo spalnaje miesca niečym nahadvaje antresol.
U adnoj z takich kvater spalnaje miesca raźmiaścili tak, što ŭ čałavieka, jaki budzie tam spać, moža zdarycca prystup kłaŭstrafobii.