Namieśnica redaktara «Minsk-Navin» raskazała, jak źmianiłasia jaje žyćcio paśla šlubu z musulmaninam ź Siryi

Viktoryja Al Ali kardynalna źmianiła styl u adzieńni dziela kachanaha. A muž-musulmanin dla jaje moža vypić stopku samahonki.

Viktoryja Al Ali z mužam. Tut i dalej fota ź jaje sacsietak

26-hadovaja Viktoryja Al Ali pracuje ŭ dziaržaŭnym infarmacyjnym ahienctvie «Minsk-Naviny». Jana zahadčyca adździeła navin, namieśnica hałoŭnaha redaktara.

Viktoryja aktyŭna ŭdzielničaje ŭ roznych prapahandysckich mierapryjemstvach, cytuje Łukašenku, a taksama jeździć čytać lekcyi pa prasoŭvańni ŭ sacyjalnych sietkach u Instytut dziaržsłužby Akademii kiravańnia. Kaža, što haryć tym, kab va ŭsich čynoŭnikaŭ byli sacsietki dla kamunikacyi z prostymi ludźmi.

Ale pry hetym i krytykavać dziaržaŭnyja ŚMI dziaŭčyna nie baicca. Tak u adnym z dopisaŭ u instahramie jana pryznałasia, što niejak pračytała ŭsie vypuski haziety «Minski kurjer» (jaje vydajuć jakraz «Minsk-Naviny») za miesiac — i ničoha nie spadabałasia.

Jana pasprabavała pačytać inšuju dziaržaŭnuju presu — «SB. Biełaruś siehodnia», «7 dniej», «Narodnuju hazietu», ale zastałasia rasčaravanaj: «Prahartała i voka nie začapiłasia ni za adnu nazvu. Heta sumna. Ci to ja takaja dalokaja ad ich stylu i tematyk, ci to presa ŭ 21 stahodździ idzie kudyści nie tudy».

Viktoryja sprabuje siabie i ŭ jakaści błohierki. Padpisčykaŭ u jaje sacsietkach nie šmat. Zatoje cikavyja historyi sustrakajucca. Naprykład, dziaŭčyna raspaviała, što ŭ pracoŭnym čacie «Minsk-Navin», dzie sabranyja kiraŭniki, nielha adkazvać kaleham «dziakuj».

Viktoryja spačatku nie zrazumieła, čamu inšyja ŭdzielniki čata reahujuć na niejkuju infarmacyju słovam «pryniata». Joj jano nie vielmi padabałasia. Jak vietlivaja dziaŭčyna, Viktoryja prosta dziakavała kaleham — praciahvałasia heta niadoŭha.

«Adnojčy mnie patelefanavali i surjoznym hołasam skazali:

— Viktoryja, u pracoŭnym čacie nie pišuć «dziakuj». Treba adkazvać «pryniata».

Čałaviek hety byŭ vyšejstajačy i, kaniečnie ž, aŭtarytetny».

Vosieńniu 2022 hoda Viktoryja pabrałasia šlubam z Nasieram Al Ali. Jaje abrańnik byŭ značna starejšy za niaviestu. Nasier — siryjec, ale ŭžo šmat hadoŭ žyvie ŭ Biełarusi. Viktoryja raspaviadała, što mužčyna zajmajecca biznesam, jamu naležać kafe z aŭtarskimi desiertami Dipndip, a taksama čajchana «Taškient» u Minsku.

Heta nie adzinaja śfiera, jakaja cikavić Nasiera Al Ali. Dziaŭčyna zhadvała taksama, što ŭ 2023 hodzie zastałasia biez asnoŭnaj pracy. Tady, nie znajšoŭšy varyjanta, jaki b zadavoliŭ, Viktoryja prajšła kursy manikiuru i pasprabavała pracavać u sałonie muža. Ale ŭ vyniku spravy nie pajšli, sałon začynili.

Jakraz ciapier Viktoryja sprabuje za 80 dzion stvaryć u Biełarusi hlancavy fešn-časopis, bo sa škoły maryła stać biełaruskaj Hannaj Vintur (heta hałoŭnaja redaktarka časopisa Vogue z 1988 hoda). Pieršy numar užo viarstajecca, jon vyjdzie nakładam usiaho 100 ekzemplaraŭ. Kaža, što ŭsio «za svaje hrošy». Jana padličyła, što tolki za druk adnaho asobnika časopisa pryjdziecca zapłacić 45-50 rubloŭ. A jašče ž treba płacić žurnalistam, fatohrafam, dyzajnieram…

Muž Viktoryi — musulmanin. Dziaŭčyna pryznajecca, što być zamužam za zamiežnikam i čałaviekam inšaj viery — nie samaja prostaja reč. Joj pryjšłosia pastaleć i pierahledzieć byłyja kaštoŭnaści.

Kali maładaja dziaŭčyna paznajomiłasia z budučym mužam, u jaje harderobie było šmat mini-sukienak, rečaŭ z hłybokim dekalte ci razrezami na ściohnach. Viktoryja pryznaje: u toj čas jaje styl byŭ davoli pravakacyjnym.

Dziela kachanaha joj pryjšłosia źmianicca: «Jon z arabskaj krainy, musulmanin. Našy zvyčki ŭ adzieńni, u pryvatnaści, svaboda, čužyja».

Hetyja niuansy para abmierkavała praz paŭhoda paśla taho, jak pačała sustrakacca. Viktoryja paabiacała, što, vychodziačy z domu, budzie prykryvać kaleni, plečy i ściohny. I ŭ cełym jaje styl pavinien byŭ stać bolš strymanym, ale nie blakłym.

Dziaŭčyna kaža, što nie doŭha dumała i pahadziłasia na takija ŭmovy, bo pavažaje relihiju i zvyčai svajho abrańnika. Paśla taho rašeńnia jaje žyćcio źmianiłasia: «Byŭ pieryjad, kali ja zusim nie viedała, što nasić, i zapuściła siabie. Kab źmianić raniejšyja kaštoŭnaści i bačańnie śvietu, spatrebiłasia bolš za hod».

Ciapier Viktoryja kaža, što situacyja jaje zadavalniaje: jana stvaraje novy vobraz i znajomicca z «saboj sapraŭdnaj». Muž, pa słovach dziaŭčyny, taksama z pavahaj stavicca da jaje tradycyj. U jakaści prykładu pryvodzić toje, što Nasier chodzić u łaźniu i moža vypić stopku samahonki za stałom sa svajakami.

Kamientary da artykuła