Devida Bekchema mohuć paśviacić u rycary. Za jakija zasłuhi?
Devida Bekchema pavinny ŭznaharodzić rycarskim zvańniem na honar dnia naradžeńnia karala Karła III, piša Bi-bi-si.
Karł III i Devid Bekchem padčas Chelsea Flower Show u mai 2025 hoda. Fota: Paul Grover — WPA Pool/Getty Images
Były kapitan zbornaj Anhlii pa futbole, Bekchem byŭ pryznačany kavaleram Ordena Brytanskaj impieryi (OBE) u 2003 hodzie.
Ale BBC Sport paviedamiła, što ciapier 50-hadovy Devid Bekchem znachodzicca ŭ čarzie na atrymańnie dalejšaha pryznańnia jak za svaju futbolnuju karjeru, tak i za svoj uniosak u brytanskaje hramadstva.
Što datyčycca patencyjnaha ŭznaharodžańnia i zvańnia, pres-sakratar brytanskaha ŭrada zajaviŭ: «My nie kamientujem śpiekulacyi adnosna ŭznaharod».
Pradstaŭniki Bekchema admovilisia ad kamientaroŭ. Śpis łaŭreataŭ na rycarskaje zvańnie apublikujuć na nastupnym tydni.
Bekchem zhulaŭ 115 matčaŭ za nacyjanalnuju zbornuju, jon taksama vystupaŭ za «Mančester Junajted», «Reał», «Łos-Andželes Hełaksi», «Pary Sien-Žermien» i «Miłan». Zaviaršyŭ karjeru ŭ 2013 hodzie.
Upieršyniu Bekchema naminavali na rycarskaje zvańnie ŭ 2011 hodzie.
U 2017 hodzie niekalki brytanskich haziet apublikavali detali ŭciečki elektronnych listoŭ, u jakich Bekchem krytykavaŭ sistemu i kamitet pa ŭznaharodach.
Pres-sakratar Bekchema tady zajaviŭ, što elektronnyja listy byli «uzłamanyja», «padroblenyja», i što jany byli «pryvatnyja».
U svoj čas Bekchem adyhraŭ važnuju rolu ŭ tym, kab Alimpijada 2012 hoda dastałasia Łondanu, z 2005 hoda jon taksama źjaŭlajecca pasłom JUNISIEF.
JUNISIEF, jaki padtrymlivaje dziaciej va ŭsim śviecie, u 2015 hodzie zasnavaŭ razam z Bekchemam sumiesny fond, kab adznačyć dziesiacihodździe partniorstva pamiž imi.
U 2024 hodzie Bekchem staŭ pasłom Fondu Karala. Jon padtrymaŭ adukacyjnuju prahramu karala Karła i namahańni, nakiravanyja na zabieśpiačeńnie lepšaha razumieńnia pryrody siarod moładzi.
Jon taksama źjaŭlajecca saŭładalnikam kłuba Druhoj lihi «Sołfard Sici», a taksama prezidentam i saŭładalnikam futbolnaj kamandy «Inter Majami» ŭ ZŠA.
Jon dapamoh stvaryć fond Inter Miami CF — hramadskuju niekamiercyjnuju arhanizacyju, jakaja imkniecca pašyrać mahčymaści małazabiaśpiečanych supolnaściaŭ, vykarystoŭvajučy futboł jak katalizatar.
Z pačatkam poŭnamaštabnaha ŭvarvańnia Rasii Bekchem padtrymaŭ Ukrainu i razam z žonkaj Viktoryjaj achviaravaŭ miljon funtaŭ sterlinhaŭ dla ŭkrainskich maci ź dziećmi, vymušanych uciakać ad vajny.
U sakaviku 2022 hoda jon taksama na niekatory čas pieradaŭ svoj akaŭnt u Instagram kiraŭnicy Charkaŭskaha rehijanalnaha pierynatalnaha centra, kab jana mahła na aŭdytoryju ŭ bolš jak 70 miljonaŭ padpisčykaŭ pakazać realii, u jakich žyvie klinika padčas vajny.