Vypusknica, jakaja nabrała 400 bałaŭ pa CT u 2021-m, pierajechała ŭ Rasiju i nachvalvaje Maskvu

Uradženka Žłobina Anastasija Savaścionak u 2021 hodzie nabrała 400 bałaŭ padčas ustupnaj kampanii. Jak pisali tady ŚMI, dziaŭčyna padała dakumienty na fakultet mižnarodnych adnosin u BDU. Ale doŭha jana tam nie pravučyłasia. Čym ciapier zajmajecca rekardsmienka, daviedałasia «Lusterka».

Anastasija Savaścionak na fiestyvali «MGIMO Stars». Maskva, maj 2023 hoda. Fota: Studencki sajuz MHIMO Rasii

Anastasija Savaścionak vučyłasia ŭ škole №13 u Žłobinie, a paśla piataha kłasa pieraviałasia ŭ himnaziju №1. Skončyŭšy dziaviaty kłas, školnica pastupiła ŭ Licej BDU ŭ Minsku.

Na CT-2021 abituryjentka atrymała pa 100 bałaŭ za testy pa biełaruskaj i anhlijskaj movach. Jašče pa «sotcy» prynieśli załaty miedal i dypłom z respublikanskaj alimpijady pa hramadaznaŭstvie.

Z takimi vynikami (400 z 400) dziaŭčyna pastupiła na fakultet mižnarodnych adnosin BDU. Tady Naścia raskazvała, što «ŭ budučyni płanuje pabudavać karjeru dypłamata».

Na pieršym kursie dziaŭčyna sapraŭdy vučyłasia ŭ biełaruskaj VNU. U kastryčniku 2021-ha jak pieršakurśnica jana pavinšavała BDU sa stohadovym jubilejem. A ŭžo nastupnym letam sprabavała trapić na vałanciorskuju prahramu Instytuta ruskaj movy imia Puškina «Pasły ruskaj movy ŭ śviecie!». Meta jaje — papularyzacyja ruskaj movy, kultury i litaratury ŭ Rasii i za miažoj.

Ci atrymałasia ŭ Anastasii trapić tudy, jana nie raskazvała. Zatoje dziaŭčyna stała studentkaj Maskoŭskaha dziaržaŭnaha instytuta mižnarodnych adnosin (MHIMO). Miarkujučy pa ŭsim, heta adbyłosia vosieńniu 2022-ha (ciapier jana na trecim kursie).

Biełaruska vučycca pa śpiecyjalnaści «Mižnarodnyja adnosiny». Čamu dziaŭčyna vyrašyła pamianiać biełaruskuju VNU na rasijskuju, nieviadoma.

Anastasija Savaścionak (piataja źleva) na konkursie studenckich prajektaŭ «Najlepšy statystyčny ahlad na temu MUR», 10 krasavika 2024 hoda. Fota: MHIMO

Rekardsmienka pa CT i ŭ Rasii vučycca dobra. Naprykład, sioleta jana atrymała stypiendyju ad rektara MHIMO. Da hetaha, u krasaviku 2024-ha, Savaścionak zaniała druhoje miesca na konkursie studenckich prajektaŭ «Najlepšy statystyčny ahlad na temu Metaŭ ustojlivaha raźvićcia». Jašče dziaŭčyna ŭdzielničaje ŭ žyćci ŭniviersiteta: u mai 2023-ha Savaścionak vystupiła ŭ jakaści śpiavački na fiestyvali MGIMO Stars.

U Rasii biełaruscy vidavočna padabajecca. Tak, letam 2024 hoda jana vykłała rolik, u jakim chvaliła Maskvu. Vierahodna, heta byŭ fłešmob abo konkurs — pad videa chešteh «ЅTOlica». Heta «moładzievaja supolnaść Maskvy», prajekt mera rasijskaj stalicy.

«Maskva — heta horad mary, — havoryć na kamieru Anastasija. — Najbujniejšy miehapolis, jaki adkryvaje šyrokija mahčymaści dla ŭsiebakovaha raźvićcia moładzi. Vielizarny lik univiersitetaŭ dajuć šyroki vybar adukacyjnych prahram. Kancentracyja vialikaj kolkaści bujnych kampanij, mižnarodnych karparacyj i dziaržaŭnych arhanizacyj prapanuje raznastajnyja mahčymaści dla pracaŭładkavańnia i pabudovy karjery».

Z nahody vajny, jakuju Rasija raźviazała va Ukrainie, dziaŭčyna nie vykazvajecca, jak nie havoryć i pra palityčnuju situacyju ŭ Biełarusi.

Kamientary da artykuła