U Hiermanii acanili straty Rasii ŭ vyniku śpiecapieracyi «Pavucińnie»

U Hiermanii zajaŭlajuć, što niadaŭniaja ataka ŭkrainskich bieśpiłotnikaŭ, viadomaja jak apieracyja «Pavucińnie», mahła paškodzić kala 10% abjektaŭ stratehičnaj avijacyi Rasii, piša Reuters.

Fota: Ssu.gov.ua

Hienierał-major Bundeśviera Kryścijan Frojdynh paviedamiŭ, što byli paškodžanyja bolš za dziesiać samalotaŭ, u tym liku stratehičnyja bambaviki Tu-95, Tu-22 i raźviedvalnyja A-50, anałahi sistem nazirańnia AWACS u NATA.

Frojdynh adznačyŭ, što niekatoryja z hetych A-50 bolš nie padlahajuć ramontu i navat nie mohuć być vykarystanyja na zapčastki — takich samalotaŭ u Rasii vielmi mała.

Pavodle acenak ZŠA, bieśpiłotniki źniščyli da 10 samalotaŭ i paškodzili jašče kala 20. Ekśpierty kažuć, što na adnaŭleńnie takich strat Rasii spatrebiacca hady.

Niahledziačy na heta, Frojdynh nie prahnazuje nieadkładnaha skaračeńnia kolkaści rasijskich avijaŭdaraŭ pa Ukrainie, bo 90% fłotu ŭsio jašče zastajecca ŭ pracoŭnym stanie. Adnak jon padkreśliŭ, što ciapier hetyja samaloty pavinny buduć lotać čaściej, što pryviadzie da ich bolš chutkaha znosu, i dadaje, što ad ataki budzie značny psichałahičny efiekt.

Hienierał taksama adznačyŭ, što Rasija ličyła siabie ŭ biaśpiecy na svajoj vializnaj terytoryi, tamu jaje avijacyja była drenna abaronienaja. Ciapier ža, paśla apieracyi «Pavucińnie», situacyja źmienicca i Maskvie daviadziecca ŭzmacniać miery biaśpieki.

Uvohule NATA nazyvaje hetuju śpiecapieracyju vielmi paśpiachovaj, choć prezident ZŠA Donald Tramp zajaviŭ, što hetyja ŭdary, maŭlaŭ, dali Rasii padstavu dla novych masiravanych atak na Ukrainu.

Kamientary da artykuła