Padčas samitu G7 Trampa nie ŭdałosia pierakanać pastrožyć sankcyi suprać Rasii

Ahienctva Bloomberg sa spasyłkaj na svaje krynicy piša, što Tramp padčas viačery ź inšymi lidarami G7 na samicie ŭ Kanadzie paŭtaryŭ svaju pazicyju: sankcyi, na jaho dumku, abychodziacca ZŠA vielmi doraha. Hety arhumient jon vykazvaŭ i raniej, a tut znoŭ padkreśliŭ.

Donald Tramp. Fota: AP Photo/Mark Schiefelbein

Jeŭrapiejskija krainy ŭsio bolš sumniavajucca, ci možna daviarać Trampu ŭ pytańni dalejšaha cisku na Rasiju, i sprabujuć vyjhrać čas, adznačaje Bloomberg. Tam dadajuć, što jeŭrapiejcy praciahvajuć supracoŭničać z prezidentam ZŠA i nie chočuć jaho razdražniać, ale ŭ toj ža čas šukajuć sposaby dapamahčy Ukrainie ŭ situacyi, kali ZŠA ŭsio mienš žadajuć akazvać joj dapamohu.

Niahledziačy na pazicyju Trampa, čakajecca, što ŭ vynikovaj zajavie premjer-ministra Kanady Marka Karni, jaki staršyniuje na hetym samicie, budzie adznačana: G7 padtrymlivaje mirnyja inicyjatyvy pad kiraŭnictvam ZŠA. Ukraina, maŭlaŭ, hatovaja da spynieńnia ahniu, a Rasija — nie. Tamu, jak ličać u G7, cisk na Maskvu sankcyjami nieabchodna praciahvać.

Prezident Ukrainy Uładzimir Zialenski taksama prybyŭ na samit i pravioŭ sustreču z Markam Karni. Padčas jaje kanadski premjer abviaściŭ, što Kanada vydzielić Ukrainie jašče 2 miljardy kanadskich dalaraŭ (kala 1,48 amierykanskich) u jakaści vajskovaj dapamohi i 2,3 miljarda (kala 1,7 dalaraŭ ZŠA) — u vyhladzie kredytaŭ.

Taksama Kanada ŭviała novyja sankcyi suprać bolš čym 40 jurydyčnych asobaŭ u Rasii i za jaje miežami, a taksama suprać 200 sudnaŭ z tak zvanaha «cieniavoha fłotu».

Kamientary da artykuła