Cichanoŭski — biełarusam: «Kali vy čakali znak, to voś jon». Prajšła pres-kanfierencyja z vyzvalenymi palitviaźniami

Adna z hałoŭnych postaciaŭ 2020 hoda Siarhiej Cichanoŭski i 13 inšych palitviaźniaŭ vyjšli na volu 21 červienia. Heta stała mahčymym u vyniku vizitu ŭ Minsk śpiecpradstaŭnika prezidenta ZŠA Donalda Trampa Kita Kiełaha. Siońnia ŭ Vilni prajšła pres-kanfierencyja ź imi. 

Siarhiej i Śviatłana Cichanoŭskija. Fota: AP Photo / Mindaugas Kulbis

Śviatłana Cichanoŭskaja pačała pres-kanfierencyju sa słoŭ radaści ad taho, što jana znoŭ ź Siarhiejem i abiacańnia zmahacca za vyzvaleńnie ŭsich astatnich viaźniaŭ, jakija zastajucca ŭ źniavoleńni.

Cichanoŭskaja padziakavała za vyzvaleńnie biełaruskich palitviaźniaŭ prezidentu ZŠA Donaldu Trampu, hienierału Kiełahu, uładam Litvy i Polščy, a taksama kiraŭnictvu Jeŭrapiejskaha sajuza za padtrymku zmahańnia biełarusaŭ.

«Heta naša supolnaja pieramoha», — skazała jana.

Paśla ŭstupu na biełaruskaj movie jana pierajšła na anhlijskuju i paŭtaryła padziaki pa-anhlijsku. «I want to personally thank President Donald Trump», — skazała jana.

Siarhiej Cichanoŭski źjaviŭsia nie adrazu na pres-kanfierencyi. 

«Voś tak ja ciapier vyhladaju. Ja važu 79 kh», — skazaŭ jon. 

Svaju pramovu Siarhiej Cichanoŭski pačaŭ z padziaki amierykanskim i jeŭrapiejskim palitykam.

Jon zajaviŭ, što Donald Tramp ciapier maje takuju siłu, što adnym słovam moža vyzvalić usich palitviaźniaŭ. I paprasiŭ skazać hetaje słova.

Cichanoŭski znoŭ krasamoŭny. 

«Chaču źviarnucca da ŭsich biełarusaŭ — kali vy čakali znak, to voś jon. Dziaržavy hinuć tady, kali nie mohuć adroźnić kiepskich ludziej ad dobrych. Abvinavačańnie, vysunutaje suprać kata, stała prysudam dla achviary», — skazaŭ jon. 

«Jany tam nazyvajuć nas zdradnikami. A ja nazavu zdradnikam kožnaha, chto łukašyzmu nie supraciŭlajecca», — zajaviŭ jon. 

«Justycyja ŭ Biełarusi nie pamierła. U jaje prosta dzirka ŭ łobie», — dadaŭ jon. 

«Žyvie Biełaruś!» — skončyŭ pramovu Siarhiej Cichanoŭski i pakazaŭ ścisnuty kułak.

Ale kali Siarhieja spytali pra dziaciej, jon raspłakaŭsia.

Dačka nie paznała jaho, dadała Śviatłana. 

Cichanoŭski kaža, što sa studzienia viedaŭ, što jaho vypuściać. 

U jaho spytali, ci nie vyzvalili jaho dla taho, kab razvalić Ofis?

«Ja płanuju nie leźci ŭ dziejnaść Ofisa» — adkazaŭ Siarhiej. Jon skazaŭ, što jamu «ŭ vušy ahienty KHB ulivali dezynfarmacyju», ale jon adčuvaŭ, što jaho dezynfarmujuć.

«Ofis tam tym i tym zajmajucca, kraduć… Ja bolš sumlennaha čałavieka, čym Śviatłana, u žyćci nie sustrakaŭ, ja palca jaje nie varty… A ja im kivaju: tak, tak, ja ŭ hazietach heta čytaŭ…»

Cichanoŭski adnaznačna zajaviŭ: «Lidaram apazicyi źjaŭlajecca maja žonka — Śviatłana Cichanoŭskaja, i ja ni na što nie źbirajusia tut pretendavać. Lidaram nie moža być čałaviek, jaki piać hadoŭ prasiadzieŭ u izalacyi. Takich lidaraŭ, jak ja, u nas tysiačy».

Było zaŭvažna, što Siarhiej nie moža prosta nahavarycca.

Jon raspavioŭ, što pačaŭ pisać vieršy i pradekłamavaŭ adzin.

Cichanoŭski ličyć, što vyzvaleńnie Biełarusi nie moža pačacca, pakul nie ruchnie pucinski režym. «Ja całkam zhodny z tym, što vyzvaleńnie Biełarusi nie moža pačacca, pakul nie abryniecca pucinski režym. Absalutna. Kali b nie Pucin, to my b zaraz tut nie siadzieli b — usio b skončyłasia ŭ 2020 — 2021 hodzie. Ja ŭ hetym absalutna ŭpeŭnieny», — skazaŭ jon.

U Cichanoŭskaha spytali pra jaho nibyta prarasijskaść i Krym. 

Jon adkazaŭ, što nikoli nie byŭ prarasijskim palitykam, zaŭsiody byŭ biełarusam. 

«U mianie byŭ biznes, u mianie byli ofisy ŭ Maskvie, Kijevie i kampanija ŭ Litvie. I heta ŭsio. Ja nikoli nie byŭ prarasijskim, heta fejki. Naš supolny vorah — heta pucinskaja ŭłada. Pakul jana nie ruchnie, nijakaj pieramohi ŭ Biełarusi nie budzie», — zajaviŭ jon. 

Pra svaju pajezdku ŭ Krym u 2017 hodzie jon kaža: ja tady nie byŭ palitykam i nie zadumvaŭsia pra palityčnyja pytańni, ja jeździŭ tudy jak pałomnik.

«Ja absalutna padtrymlivaju Ukrainu. Prezidentu Zialenskamu vypała takaja ciažkaja dola. Voś toje, što ja pieražyŭ, heta ništo ŭ paraŭnańni z tym, što jon pieražyŭ. Jon dla mianie hieroj. Ja jaho padtrymlivaju absalutna i biezraździelna», — skazaŭ jon. 

Kamientary da artykuła