U Maskvie mužčyny masava sprabujuć znajomicca, macajučy dziaŭčat za jahadzicy. Tak zahadaŭ rabić seks-koŭč ź Biełarusi

Dziasiatki dziaŭčat u sacyjalnych sietkach skardziacca na seksualnyja damahańni ŭ centry Maskvy. A robiać usio heta mužčyny pa zahadzie biełarusa Aleksa Łeśli.

Aleks Łeśli. Fota ź jaho instahrama

Aleks Łeśli — heta psieŭdanim 43-hadovaha viciebčuka Alaksandra Kiryłava. U svoj čas jon skončyŭ Viciebski fizika-matematyčny licej №1, a potym pajechaŭ skarać Rasiju — pastupiŭ na miechmat MDU.

Ale znajšoŭ siabie zusim u inšaj śfiery — staŭ trenieram pa znajomstvach i spakušeńniach. Łeśli vyvučaŭ usio, što znachodziŭ — eryksanaŭski hipnoz, NŁP, amierykanskija i navat savieckija škoły spakušeńnia. A paśla raspracavaŭ ułasnuju mietodyku «łeślizm».

Suśvietnuju viadomaść Aleks Łeśli atrymaŭ razam ź inšaj biełaruskaj — Naściaj Rybkaj (sapraŭdnaje imia Anastasija Vašukievič).

Razam para pravodziła treninhi pa spakušeńni, jakija šmat chto ličyŭ seks-siektaj. U lutym 2018 hoda Naściu Rybku i Aleksa Łeśli zatrymali ŭ Banhkoku za praviadzieńnie nielehalnych sekc-treninhaŭ pad vyhladam urokaŭ pa spakušeńni. Ich abvinavacili ŭ parušeńni tajskaha zakanadaŭstva ab baraćbie z prastytucyjaj.

Naścia Rybka i Aleks Łeśli ŭ 2018 hodzie

Sama ž Rybka ličyła, što ich aryšt byŭ pomstaj miljardera Aleha Dzierypaski. A ŭ taho sapraŭdy była nahoda mocna pakryŭdzicca. U adnym z rasśledavańniaŭ Alaksieja Navalnaha śćviardžałasia, što rasijski vice-premjer i kiraŭnik aparata ŭrada Siarhiej Prychodźka ŭ supravadžeńni Rybki adpačyvaŭ na jachcie Elden miljardera Aleha Dzierypaski, abmiarkoŭvajučy dziełavyja pytańni.

Łeśli i Rybka sprabavali prasić palityčnaha prytułku ŭ ambasadzie ZŠA ŭ Banhkoku, abiacajučy raspavieści šmat čaho cikavaha. Ale ničoha nie atrymałasia. U 2019 hodzie ich vypuścili z turmy ŭ Tajłandzie i departavali.

Łeśli praciahvaje zajmacca seks-treninhami — i voś ad jaho vučniaŭ pakutujuć dziaŭčaty ŭ Maskvie.

U sacyjalnych sietkach adno za adnym źjaŭlajucca videa aburanych dziaŭčat, jakija razmaŭlajuć z tymi samymi hora-płejbojami, jakija macali ich nižej za taliju, kab paznajomicca. Siarod paciarpiełych jość 17-hadovaja dziaŭčyna, a taksama žančyna na 9-m miesiacy ciažarnaści.

Usio adbyvałasia ŭ samym centry Maskvy. Adnak śćviardžajecca, što hetaja prablema nie apošnich dzion — niekatoryja dziaŭčaty kažuć, što sutykalisia z damahańniami ad vučniaŭ seks-koŭča jašče ŭ 2024 hodzie. Niechta ŭžo adnios zajavy ŭ palicyju.

Tym časam Łeśli zapisaŭ videazvarot da svaich vučniaŭ, dzie vykazaŭ niezadavolenaść tym, jak vykonvajuć jaho zadańnie:

— Vy što pavinny byli zrabić? Padyści, uziać za azadak, advieści ŭ prybiralniu. A pakolki vy nie zaviaršyli etap, jany niezadavolenyja.

Telehram-kanał «Ostorožno, Moskva», jaki naležyć Ksienii Sabčak, aburajecca tym, što ŭ šyrokim prodažy zastajucca knihi Aleksa Łeśli. U svaich tekstach jon raspaviadaje ab technikach damahańniaŭ i vučyć pryciskać dziaŭčat, jakija admaŭlajucca ad blizkaści.

Asobny błok Łeśli pryśviačaje schileńniu da seksu niavińnic, hałoŭnym praviłam jon nazyvaje: «Kali pačaŭ, treba skončyć». Darečy, biełaruski oz.by taksama handluje knižkami skandalnaha seks-koŭča, u jakich prapahandujecca hvałt u dačynieńni žančyn.

Skrynšot sajta oz.by

Telehram-kanał «112» paviedamlaje, što na Aleksa Łeśli zaviali kryminalnuju spravu za schileńnie da zhvałtavańnia. Dokazaŭ dastatkova, bo i sami ŭdzielniki pavinny byli zdymać vykanańnie «praktykavańnia».

Pakul seks-koŭč nie zatrymany. Dakładna nieviadoma, ci znachodzicca jon ciapier u Rasii.

U svaim telehram-kanale jon vychvalajecca, byccam padaŭ zajavu ŭ Śledčy kamitet Rasii na deputatku Dziarždumy Ksieniju Haračavu za jaje vykazvańni z krytykaj jaho treninhaŭ: «Kali deputatka Haračava patrabuje pravierki za flirt, tady i jaje varta pravieryć — na pieravyšeńnie paŭnamoctvaŭ, dyskryminacyju i palityčny cisk na mužčyn».

Svaje treninhi Łeśli ładzić nie tolki ŭ Rasii, ale i ŭ Jeŭropie. Sioleta jon rekłamavaŭ treninh u Varšavie.

Kamientary da artykuła