Jeŭropa zmahła zachavać adzinstva z Trampam na vypadak napadu Rasii
Na samicie NATA, jaki zaviaršyŭsia ŭ sieradu ŭ Niderłandach, prezident ZŠA Donald Tramp pahadziŭsia ź jeŭrapiejskimi lidarami, što Uładzimir Pucin ujaŭlaje pahrozu nie tolki Ukrainie. Jon taksama daŭ zrazumieć, što pierahledzieŭ svajo skieptyčnaje staŭleńnie da abaviazacielstvaŭ aljansu pa kalektyŭnaj abaronie. Kab zdabyć prychilnaść Trampa, krainam Jeŭropy daviałosia pahadzicca pavialičyć vydatki na abaronu da 5% da 2035 hoda, a taksama rassypacca ŭ pachvałach jamu, kapiravać jaho łozunhi i adsunuć na druhi płan vajnu va Ukrainie, piša «Ahientstvo».
Prezident Donald Tramp i hienieralny sakratar NATA Mark Rute (sprava) na plenarnym pasiadžeńni samitu NATA ŭ Haazie, Niderłandy, 25 červienia 2025 hoda. Fota: AP Photo / Matthias Schrader
Na pres-kanfierencyi paśla samitu, kamientujučy zajavu staršyni Abjadnanaha kamiteta načalnikaŭ štaboŭ NATA Dena Kiejna pra toje, što Pucin maje bolš šyrokija terytaryjalnyja ambicyi za miežami Ukrainy (pavodle acenak jeŭrapiejskich raźviedak, Rasija ŭ bližejšyja niekalki hadoŭ moža padrychtavacca da vajny z NATA), Tramp skazaŭ, što heta «mahčyma».
Pry hetym jon zajaviŭ, što Pucin «chacieŭ by vybracca z hetaj situacyi». Prezident ZŠA paabiacaŭ «pahavaryć z Pucinym, pahladzieć, ci ŭdasca pakłaści hetamu kaniec».
Prychilnaść Trampa sajuzu ź Jeŭropaj
Asnoŭnaj zadačaj samitu stała ŭtrymańnie Trampa ŭ arbicie NATA na fonie jaho zajaŭ pierad kanfierencyjaj, napisaŭ Bloomberg. Pa darozie na samit Tramp pastaviŭ pad sumnieŭ abaviazacielstvy ZŠA pa kalektyŭnaj abaronie.
Adnak na samicie jon paabiacaŭ padtrymku jeŭrapiejskim sajuźnikam. «Ja padtrymlivaju heta», — skazaŭ Tramp, kali jaho spytali pra artykuł pra kalektyŭnuju abaronu dahavora NATA.
Na pres-kanfierencyi pa vynikach samitu Tramp zajaviŭ, što źjazdžaje ź Niderłandaŭ «inšym». «Im patrebny ZŠA. I my tut, kab dapamahčy im abaranić svaje krainy», — skazaŭ Tramp.
Źmianić staŭleńnie Trampa da jeŭrapiejskich sajuźnikaŭ dapamahło rašeńnie ich lidaraŭ padtrymać pavyšeńnie vydatkaŭ na abaronu z 2 da 5% VUP.
U vynikovaj dekłaracyi samitu havorycca, što novy metavy pakazčyk pa vydatkach staŭ adkazam «u pryvatnaści, na doŭhaterminovuju pahrozu, jakuju ŭjaŭlaje Rasija».
Kamplimienty Trampu
U stratehii NATA pa zachavańni sajuzu Jeŭropy z Trampam nie było ničoha tonkaha, piša Reuters. Rute rassypaŭsia ŭ kamplimientach u pasłańni Trampu, apublikavanym, kali prezident ZŠA lacieŭ u Haahu.
«Vy dasiahniecie taho, čaho nie ŭdavałasia zrabić NI ADNAMU amierykanskamu prezidentu», — napisaŭ Rute, kapirujučy styl Trampa i vydzialajučy niekatoryja słovy. «Jeŭropa zapłacić VIALIKUJU sumu, jak i pavinna być, i heta budzie vašaj pieramohaj».
Trampu byŭ akazany redki honar spynicca ŭ pałacy karala Niderłandaŭ Vilema-Alaksandra.
A prezident Litvy Hitanas Naŭsieda prapanavaŭ aljansu pryniać deviz «Zrobim NATA znoŭ vialikim».
Mienš uvahi vajnie va Ukrainie
Ź inšaha boku, z paradku dnia samitu pastaralisia prybrać pytańni, jakija mahli vyklikać razdražnieńnie Trampa. U vynikovych zajavach aljansu praktyčna nie zhadvajucca Rasija i Ukraina. U dekłaracyi niama i asudžeńnia vajny va Ukrainie, jakoje było ŭ papiarednich zajavach lidaraŭ aljansu.
Vynikovaja dekłaracyja samitu ŭtrymlivaje paćviardžeńnie «abaviazacielstvaŭ pa padtrymcy Ukrainy».
Adnak u zajavie niama ni słova pra mahčymaść ustupleńnia Ukrainy ŭ NATA, što pa vynikach letašniaha samitu było abvieščana «nieadvarotnym».
Źmiest zajavy adlustroŭvaje nieachvotu administracyi Trampa pradastaŭlać bolš vajennaj dapamohi Kijevu, piša Bloomberg.
Tramp sustreŭsia z prezidentam Ukrainy Uładzimiram Zialenskim paśla samitu. Adna z tem razmovy — pastaŭka sistem SPA, paviedamiŭ Zialenski. Tramp na pres-kanfierencyi paabiacaŭ, što ZŠA razhledziać mahčymaść pastaŭki Ukrainie dadatkovych kompleksaŭ Patriot.
U cełym Zialenskamu daviałosia nazirać za samitam zboku, napisała Associated Press, što rezka adroźnivałasia ad papiarednich samitaŭ.
U Haazie Zialenski pravioŭ šerah sustreč ź lidarami krain-sojuźnic Ukrainy. Jon atrymaŭ abiacańnie vajennaj dapamohi, u tym liku bieśpiłotnikaŭ i radaraŭ dla baraćby z rasijskimi dronami, ad Niderłandaŭ. Premjer-ministr Vialikabrytanii Kir Starmier abviaściŭ ab pastaŭcy Ukrainie 350 rakiet SPA koštam 95 młn dołaraŭ.