«Tym, chto nastalhuje pa saŭku, spadabajecca». Błohier pieranačavaŭ u najhoršych hatelach Biełarusi i padzialiŭsia ŭražańniami

Chłopiec, jaki padpisany ŭ tyktoku jak Pavieł Parmon, na ŭłasnym dośviedzie vyrašyŭ pravieryć, što nie tak z hatelami, rejtynh jakich na ŭzroŭni plintusa. Videa ekśpierymientu nabrali miljony prahladaŭ.

Skrynšot videa na YouTube

Pieršym punktam vandroŭki chłopca staŭ Barysaŭ. Tam Pavieł zasialiŭsia ŭ hatel «Biarezina», jaki na «Jandeks.Kartach» mieŭ rejtynh 3,3 z 5 mahčymych zorak.

Kali pačytać vodhuki, dyk šmat chto skardziŭsia na błaščyc. Siarod kamientaryjaŭ aburanych haściej sustrakajucca sapraŭdnyja pierliny: «Bolš-mienš absłuhoŭvańnie pačynajecca tolki paśla skarhaŭ naviedvalnikaŭ. Voś tolki hetym niezadavolenym ludziam potym aficyjanty i kuchar plujuć u ježu, a da hetaha jašče i tarakany papoŭzać paśpiavajuć».

Sychodziacca ludzi ŭ tym, što ŭ hetym miescy SSSR jašče nie raspaŭsia.

Pa darozie ŭ svoj numar tyktokier žartavaŭ, što nie darma ŭziaŭ z saboj dadatkovyja trusy. Tamu što vidy kalidora vyklikali ŭstojlivuju asacyjacyju nie z hatelem, a z chorar-kvestam.

Najhoršyja čakańni ad pakoju paćvierdzilisia: mocna pachła cyharetami, tut i tam było vidać adklejenyja špalery, Na padłozie lažali niezrazumiełyja kroški. A adzin z vyklučalnikaŭ upaŭ, jak tolki błohier da jaho dakranuŭsia.

Na palicy biez spravy lažaŭ karniz z trymalnikami dla firanak. Chłopiec vyrašyŭ, što pałka patrebnaja, kab adbivacca ad niaprošanych haściej. Naściennaja lampa taksama valałasia na palicy — ale jaje možna było ŭklučyć.

Z posudu ŭ numary znajšłasia adna siratlivaja šklanka na padnosie:

— Nu i chopić — dla taho, kab vypić harełki. Bo bolš tut nu zusim niama čaho rabić.

Byŭ i alternatyŭny varyjant zaniatkaŭ — malitva. Tamu što Pavieł niečakana znajšoŭ u numary Bibliju.

Zatoje ŭ numary byŭ televizar — puzacieńki ekspanat stajaŭ na hanarovym miescy. Imavierna, jon byŭ starejšy za hościa hatela. A kab uklučyć hety rarytet, treba było jaho spačatku adramantavać.

Uklučyć televizar narešcie atrymałasia, ale vyjava mirhała, a huku nie było naohuł.

Prybiralnia była ahulnaja — da jaje treba było iści praź biaskoncy kalidor. Unitazy i dziŭnyja ŭmyvalniki chłopiec pabačyŭ, a voś banalnaha duša nie znajšoŭ.

Za noč u «Biarezinie» Pavieł zapłaciŭ 39 rubloŭ. Ale ž vyspacca ŭ jaho nie atrymałasia, bo ŭ numary pobač uvieś čas kahości vanitavała.

Nastupnym punktam pryznačeńnia akazaŭsia hatel «Łukoml» u Novałukomli. Jon mieŭ rejtynh 2,1 zorki z 5 (ciapier jašče mienš — usiaho 1,7).

Vodhuki ŭražvajuć: «Kali chočacie tam pieranačavać, to mašyna padydzie lepš, čym ich «numary». Na druhim paviersie mohuć zabiahać myšy», «U nas byŭ miehasupierluks, ale jak ža tam było ahidna znachodzicca i dakranacca da čaho-niebudź! Ahidnaja prasiedžanaja stahodździami kanapa, dyvan ź plamami, pa jakich možna vyvučać historyju, rypučaja mebla ź siaredziny 90-ch. Dyvan adrazu zaharnuli, kab nie hladzieć na brud i plamy».

Sustrakajucca skarhi, što navat u numary padvyšanaj kamfortnaści niama haračaj vady i vielmi brudna, a ŭsia santechnika ciače, byccam ručai pa viaśnie. Aburajucca ludzi i tym, što cana za ŭsiu hetu raskošu nie vielmi biudžetnaja: «Dvuchmiesny numar 110 rubloŭ! Dla takoha maleńkaha horada na ŭskrainie Viciebskaj vobłaści košt kaśmičny».

@luzgriffith19786

Ja pierienočievał v chudšich otielach Biełarusi (2)

♬ original sound - luzgriffith19786 - Pavieł Parmon

Błohier, kali pabačyŭ u vodhukach fotazdymki numaroŭ, ažno zakryčaŭ ad žachu. Ale vyrašyŭ, što heta ŭsio fejki, bo nie moža być tak usio drenna.

Žyćcio ž dakazała: mahčyma ŭsio. Numar sustreŭ Paŭła dušam biez štorak i pakalečanym umyvalnikam. Pa kutach chapała pavucińnia z trahična zahinułymi ŭ im muchami. Špalery taksama nie vielmi nadziejna trymalisia na ścienach.

Zatoje ŭ pakoi byŭ nievialiki chaładzilnik. A televizar byŭ małodšym brata televizara z «Biareziny».

Pryjemnym bonusam ad pajezdki błohier ličyć pryhožy padviesny most, jaki jon pabačyŭ u horadzie.

Dalej Pavieł pajechaŭ u hatel z samym nizkim rejtynham — 1 zorka z 5. I heta byŭ hatel «Sianno», jaki znachodzicca ŭ adnajmiennym rajcentry Viciebskaj vobłaści.

Voś, naprykład, što pišuć u vodhukach: «Heta nie apisać słovami. Dobra, u šafie była taburetka, možna paviesicca ŭ takim miescy. Piersanał dobry, vietlivy», «Tym, chto nastalhiruje pa saŭku, spadabajecca».

— Tut jość hatel? — spytaŭ chłopiec u jaho supracoŭnicy.

— Užo začynieny. A, vam što, haścinica?

Usio ž Pavieł prajšoŭ fejskantrol i atrymaŭ zapavietnyja klučy. Na paviersie jon pabačyŭ hałoŭnuju słavutaść — televizar i elektryčny čajnik. Pra ich pišuć u vodhukach, bo takija praźmiernaści jość tolki ŭ kalidory.

Numar sapraŭdy ŭraziŭ chłopca. U prybiralni ŭsio było nastolki ścipła, što składana znajści słovy dla apisańnia. Pad stollu visieła prosta lampačka. Navat tualetnaj papiery paškadavali — pakinuli dla hościa nievialiki kavałačak. Raźviesialiła błohiera toje, što špinhalet na dźviarach u stratehična važnaje miesca jość z dvuch bakoŭ.

Pavukoŭ było stolki, što Pavieł dumaŭ, byccam trapiŭ u teraryum u zaaparku.

— A stoł byccam by skrali na ČAES.

Taburetki ŭ šafie nie akazałasia. Błohier pažartavaŭ, što, imavierna, jaje vyrašyli prybrać, kali pačytali kamientary.

Zatoje i košt akazaŭsia śmiešnym — krychu bolš za 20 rubloŭ za noč.

Videa Paŭła nabrali 3,3 miljona prahladaŭ na YouTube i ahułam kala 3 miljonaŭ prahladaŭ u tyktoku.

Kamientary da artykuła