Za tydzień na Homielščynie zafiksavanyja rekordnaja kolkaść zalotaŭ dronaŭ i try źbićci

Infarmacyju pra vypadki ŭvarvańnia ŭ biełaruskuju pavietranuju prastoru rasijskich udarnych dronaŭ i ich imitataraŭ za tydzień z 7 da 13 lipienia sabraŭ «Fłahštok».

Ilustracyjny zdymak

Vyvučeńnie danych manitorynhavych kanałaŭ zaśviedčyła, što hety tydzień staŭ rekordnym: pavodle padlikaŭ «Fłahštoka»,

zafiksavanyja minimum 59 vypadkaŭ zalotaŭ u pavietranuju prastoru Biełarusi rasijskich BPŁA pry atakach na terytoryju Ukrainy.

Za ŭvieś červień było zafiksavana 17 takich vypadkaŭ, u papiarednija miesiacy — jašče mienš.

Kolkaść uvarvańniaŭ dronaŭ u lipieni nabližajecca da kolkaści studzienia 2025 hoda, kali adbyłosia jak minimum 94 zaloty.

Najbolšaja kolkaść zalotaŭ u lipieni na hety momant, pa źviestkach ukrainskaha kanała «Rynda manitoryć», adbyłosia 8, 9, 10 i 12 lipienia.

Žychary Homiela čuli ŭ niebie charakterny huk «Šachieda» 9 i 10 lipienia. Žychary Rečyckaha rajona bačyli, jak 11 lipienia źniščalnik haniaŭsia za dronam, ale hukaŭ źbićcia nie čuli.

Adnak paražeńnie adrazu troch dronaŭ byłr zaŭvažana ŭ adnyja sutki, 12 lipienia, u Homielskim, Łojeŭskim rajonach i, jak miarkujecca, na miažy Homielskaj i Bresckaj abłaściej.

Pra źbićcio BPŁA nad Ziabraŭkaj Homielskaha rajona kala pieršaj hadziny nočy paviedamlaŭ «Fłahštok». Taksama ŭnačy byŭ likvidavany bieśpiłotnik u rajonie vioski Mochaŭ Łojeŭskaha rajona, pavodle źviestak «Pozirka».

Jašče adzin dron, vierahodna, byŭ źbity ŭviečary 12 lipienia na zachadzie Homielskaj vobłaści. Biełaruski viertalot Mi-24 padbiŭ u Homielskaj vobłaści rasijski BPŁA, jaki lacieŭ u bok Ukrainy, paviedamlała ŭkrainskaja presa sa spasyłkaj na krynicy ŭ raźviedcy. Tady manitorynhavyja kanały fiksavali zaloty niekalkich dronaŭ u Homielskuju vobłaść i ich ruch uzdoŭž miažy ŭ zachodnim kirunku.

Realnaja kolkaść parušeńniaŭ pavietranaj prastory Biełarusi rasijskimi BPŁA z terytoryi Ukrainy moža być prykmietna vyšejšaj.

Kamientary da artykuła