Samy paśpiachovy błohier-sadavod Bresta pierarabiŭ stary furhon u dačny domik VIDEA
Kirył Kvietka — viadomy ŭ Breście sadavod, aŭtar «Kvietka-parku» kala Bresckaha dziaržaŭnaha techničnaha ŭniviersiteta. Niekalki siezonaŭ jon pracavaŭ nad svaim letnim domikam — sa staroha furhona. Niadaŭna chłopiec skončyŭ kreatyŭnuju pierabudovu i pakazaŭ vynik u tyktoku.
Letni domik Kiryła Kvietki. Skrynšot ź videa: @kirill_kvetka / TikTok
Pieršapačatkova stary furhon byŭ zusim nieprydatny dla žylla — u im było šmat budaŭničaha śmiećcia, a sam karkas patrabavaŭ ramontu.
Z hetym Kiryłu dapamoh jaho baćka — razam jany prybrali ŭsio lišniaje, źmianili koły. Baćka taksama pačyściŭ staruju farbu, jakaja advalvałasia ad furhonu, i pieramalavaŭ.
Kaštavaŭ furhon 1400 rubloŭ. Vandravać ź im nie ŭdałosia b: macavańnie aŭtadoma padychodziła tolki dla traktara, a nie dla jaho mašyny.
Kab zrabić unutry «trochpakajovuju kvateru», Kirył z baćkam zrabili karkas ź piareharadak i abšyli jaho fanieraj.
Unutry aŭtadoma bolšuju častku pavierchni zrabili biełaj. Kirył paviesiŭ unutry palički, zrabiŭ kuchniu.
Letni dom Kiryła Kvietki ŭnutry. Skrynšot ź videa: @kirill_kvetka / TikTok
Hatavać u domiku možna dziakujučy hazavaj plitcy dla padarožžaŭ, dadatkova pracuje staraja buržujka.
Nijakich kamunikacyj na dačy ŭ Kiryła niama — vadu jon biare sa śvidraviny, a elektryčnaść — ad hienieratara.
Niaredka sadavod kreatyŭničaŭ, kab vyrašyć techničnyja pytańni ŭ svaim žylli: naprykład, vadu da rakaviny pravodzić elektryčny kran, a zamiest šafy ŭstalavany prosta viešałki, zroblenyja z pałak dla rydlovak.
Spalnuju zonu z łožkam Kirył razmalavaŭ — u fihury raślin, ptušak i hryboŭ. Na biarozy kala doma chłopiec paviesiŭ hirlandu, a pobač pastaviŭ stoł. Za im jon ź siabrami źbiraŭsia, kab adśviatkavać kruhłuju ličbu — 100 tysiač padpisčykaŭ u instahramie.
Śviatočny stoł i razmalavany łožak Kiryła Kvietki. Skrynšot ź videa: @kirill_kvetka / TikTok