«Ja nie bačyŭ ničoha takoha»: jak lalki Labubu prynieśli šalony prybytak

Kitajskaja kampanija pa vytvorčaści cacak Pop Mart, jakaja staić za nadzvyčaj papularnymi lalkami Labubu, zajaviła, što jaje prybytki imkliva vyraśli za pieršyja šeść miesiacaŭ hetaha hoda, piša Bi-bi-si.

Fota: Lars Penning/picture alliance via Getty Images

Kampanija, što bazujecca ŭ Piekinie, zajaviła, što čakaje rostu prybytku za hety pieryjad jak minimum na 350%, pakolki dachody vyraśli bolš čym u try razy.

Pop Mart, fondavy košt jakoj pieravyšaje 40 miljardaŭ dołaraŭ, taksama zajaviła, što prybytkovaść vyrasła dziakujučy pavyšeńniu paznavalnaści brendu pa ŭsim śviecie i kantrolu vydatkaŭ.

Kalekcyjaniery apantanyja virusnymi lalkami Labubu — vydumanymi istotami, padobnymi na elfaŭ, z vostrymi zubami, — ich znosili z palic kramaŭ, u jakija vystrojvalisia doŭhija čerhi pa ŭsim śviecie.

Pop Mart najbolš viadomaja prodažam cacak u «ślapych skrynkach» — upakoŭcy, jakaja chavaje svajo źmieściva, pakul jaje nie adkryjuć. Heta markietynhavaja taktyka padviarhałasia krytycy za zaachvočvańnie azartnych pavodzin i kampulsiŭnych pakupak.

Lalki Labubu, vytvorčaść jakich zapuścili ŭ 2019 hodzie, dapamahli kampanii stać bujnym roźničnym pradaŭcom, jaki kiruje bolš čym 2000 handlovymi aŭtamatami i kramami pa ŭsim śviecie.

U 2020 hodzie Pop Mart pačała pradavać svaje akcyi na Hankonhskaj fondavaj biržy. Fondavuju acenku kampanii pavialičyli amal na 600% za apošni hod.

Prodažy pa-za miežami macierykovaha Kitaja skłali amal 40% ad ahulnaha dachodu kampanii ŭ 2024 hodzie.

Šmat kramaŭ pa ŭsim śviecie byli vymušany prypynić prodaž lalek Labubu z-za vielizarnaha popytu.

Lalki Labubu nabyli papularnaść, asabliva ŭ ZŠA, dziakujučy adabreńniu znakamitaściaŭ, u tym liku Kim Kardašjan i Lizy z K-pop hurta Blackpink.

Partniorstva Pop Mart z takimi viadomymi kampanijami, jak Coca-Cola i manha-franšyza One Piece, taksama pavysiła papularnaść Labubu ŭ śviecie.

U červieni prodažy Labubu ŭ ZŠA vyraśli na 5000% u paraŭnańni ź minułym hodam, zhodna z acenkami daśledčaj kampanii M Science.

«Ja nie bačyŭ ničoha padobnaha ź inšymi kampanijami-vytvorcami cacak», — skazaŭ starejšy analityk M Science Vinčy Čžan u intervju BBC.

Jon dadaŭ, što kampanija maje vielizarny patencyjał u ZŠA, dzie jana maje kala 40 kramaŭ u paraŭnańni z prykładna 400 u Kitai.

Šalony ažyjataž vakoł pakupnikoŭ stvaryŭ burny rynak pieraprodažaŭ, dzie lalki, pieršapačatkova pradavanyja za canu kala 10 dalaraŭ, mohuć dasiahać koštu ŭ sotni dalaraŭ.

U červieni Labubu pamieram z čałavieka była pradadziena na aŭkcyjonie ŭ Piekinie za 150 000 dalaraŭ. Papularnaść Labubu taksama spryjała bumu padrobak, jakija časta nazyvajuć lalkami Łafufu.

U červieni kitajskija ŭłady vyłučyli bolš za 46 000 padroblenych cacak Labubu u ramkach baraćby z rostam čornaha rynku lalek.

Kamientary da artykuła