14 i 16-hadovych padletkaŭ zatrymali za raspaŭsiud narkotykaŭ. Im pahražaje da 15 hadoŭ
U Bresckaj vobłaści pa padazreńni ŭ zbycie narkotykaŭ zatrymali dvuch padletkaŭ. Prapanovu ab «padpracoŭcy» jany znajšli ŭ miesiendžary. Im napisaŭ kuratar narkamarkieta i paabiacaŭ lohkija hrošy, paviedamlaje pres-słužba MUS.
Adnamu padletku 14 hadoŭ, jon vučyć u škole i na kanikuły pryjechaŭ u hości da babuli ź inšaj krainy. Druhomu padletku — 16, jon rodam ź Biełaaziorska, vučyć u kaledžy. Paśla prachodžańnia «navučańnia» kurjery atrymlivali aptovyja partyi tavaru, fasavali i raspaŭsiudžvali praz zakładki na terytoryi Biarezinskaha rajona.
U tajniku ŭ Pinskim rajonie było znojdziena i źniata zvyš 250 hramaŭ asabliva niebiaśpiečnaha psichatropnaha rečyva 4‑CMS. Padletki paśpieli papracavać kala troch tydniaŭ.
Zaraz raspačata kryminalnaja sprava za niezakonny abarot narkotykaŭ z metaj zbytu. Abvinavačanym pahražaje da 15 hadoŭ pazbaŭleńnia voli, bo adkaznaść nastupaje z 14‑hadovaha ŭzrostu.