Biełaruska atrymała dazvoł na pražyvańnie ŭ Polščy paśla pieršapačatkovaj admovy
Dziakujučy pracoŭnaj hrupie pa pytańniach lehalizacyi biełarusaŭ pry Ministerstvie ŭnutranych spraŭ i administracyi Polščy hramadzianka Biełarusi atrymała dazvoł na pražyvańnie ŭ hetaj krainie paśla pieršapačatkovaj admovy, piša Reform.news.
Biełaruska Maryja pražyvała ŭ Polščy i atrymała admovu ad vajavody ŭ pradastaŭleńni dazvołu na pražyvańnie na padstavie polskaha pachodžańnia, bo paśla zamužža źmianiła proźvišča i nie mieła aryhinała biełaruskaha śviedčańnia ab šlubie. Naviedać Biełaruś, kab atrymać dublikat dakumienta, jana nie mahła, bo abhruntavana bajałasia pieraśledu z boku režymu Łukašenki.
Kiraŭnica inicyjatyvy «Partyzanka» Hanna Macijeŭskaja pradstaviła jurydyčnaje abhruntavańnie, zhodna ź jakim pry razhladzie takich spraŭ pavinny ŭličvacca ŭsie dastupnyja dokazy, što paćviardžajuć fakty, nieabchodnyja dla pryniaćcia pravavoha rašeńnia.
Pavieł Łatuška, namieśnik kiraŭnika Abjadnanaha pierachodnaha kabinieta i kiraŭnik biełaruskaj boku ŭ rabočaj hrupie, źviarnuŭsia da kiraŭnika Ŭpraŭleńnia pa spravach inšaziemcaŭ Polščy Tomaša Cytrynoviča z prośbaj nakiravać vajavodam i padparadkavanym ustanovam napamin pra toje, što va mnohich vypadkach hramadzianie Biełarusi nie majuć realnaj mahčymaści atrymać aryhinały abo dublikat dakumientaŭ ź dziaržaŭnych ustanoŭ Biełarusi.
Łatuška taksama prapanavaŭ padrychtavać rekamiendacyi, u adpaviednaści ź jakimi, kali zakanadaŭstva nie patrabuje abaviazkovaha pradstaŭleńnia aryhinała dakumienta, dapuskajecca vykarystańnie inšych dastupnych dokazaŭ dla paćvierdžańnia jurydyčna značnych faktaŭ.
Na dniach biełaruska pa vynikach abskardžvańnia atrymała stanoŭčaje rašeńnie, u jakim była ŭličana pazicyja Ŭpraŭleńnia pa spravach inšaziemcaŭ Polščy ŭ padtrymku dovadaŭ biełaruskaj boku.