Pamior polski architektar biełaruskaha pachodžańnia Michał Bałaš
Jon pražyŭ 102 hady i byŭ dziadźkam eks-prezidenta Polščy Alaksandra Kvaśnieŭskaha.
18 lipienia pamior polski architektar biełaruskaha pachodžańnia Michał Bałaš.
Jon naradziŭsia 22 studzienia 1923 hoda ŭ Vilni ŭ siamji nastaŭnika, pravasłaŭnaha vieravyznańnia. Jaho baćki mieli falvarak u Starym Dvary ŭ Pastaŭskim paviecie
Baćka Michała pachodziŭ z zamožnaj ziemleŭładalnickaj siamji, jakaja, adnak, finansava paciarpieła padčas Pieršaj suśvietnaj vajny. Baćki Michała Bałaša jašče da jaho naradžeńnia pierajechali ŭ Vilniu, dzie jaho baćka staŭ sanitarnym fielčaram u psichijatryčnaj balnicy.
Michał Bałaš mieŭ starejšaha brata Alaksandra i dźviuch małodšych siaścior: Vieraniku i Alaksandru (maci prezidenta Polščy Alaksandra Kvaśnieŭskaha).
Padčas Druhoj suśvietnaj vajny žyŭ u siamji ŭ Prudnikach-Jamkach. Skončyŭ himnaziju ŭ Pastavach i pracavaŭ buchhałtaram.
U 1944 hodzie dałučyŭsia da Armii Krajovaj. Zatym byŭ pryzvany ŭ Čyrvonuju Armiju, adnak paśla admovy pryniać prysiahu byŭ internavany i sasłany pad Razań. Vyzvaleny ŭ 1946 hodzie, źjechaŭ u Polšču, kudy raniej pryjechała astatniaja jaho siamja.
Stupień bakałaŭra atrymaŭ u Poznani. Mahistraturu skončyŭ u Hdańskaj palitechnicy, dzie atrymaŭ tytuł mahistra inžyniera architektury.
U 1954 hodzie atrymaŭ pasadu haradskoha architektara ŭ Biełastoku. Jaho suviazi z sakralnaj architekturaj pačalisia z ramontu carkvy sv. Mikałaja (siońnia — sabora).
Spačatku prajektavaŭ pieravažna pravasłaŭnyja cerkvy na Padlaššy, ale ź ciaham času jamu daručali taksama prajekty katalickich chramaŭ.
U 80-ja hady jamu daručyli zaviaršeńnie prajekta rekanstrukcyi carkvy manastyra ŭ Supraśli.