Tadej Pahačar: viełavunderkind z maleńkaj słavianskaj krainy, jaki nie maje sabie roŭnych

Padletkam jon paabiacaŭ sabie prajechać «Tur de Frans». I nie tolki prajechaŭ, a trojčy jaho vyjhraŭ, staŭšy lehiendaj suśvietnaha viełasportu. Z maleńkaha słavienskaha haradka chłopiec uźniaŭsia na viaršyniu spartyŭnaj słavy i atrymaŭ kantrakt na 50 miljonaŭ jeŭra.

Tadej Pahačar, trochrazovy pieramožca «Tur de Frans». Fota AP Photo / Thibault Camus

U hetuju piatnicu, 18 lipienia, na «Tur de Frans» prajšoŭ 13-y etap — indyvidualnaja honka na čas z padjomam pad haru. Heta pieršy za apošnija 20 hadoŭ «horny» etap u takim farmacie: ravarystam daviałosia pieraadoleć składanuju trasu z ahulnym naboram vyšyni 650 mietraŭ, što zrabiła etap sapraŭdnym vyprabavańniem dla lidaraŭ honki.

I jaho vyjhraŭ 26-hadovy ščupleńki słavieniec Tadej Pahačar, jaki apiaredziŭ hałoŭnaha sapiernika, datčanina Jonasa Vinhiehora, na 36 siekundaŭ. Heta ŭžo čaćviortaja pieramoha Pahačara na sioletnim «Tury». Dziakujučy hetamu vyniku jon jašče macniej zamacavaŭ svajo lidarstva ŭ ahulnym zaliku i ciapier apiaredžvaje Vinhiehora na 4 chviliny 7 siekund.

Raskazvajem, što viadoma pra hetaha viełavunderkinda.

Tadej Pahačar naradziŭsia ŭ maleńkim haradku Kamienda (Komenda), što za 20 kiłamietraŭ ad stalicy 2-miljonnaj Słavienii — horada Lublany.

Jon adzin z čatyroch dziaciej nastaŭnicy francuzskaj movy Marjety i dyrektara meblevaj fabryki Mirki Pahačaraŭ. Admietna, što chłopčyk spačatku zajmaŭsia futbołam, ale ŭ 9 hadoŭ razam sa starejšym bratam pieraklučyŭsia na viełasport.

Pieršym i adzinym viełasipiednym kłubam, u jakim Pahačar byŭ da taho, jak stać prafiesijanałam, staŭ KD Rog Ljubljana (z 2019 hoda — Ljubljana Gusto Xaurum), siabram jakoha jon staŭ u 9 hadoŭ — u 2007 hodzie.

Tadej Pahačar u dziacinstvie. Fota: siamiejny archiŭ / cyclingweekly.com

Pieršy trenier spartoŭca ŭ intervju vydańniu Cycling Weekly ŭspaminaje, što svaje zdolnaści Tadej prademanstravaŭ užo ŭ 11 hadoŭ, kali ŭ honcy pieraadoleŭ padjom da harnałyžnaj stancyi Krvaviec (Krvavec) — 11,7 kiłamietraŭ z nachiłam 8,3 %.

A maci Marjeta adznačaje, što syn «pad haru jedzie chutčej, čym my spuskajemsia».

Pa jaje słovach, dla Tadeja viełasport staŭ najvažniejšaj spravaj u śviecie. Navat svaje kišennyja hrošy jon traciŭ na akulary ad sonca, škarpetki ci koły. Kali jamu było 12 hadoŭ, jon atrymlivaŭ 5 abo 10 jeŭra za pieramohi ŭ honkach. Suma pavialičvałasia pa miery jaho staleńnia, i nieŭzabavie chłopiec užo moh dazvolić sabie ŭsio, što chacieŭ.

Kali Tadeju było 14, jon skazaŭ svaim baćkam, što choča prajechać «Tur de Frans» i što zrobić usio dziela hetaj mety. Jany sprabavali adhavaryć jaho, bo chacieli, kab syn narmalna skončyŭ siaredniuju škołu i mieŭ zvyčajnuju prafiesiju.

«Ale škoła nie mieła dla jaho vialikaha značeńnia. Kali jamu treba było vybirać navučalnuju prahramu ŭ starejšaj škole, jon vybraŭ mašynabudavańnie, bo tam samaja prostaja prahrama», — adznačaje Marjeta.

Šlach na spartyŭny Alimp

Pavodle słoŭ maci, za ŭsie školnyja hady Tadej tolki raz ci dva schadziŭ na viečarynki ź siabrami. Jamu viečna nie było kali, uvieś čas zajmali treniroŭki.

«Jon zaŭsiody kazaŭ: «U mianie honka, treba treniravacca, ja nie mahu». Ałkaholu amal nie ŭžyvaŭ. Jon byŭ całkam zasiarodžany na viełasporcie», — uspaminaje maci.

U 2016 hodzie Tadej vyjhraŭ junacki čempijanat Słavienii ŭ honcy z raździelnaha startu, honku «Džyra dela Łunidžana» i zavajavaŭ bronzu junackaha čempijanatu Jeŭropy ŭ hrupavoj honcy.

U 2018 hodzie Pahačar zrabiŭ na čempijanacie Słavienii U23 załaty dubl — staŭ čempijonam jak u hrupavoj honcy, tak i ŭ honcy z raździelnaha startu. Akramia taho, jon zdabyŭ jašče šerah pieramoh, u tym liku na šmatdzionnym «Tur de l'Avenir», u jakim tradycyjna ŭdzielničajuć najlepšyja maładyja viełahonščyki płaniety.

Z 2019 hoda viełasipiedyst pačaŭ vystupać za kamandu z AAE Team Emirates i ŭžo na nastupny hod pieramoh na «Tur de Frans» i zavajavaŭ pieršy dla Słavienii alimpijski miedal u viełasporcie na hulniach u Tokia — bronzu ŭ šašejnaj honcy. U 2021 hodzie jon iznoŭ staŭ pieramožcam «Tur de Frans». 

Tadej Pahačar paśla pieramohi na «Tur de Frans» u 2021 hodzie razam z baćkam Mirkam i mamaj Marjetaj, a taksama siastroj Vitaj. Fota: Jean Catuffe / Getty Images

Minuły hod staŭ dla słavienskaha honščyka samym paśpiachovym u karjery. Akramia treciaj pieramohi ŭ «Tur de Frans», jon taksama vyjhraŭ šmatdzionku «Džyra dJItalija» i hrupavuju honku na čempijanacie śvietu, što dazvoliła jamu stać tolki trecim u historyi spartoŭcam, jaki zavajavaŭ Trajnuju karonu viełasportu.

«Dzieci płačuć, kali robiać sełfi ź im, uvieś narod adkryŭ dla siabie viełasport, budujucca trasy i vieładromy, jon zrabiŭ viełasport nacyjanalnym vidam sportu», — kaža kiraŭnik kamandy Team Emirates Maŭra Džaneci pra rolu Tadeja Pahačara ŭ raźvićci viełasportu ŭ Abjadnanych Arabskich Emiratach.

Kantrakt na 50 miljonaŭ i dabračynnaść

Jak piša Forbes, ciapier luby sponsarski kantrakt z Pahačaram składaje nie mienš za €500 000, choć jašče ŭ 2020 hodzie paśla jaho pieršaj pieramohi na «Tur de Frans» suma była €25 000.

Pavodle infarmacyi Gazzetta Dello Sport, kamanda Team Emirates padoŭžyła ź im kantrakt da 2030 hoda, i ahulnaja suma hetaj damovy dasiahnuła 50 miljonaŭ jeŭra za šeść hadoŭ.

Pry hetym, jak paviedamlaje italjanskaje vydańnie, u kantrakcie prapisanaja astranamičnaja suma adstupnych — bolš za 200 miljonaŭ dołaraŭ, što robić sychod honščyka da 2030 hoda praktyčna niemahčymym.

Tadej Pahačar na «Tur de Frans» u 2021 hodzie. Fota: Michael Steele / Getty Images

Pry hetym, jak piša Forbes, značnuju častku svaich dachodaŭ Tadej Pahačar tracić na dabračynnaść. Jon užo niekalki hadoŭ całkam finansuje Pogi Team — kamandu maładych honščykaŭ svajoj staroj kamandy Ljubljana Gusto Xaurum. Niadaŭna taksama byŭ adkryty «Fond Tadeja Pahačara» dla achviar stychijnych biedstvaŭ i chvorych dziaciej.

Ciapier Pahačar žyvie ŭ Manaka sa svajoj niaviestaj, słavienskaj viełasipiedystkaj Urškaj Žyhart, ź jakoj jon zaručyŭsia jašče zusim maładym, u vieraśni 2021 hoda.

Kamientary da artykuła