«A zmožacie vylecieć zaŭtra?» Džon Koŭł raskazaŭ, jak piŭ z Łukašenkam harełku, kab damovicca pra vyzvaleńnie palitviaźniaŭ

Vyzvaleńnia 14 palitviaźniaŭ, jakoje adbyłosia 21 červienia, nie było b, kali b namieśnik śpiecpradstaŭnika Trampa Džon Koŭł nie zaviazaŭ by z Łukašenkam niefarmalnyja suviazi. Pra heta sam amierykanski pasłańnik raskazaŭ vydańniu Politico.

Alaksandr Łukašenka paciskaje ruku Džonu Koŭłu padčas vizitu Kita Kiełaha ŭ Minsk 21 červienia 2025 hoda. Fota pres-słužby Alaksandra Łukašenki

Pa słovach Koŭła, harełku jon piŭ padčas doŭhaha abiedu z Łukašenkam. 

«Ja vypiŭ dźvie čarki, mianie nie zvanitavała, ale treciaj ja pić nie staŭ», — skazaŭ jon.

Amierykanski dapłamat patłumačyŭ, što jamu papiarednie paraili «začaravać» Łukašenku.

«[Łukašenka] zavioŭ razmovu ab Dziaržaŭnym departamiencie, i ja skazaŭ: «Tak, usio, što jany chočuć rabić, heta bła-bła-bła», — i jamu heta spadabałasia».

Łukašenka zdaŭsia Koŭłu razumnym i kiemlivym. Amierykaniec ličyć, što toj «sapraŭdy choča palapšeńnia adnosin z ZŠA». A taksama, što Łukašenka choča syhrać svaju rolu ŭ pieramovach pa vajnie va Ukrainie.

Pakul jany pili harełku, treba było pramaŭlać tosty. Łukašenka prapanavaŭ vypić za Trampa. Koŭł, u adkaz, padniaŭ tost za Łukašenku. Pili i za inšaje, ale Koŭł nie ŭdakładniŭ za što. 

«Usio heta było viesieła», — skazaŭ Koŭł.

Sustreča śpiecpradstaŭnika Trampa Kita Kiełaha, jaho namieśnika Džona Koŭła i Łukašenki adbyłasia 21 červienia. 22 červienia stała viadoma pra vyzvaleńnie 14 palitviaźniaŭ — ich advieźli ŭ Litvu.

Jak padkreślivajecca, havorka nie idzie pra jakija-niebudź «ździełki»: advakat Koŭł nie jość samastojnaj palityčnaj fihuraj. Jahonaja rola, chutčej, nosić techničny i dapamožny charaktar.

Politico pryvodzić jašče niekalki cikavych detalaŭ.

Paśla pierasiačeńnia biełaruskaj miažy mašyna z Koŭłam i amierykanskimi dypłamatami spyniałasia na viaskovaj darozie: mianiali dypłamatyčnyja numarnyja znaki na svaich aŭtamabilach, kab nie pryciahvać uvahi.

Pra Pałac Niezaležnaści ŭ artykule kažuć, što jon «pamieram ź nievialiki terminał aeraporta». «Jon taki vialiki, što Tom Brejdzi [zorka amierykanskaha futboła] nie zmoh by dakinuć miač z adnaho kanca viestybiula ŭ druhi», — skazaŭ Koŭł.

78-hadovy Koŭł — vopytny advakat, najbolš viadomy tym, što dapamoh zaklučyć pahadnieńnie na 386 miljardaŭ dołaraŭ z bujnymi tytuniovymi kampanijami ŭ kancy 1990-ch.

U jaho taksama było źvilistaje palityčnaje žyćcio; jon doŭhi čas byŭ demakratam, ale padtrymaŭ Džona Makkiejna ŭ 2008 hodzie i pasiabravaŭ z Saraj Pejlin, ale ŭ 2016 hodzie znoŭ padtrymlivaŭ demakrata — Marcina O'Meli.

U 2021 hodzie jon abaraniaŭ intaresy Trampa ŭ doŭhaihrajučym pracesie suprać sacyjalnych sietak, abvinavačvajučy ich u cenzury. Woke-ruch zrušyŭ mianie ŭprava», — skazaŭ jon u adnym ź intervju.

Z Trampam jaho ŭpieršyniu paznajomiła jahonaja žonka, Hreta Van Sasteren, byłaja viadučaja Fox News, jakaja šmat razoŭ brała intervju ŭ budučaha prezidenta. Toje znajomstva adbyłosia jašče hadoŭ 20 nazad.

U artykule śćviardžajecca, što biełaruskaje zadańnie Koŭła pačałosia z telefanavańnia ź Dziaržaŭnaha departamienta pry kancy krasavika 2025 hoda.

«Ci mahli b vy pajechać u Minsk, kab sustrecca z Łukašenkam, čałaviekam, jakoha časta nazyvajuć apošnim dyktataram Jeŭropy?»

«Dobra», — skazaŭ Koŭł.

«A zmožacie vylecieć zaŭtra?»

«Nie dobra!» — adkazaŭ jon. Ale palacieŭ.

«Istotny tut nie stolki źmiest zastolnych razmovaŭ i kałarytnyja detali, kolki sam fakt taho, što taki daśviedčany čałaviek, jak Džon Koŭł, paličyŭ mahčymym publična raskazać pra heta, — adznačaje ŭ svaim telehram-kanale palitołah Alaksandr Frydman. — Zvyčajna padobnyja epizody zastajucca za kadram, pakul pieramovy praciahvajucca — kab nie naškodzić ich chodu. Ciapier ža, paśla ŭltymatumu Trampa, jany byli ahałošanyja».

Kamientary da artykuła