Abrynulisia ruiny papularnaj u turystaŭ siadziby. Raniej čynoŭniki admovilisia jaje vyratoŭvać — pryčyna moža ździvić
Fasad siadziby ŭ Dzikuškach Lidskaha rajona šmat hadoŭ litaralna visieŭ u pavietry.
Parkavy fasad siadziby ŭ Dzikuškach da i paśla razbureńnia. Fota: telehram-kanał «Spadčyna»
Pra razbureńnie šlachieckaj siadziby paviedamlaje telehram-kanał «Spadčyna». Siońnia ranicaj turysty naviedali siadzibu, ale zastali jaje ŭžo ŭ razburanym stanie. Pavodle ich słoŭ, parkavy fasad abrynuŭsia litaralna za hadzinu da ichniaha pryjezdu.
Dzikuški pieršapačatkova byli vialikakniaskim uładańniem, jakim paśla vałodali Chraptovičy, Tyškievičy, Višniavieckija, Naruševičy, Chadkievičy. U kancy XVIII stahodździa Dzikuški nabyli Hraboŭskija, jakija pabudavali ŭ vioscy Spasa-Praabraženskuju carkvu ŭ styli kłasicyzmu.
Parkavy fasad siadziby ŭ Dzikuškach da razbureńnia. Levy bok ściany visieŭ prosta ŭ pavietry. Fota: vandrvm / Instagram
Niahledziačy na toje, što siadziba ŭ Dzikuškach paŭsiul nazyvajecca siadzibaj Hraboŭskich, muravany panski dom, jaki dajšoŭ da našaha času, nasamreč pabudavali Miniejki, jakija vałodali vioskaj u mižvajenny čas. Błytaninu, vidać, stvaryŭ źniešni vyhlad siadziby, jaki nahadvaje kłasicystyčnyja siadziby XIX stahodździa.
Razbureńnie kałon parkavaha porcika. Fota: vandrvm / Instagram
Kaliści heta była adnapaviarchovaja siadziba ź miezaninam i cokalnym paviercham, na jakim raźmiaščałasia kuchnia i słužby. Paradny ŭvachod byŭ vyłučany porcikam na čatyroch ianičnych kałonach, a parkavy fasad upryhožvaŭ paŭkruhły porcik na šaści daryčnych kałonach, jakija nieśli na sabie vialiki bałkon, kudy možna było vyjści ź miezanina.
U paślavajenny čas siadzibny dom zajmała kantora saŭhasa, zatym — kłub. U 1970-ja hady budynak byŭ zakinuty i staŭ imkliva razburacca. Da našaha času zachavalisia tolki ruiny ścien siadziby i dva jaje porciki. Adzin z praścienkaŭ ściany za parkavym porcikam daŭno razburyŭsia i fasad šmat hadoŭ litaralna visieŭ u pavietry, straciła nižniuju častku i adna z kałon porcika.
Parkavy fasad siadziby ŭ Dzikuškach paśla razbureńnia. Fota: storys ź instahrama
Niahledziačy na niebiaśpiečnuju avaryjnaść, žyvapisnyja ruiny pryciahvali turystaŭ z usioj krainy. Atmaśfiernaści dadavała i vialikaja buślanka, jakuju ptuški zmajstravali na viaršyni frantona.
Siońnia ściana na vytrymała i abvaliłasia, razburyŭšy taksama bolšuju častku kałonnaha porcika.
Parkavy fasad siadziby ŭ Dzikuškach da i paśla razbureńnia. Fota: storys ź instahrama
Jak źviartajuć uvahu aktyvisty, u 2022 hodzie jany, paśla taho, jak abvaliłasia častka kaścioła ŭ Ziembinie, źviartalisia ŭ Lidski rajvykankam z prapanovaj pravieści prostyja kansiervacyjnyja raboty na siadzibie ŭ Dzikuškach: zakłaści cehłaj prajomy i stračany praścienak, kab źbierahčy pomnik architektury ad razbureńnia, takoha, jakoje adbyłosia siońnia.
Aktyvisty atrymali vielmi dziŭny adkaz, padpisany namieśnikam staršyni Andrejem Kaŭryham, u jakim śćviardžałasia, što prapanavany varyjant kansiervacyi fasada nie maje prava na isnavańnie, bo «moža nanieści jašče bolšy ŭron kulturnaj kaštoŭnaści».
Abiacanaje ŭ adkazie nadańnie siadzibie Miniejkaŭ statusu historyka-kulturnaj kaštoŭnaści taksama nie było vykanana dahetul.