U Biełaruś usio ž pryjedzie prezident Irana
Pradstaŭnik iranskaha parłamienta Alijashar Bahierzade padčas vizitu na čale delehacyi ŭ Biełaruś sustreŭsia z kiraŭnicaj Savieta Respubliki Natallaj Kačanavaj i anansavaŭ chutki vizit u Minsk prezidenta Irana Masuda Piezieškijana, piša sb.by.
Masud Piezieškijan. Fota: Vahid Salemi / AP
Bahierzade paviedamiŭ, što ŭ chutkim časie čakajecca vizit u Minsk prezidenta Irana Masuda Piezieškijana. Heta, pa jaho słovach, stanie pavarotnym momantam dla adnosin pamiž krainami i paspryjaje realizacyi roznych prajektaŭ.
Raniej Masud Piezieškijan źbiraŭsia naviedać Biełaruś u kancy červienia, ale abvastreńnie kanfliktu pamiž Iranam i Izrailem zmusiła jaho admianić vizit. Pra namier Masuda Piezieškijana pryjechać u Minsk paviedamili litaralna za niekalki dzion da pačatku izrailskaj apieracyi suprać Irana. Pry hetym paviedamlałasia, što akramia ŭdziełu ŭ mierapryjemstvach JEAES i supravadžajučym jaho ekanamičnym forumie, vizit prezidenta Irana budzie mieć taksama aficyjny charaktar.
Asobna padčas sustrečy Alijashara Bahierzade z Natallaj Kačanavaj zakranałasia tema humanitarnaha supracoŭnictva pamiž krainami: abmien studentami, sumiesnyja navukovyja prajekty i mahčymaść naładžvańnia pramych avijarejsaŭ pamiž Iranam i Biełaruśsiu.
Taksama paviedamlajecca, što tavaraabarot pamiž krainami vyras na 14,2%.
Čytajcie taksama:
Prezident Irana byŭ paranieny padčas izrailskich udaraŭ