Kaho pryznali najlepšymi mastakami Biełarusi 2025 hoda? Voś jak vyhladajuć ich tvory

Mikita Monič padrychtavaŭ ahlad prac, jakija pieramahli na vystavie «Art-Minsk-2025».

Fota: artcenter.by / Instagram

Vystava sučasnaha mastactva «Art-Minsk» prachodzić štohod viasnoj. U im udzielničajuć sotni tvorcaŭ. Kožny z adabranych vystaŭlaje 2-3 tvory. Naviedvalniki hałasujuć. I tak adbirajucca pieramožcy.

U novym videa na svaim jutub-kanale Mikita Monič raskazaŭ pra pieramožcaŭ u katehoryi «Žyvapis» i ich tvory.

View this post on Instagram

A post shared by OFISTON CREATION (@officeton_creation)

Pieršaje miesca hledačy addali Alesi Skarabahataj. I heta, pa słovach Moniča, nie dziŭna.

«Biełaruskaja publika — heta jak San-Maryna. Alesia Michajłaŭna — naša Italija. Akramia svajoj zvyšrealistyčnaj techniki, spadarynia Skarabahataja biespamyłkova sfarmulavała recept tvora mastactva, što padabajecca biełaruskamu hledaču. Heta pavinien być kruhły farmat pałatna. Tam pavinna štości smačnaje, pradmiet posudu i jaki-niebudź miły źviarok. Tvor maje być padobnym i na niderłandski naciurmort 17 stahodździa i na sučasnuju fud-fatahrafiju».

Alesia Skrabahataja. Apošni inhredyjent. 2025. Krynica: artcenter.by

Pa słovach Moniča, hety śpis jon sfarmulavaŭ jašče da taho, jak staŭ šukać tvory-pieramožcy hetaha hoda, bo daŭno znajomy z tvorčaściu Skarabahataj. Ale, jak jon iranizuje, tvor-pieramožca — karcina «Apošni inhredyjent» nie całkam adpaviadaje «receptu».

«Viadoma, jość tyja, chto ličyć, što muchamory — hryby jadomyja. Ale lepiej nie treba», — davodzić mastactvaznaŭca.

Aleś Bahdanaŭ. Pieršaje spatkańnie. 2025. Krynica: artcenter.by

Druhoje miesca ŭ hety hodzie hledačy prysudzili tvoram Alesia Bahdanava. Monič źviartaje ŭvahu na karcinu mastaka «Pieršaje spatkańnie»:

«Mnie padałosia, što heta historyja pra ich kachańnie z Alesiaj Skarabahataj. Tak! Siarod pieramožcaŭ u katehoryi «Žyvapis» 40% z adnoj siamji». Pa jaho słovach, muža i žonku jadnaje luboŭ da realizmu ŭ žyvapisie, kulinarny dy kruhły farmaty.

Hanna Sadoŭskaja. Chałodny bierah. 2025. Krynica: artcenter.by

Siarod pieramožcaŭ taksama piejzažy Hanny Sadoŭskaj «Chałodny bierah» i «Zimovaja kazka».

Hanna Sadoŭskaja. Zimovaja kazka. 2025. Krynica: artcenter.by

Jak ličyć Monič, hetyja tvory nie vyznačajucca svajoj aryhinalnaściu. Heta «dychtoŭnyja, dobra zroblenyja piejzažy rodnaj staronki. Jany byccam školnyja sačynieńni-vydatniki. Usio pa temie, łahična, pravilna. Nul pamyłak, nul pamarak. Tolki ja nie razumieju, navošta na ich hladzieć bolš za adzin raz».

Taćciana Čarnych. Palavy bukiet. 2024. Krynica: artcenter.by

U styli prostaha i jakasnaha adlustravańnia pryrody pracuje i nastupnaja pieramožca konkursu — Taćciana Čarnych (Archipava).

Taćciana Čarnych. Daroha ŭ lesie. 2025. Krynica: artcenter.by

«Jana maluje kvietki. Vialiki bukiet u hlinianym zbanie ci kvitniejučyja kusty na fonie amal što žukoŭskaha lesu», — adzinaje, što zmoh skazać Monič pra tvory mastački.

Apošniaj pieramožcaj u katehoryi «Žyvapis» stała Elmira Muchtarava.

Pa słovach Moniča, u jaje tvorach «idealnaje adlustravańnie instahram-estetyki plus vajbu cytataŭ z pacanskich pablikaŭ Ukantakcie».

Elmira Muchtarava. Ujaŭnaja rečaisnaść. 2025. Krynica: artcenter.by

Mastactvaznaŭca źviartaje ŭvahu na adno z pałotnaŭ mastački — «Ujaŭnaja rečaisnaść»:

«Tam kity laciać siarod lesu. Mnie adrazu zhadaŭsia łatvijski multfilm Flow, ale bolš jarka zhadvajecca frahmient z kinastužki «Aŭtaspynam pa Hałaktycy».

Druhi tvor, jaki mastačka prezientavała na «Art-Minsku», jana nazvała «Na ziamli jak na niabiosach».

«Ja lublu pafas, ščyra. Ale ž nie taki. Znoŭku zhadvajecca frahmient pra kita. Prykładna ŭ takija hory jon i ŭpaŭ», — sarkastyčna zaŭvažaje Monič.

Elmira Muchtarava. Na ziamli jak na nabiosach. 2025. Krynica: artcenter.by

Mastactvaznaŭca tłumačyć, što zvyčajna farmuloŭka pra padabienstva ziamli i niabiosaŭ adlustroŭvajecca ŭ žyvapisie tym, što architekturnaja azdableńnie raju supadaje ci prosta padobnaje na tyja formy, što adlustroŭvajuć ideju carkvy na ziamli.

«To-bok carkva — madel hrada niabiesnaha»

I ŭ jakaści prykładu jon pryvodzić tvor «Krynica lubaty» (1430-1450 hh.) nieviadomaha mastaka z majsterni Jana van Ejka.

Monič źviartaje ŭvahu, što pieramožcami hetaha hoda stali čatyry žančyny i adzin mužčyna, jakija adnačasova i muž adnoj ź ich:

«Ja zaŭsiody kazaŭ, što ŭ sučasnym vyjaŭlenčym mastactvie Biełarusi daminujuć žančyny».

Kamientary da artykuła