Rasii zastałosia niekalki krokaŭ da poŭnaha akružeńnia Pakroŭska
Rasijskija vojski na froncie nabližajucca da horada Dabrapolle, jaki zastajecca apošnim bujnym nasielenym punktam pierad poŭnym akružeńniem Pakroŭska.
Fota: 118-ja bryhada
Jak piša The Telegraph, zachop Pakroŭska dapamoža rasijanam zabiaśpiečyć kantrol nad usioj Danieckaj vobłaściu, na jakuju Uładzimir Pucin pretenduje ŭ svaich maksimalisckich patrabavańniach.
Jak adznačaje vydańnie, rasijskija vojski faktyčna pierarezali klučavuju darohu, jakaja źjaŭlajecca žyćciova važnaj arteryjaj dla ŭkrainskaj abarony ŭ Pakroŭsku, atakami bieśpiłotnikaŭ i zasadnymi dziejańniami.
«Vykarystańnie aŭtamabila — praktyčna samahubstva», — raspavioŭ The Telegraph adzin z sałdat, dysłakavanych pablizu.
Kab dabracca da svaich pazicyj, sałdaty ciapier iduć pieššu, časam na adlehłaść da 20 kiłamietraŭ, ciahnučy za saboj ryštunak.
Na praciahu niekalkich miesiacaŭ rasijskija bieśpiłotniki celilisia ŭ pieramiaščeńni pa T-05-15, žyćciova važnaj łahistyčnaj arteryi, što zabiaśpiečvaje ŭkrainskija abaronnyja zbudavańni ŭ Pakroŭsku. Ale ŭ niadzielu zranku rasijskija vojski ŭčynili zasadu na ŭkrainskaje padraździaleńnie ŭ Rudzinskim, horadzie, praź jaki prachodzić daroha, i ciapier kantralujuć jaho.
«Niahledziačy na nievialikija pamiery, Rudzinskaje znachodzicca na krytyčnym pierakryžavańni, i kantrol nad im daje Rasii pramy dostup da darožnaj sietki, jakaja zabiaśpiečvaje apošnija abarončyja rubiažy Pakroŭska… Z strataju Rudzinskaha pierakryty jašče adzin klučavy pastavačny kalidor, u vyniku čaho va Ukrainy zastajecca praktyčna tolki adzin šlach z Pakroŭska».
Jak piša vydańnie, pavodle słoŭ ukrainskich sałdat, jakija znachodziacca ŭ hetym rajonie, rasijanie vykarystoŭvajuć taktyku, što nahadvaje niemcaŭ časoŭ Druhoj suśvietnaj vajny: vyjaŭlajuć słabyja miescy ŭ łahistycy, a potym pierarazajuć ich. Hety akcent na łahistycy pryvioŭ da žorstkich bajoŭ, što ciapier razharajucca vakoł Dabrapolla — jak u Pakroŭsku na poŭdni, tak i ŭ Kastancinaŭcy na ŭschodzie.
«Jak tolki ŭpadzie adno, upadzie i druhoje», — skazaŭ vydańniu adzin z sałdat.
Pastajannaja pahroza z boku bieśpiłotnikaŭ pieratvaryła navat zvyčajnyja vyłazki ŭ śmiarotnuju pastku, kažuć sałdaty.
«My stracim Pakroŭsk. Heta tolki pytańnie času», — kaža adzin ź ich.