U lipieni vypała amal u paŭtara razy bolej apadkaŭ, čym zvyčajna
Sinoptyki raskazali pra klimatyčnyja asablivaści lipienia, piša pogoda.by.
Fota: Blizko.by
Siaredniaja pa Biełarusi tempieratura pavietra za lipień skłała +19,8°S, što vyšej za klimatyčnuju normu na 0,9°S. Taki i bolš ciopły lipień zdarajecca prykładna raz na 7 hadoŭ.
Najbolšyja značeńni stanoŭčych adchileńniaŭ tempieratury pavietra ad klimatyčnaj normy adznačany ŭ Mahiloŭskaj i Viciebskaj abłaściach (+1,4°S i +1,3°S adpaviedna), u Bresckaj vobłaści adchileńni byli najmienšymi (+0,3°S).
Tempieratura pavietra ŭdzień na praciahu miesiaca ŭ asnoŭnym składała +23…+29°S, u asobnyja dni pavyšałasia da +30°S i vyšej.
Maksimalnaha značeńnia (+34,6°S) tempieratura pavietra dasiahnuła 3 lipienia na stancyi Brest.
Tempieratura pavietra ŭnačy ŭ asnoŭnym znachodziłasia ŭ miežach +11…+18°S, u samyja chałodnyja nočy nie pieravyšała 10°S.
Minimalnaja tempieratura pavietra adznačana na stancyi Paleskaja 6 lipienia i skłała +6,9°S.
Tym nie mienš u asobnyja sutki miescami pa krainie byli zarehistravany trapičnyja nočy (minimalnaja tempieratura pavietra za noč składała +20°S i bolš).
Za miesiac u siarednim pa krainie vypała 129 mm apadkaŭ, što skłała 144 % klimatyčnaj normy.
Lišak apadkaŭ adznačaŭsia na bolšaj častcy terytoryi krainy. Kolkaść apadkaŭ pieršaj dekady miesiaca była blizkaj da klimatyčnaj normy. U druhoj i asabliva ŭ treciaj dekadzie adznačałasia praźmiernaje ŭvilhatnieńnie: vypała 141 i 188 % dekadnaj normy adpaviedna.
Na praciahu miesiaca adznačałasia ad 8 da 18 daždžlivych dzion (dzion z sumaj apadkaŭ za sutki 1 mm i bolš) pry normie 9—11 dzion.
Na praciahu miesiaca pa terytoryi krainy naziralisia tumany, navalnicy, adznačałasia vypadzieńnie hradu dyjamietram da 9 mm (Pinsk).
Daždžy ŭ asnoŭnym nasili liŭnievy charaktar, u asobnyja dni miesiaca dasiahali kryteryju niebiaśpiečnaj hidramietearałahičnaj źjavy: vielmi mocny doždž — da 94 mm (Malevickaja Rudnia) i vielmi mocnaja zaleva — da 39,5 mm (Bierazino).
U asobnych rajonach adznačałasia ŭzmacnieńnie chutkaści vietru paryvami da 15 m/s i bolš, miescami dasiahała kryteryju niebiaśpiečnaj hidramietearałahičnaj źjavy (25 m/s i bolš). Maksimalnaja chutkaść vietru za miesiac zarehistravana na stancyi Mahiloŭ 10 lipienia (26 m/s).