«Heta paklop!» Miełanija Tramp źbirajecca ŭ sud suprać Chantera Bajdena ź iskam na $1 młrd
Miełanija Tramp abvinavaciła Chantera Bajdena ŭ raspaŭsiudžvańni paklopu i pryhraziła padać na jaho ŭ sud na sumu bolš za 1 młrd dołaraŭ. Pryčynaj staŭ jahonaje intervju, dzie jon zajaviŭ, što z budučym mužam Donaldam Trampam Miełaniju paznajomiŭ finansist Džiefry Epštejn.
Donald Tramp razam ź Miełanijaj, 12 sakavika 1999 hoda. Fota: John Keating / Newsday RM via Getty Images
Epštejn, viadomy suviaziami z zornymi asobami i abvinavačany ŭ złačynstvach sieksualnaha charaktaru, skončyŭ žyćcio samahubstvam u turmie ŭ 2019 hodzie. Donald Tramp pryznavaŭ, što byŭ jaho siabram, ale śćviardžaŭ, što jany pasvarylisia ŭ pačatku 2000-ch.
Advakaty Miełanii ŭ aficyjnym liście, apublikavanym Fox News, nazvali słovy Bajdena «iłžyvymi, paklopnickimi i pravakacyjnymi» i zapatrabavali ich publičnaha abviaržeńnia i prabačeńnia. Pavodle ich, hetyja vykazvańni nanieśli pieršaj łedzi «vializnuju finansavuju i reputacyjnuju škodu».
U liście taksama adznačajecca, što Bajden spasyłaŭsia na artykuł žurnalista Majkła Vułfa, jaki ŭžo byŭ vydaleny z The Daily Beast paśla skarhi jurystaŭ Miełanii i publičnych prabačeńniaŭ redakcyi. Na siońnia niama nijakich dokazaŭ, što Miełaniju i Trampa paznajomiŭ Epštejn. Pavodle Harper's Bazaar, ich sustreča adbyłasia ŭ listapadzie 1998 hoda na viečarynie, arhanizavanaj uładalnikam madelnaha ahienctva.
Situacyja razharnułasia na fonie palityčnaha cisku na Bieły dom z patrabavańniem apublikavać tak zvanyja «dakumienty Epštejna». Raniej Tramp abiacaŭ heta zrabić u vypadku viartańnia na pasadu prezidenta, ale ŭ lipieni 2025 hoda FBR i Miniust ZŠA zajavili, što nie isnuje nijakaha kampramatnaha «śpisu klijentaŭ» finansista.