Lidary ES zajavili pra hatoŭnaść padtrymlivać Ukrainu i pracavać z Trampam

Jeŭrapiejskija lidary zajavili pra hatoŭnaść praciahvać padtrymlivać Ukrainu dla dasiahnieńnia «spraviadlivaha i tryvałaha miru». Pra heta havorycca ŭ sumiesnaj zajavie lidaraŭ jeŭrapiejskich krain, ES i Vialikabrytanii.

Fota: AP

«My poŭnyja rašučaści aktyvizavać namahańni dla ŭmacavańnia Ukrainy, kab pakłaści kaniec bajavym dziejańniam i dasiahnuć spraviadlivaha i tryvałaha miru», — zajavili palityki.

Jany dadali, što Ukraina pavinna atrymać «niepachisnyja harantyi biaśpieki» i mieć prava na ŭstupleńnie ŭ ES i NATA, a na USU nie pavinny nakładvacca abmiežavańni.

Pry hetym jeŭrapiejskija lidary vitali namahańni prezidenta ZŠA Donalda Trampa pa zaviaršeńni vajny va Ukrainie.

«My taksama hatovyja pracavać z prezidentami Trampam i Zialenskim nad padrychtoŭkaj trochbakovaha samitu pry padtrymcy Jeŭropy», — adznačyli palityki.

Pad zajavaj stajać podpisy prezidenta Francyi Emanuela Makrona, premjer-ministra Italii Džordžy Miełoni, kanclera FRH Frydrycha Mierca, premjer-ministra Vialikabrytanii Kira Starmiera, prezidenta Finlandyi Alaksandra Stuba, premjer-ministra Polščy Donalda Tuska, kiraŭnika Jeŭrapiejskaj rady Antoniu Košty i staršyni Jeŭrakamisii Ursuły fon der Lajen.

Uładzimir Zialenski taksama mieŭ razmovu siońnia ranicaj ź lidarami ES.

«Pazicyi vidavočnyja. Treba dasiahnuć realnaha miru, jaki budzie doŭhim, a nie stanie jašče adnoj paŭzaj pamiž rasijskimi ŭvarvańniami. Treba jak maha chutčej spynić zabojstvy, spynić ahoń jak na poli boju, tak i ŭ niebie i suprać našaj partovaj infrastruktury. Treba vyzvalić usich ukrainskich pałonnych vajskoŭcaŭ i cyvilnych i viarnuć vykradzienych Rasijaj dziaciej. Tysiačy našych ludziej dahetul utrymlivajucca ŭ niavoli, ich usich treba viarnuć dadomu. Treba zachoŭvać cisk na Rasiju, pakul praciahvajucca ahresija i akupacyja», — napisaŭ Uładzimir Zialenski ŭ svaim telehram-kanale.

Kamientary da artykuła