U Minsku Daŭhinaŭski trakt złučać z praśpiektam Mašerava KARTA
Pracy zakranuć Staravilenski trakt i tramvajnaje kalco na im.
Staravilenski trakt złučyć Daŭhinaŭski trakt z praśpiektam Mašerava. Fota: Wikimedia Commons
Pra źmieny ŭ darožnaj sietcy stalicy ŭ intervju vydańniu «Minsk-Naviny» raskazaŭ dyrektar «Hardarbuda» Siarhiej Panioŭ.
«Daŭhinaŭski trakt praciahnuć da praśpiekta Mašerava. Prajekt budzie realizavany ŭ try etapy: vynas tramvajnych puciej sa stvareńniem časovaha razvarotnaha kolca, pašyreńnie ŭčastka pa najaŭnych tramvajnych puciach, a potym užo finalny ŭčastak — heta samo skryžavańnie vulicy Arłoŭskaj z Daŭhinaŭskim traktam. Budzie pravodzicca znos jak pryvatnaj zabudovy, tak i administracyjnych budynkaŭ», — patłumačyŭ Panioŭ.
Pa słovach dyrektara, prajektnaja dakumientacyja maje vysokuju stupień hatoŭnaści. Miarkujecca, što da kanca 2025 hoda źjavicca jaje kančatkovaja viersija.
Da pieršaj i druhoj čarhi pavinny prystupić užo ŭ vieraśni-kastryčniku 2025 hoda, a znosam i vyzvaleńniem terytoryi dla praciahu Daŭhinaŭskaha trakta zojmucca ŭ pačatku 2026 hoda.
Pa hienpłanie Minska Daŭhinaŭski trakt budzie złučany z praśpiektam Mašerava praz Staravilenski trakt. Vulica Čarviakova stanie ŭnutrykvartalnaj darohaj. Frahmient prajekt hienpłana 2025 hoda
Miarkujučy pa novym hienpłanie Minska, vyniesienym ciapier na abmierkavańnie, pasažyrapatok z hałoŭnaj i faktyčna adzinaj mahistrali na poŭnačy stalicy, jakaja intensiŭna abrastaje novymi žyłymi rajonami, płanujuć pieranakiravać na rekanstrujavany i pašyrany Staravilenski trakt, što złučajecca z praśpiektam Mašerava.
Siońnia praciaham Daŭhinaŭskaha trakta źjaŭlajecca vulica Čarviakova, jakaja prachodzić praz kvartały kapitalnaj zabudovy roznych pieryjadaŭ i tamu ŭ niekatorych miescach zanadta vuzkaja, kab być pašyranaj. Akramia taho, jana nie dachodzić da praśpiekta Mašerava, upirajučysia ŭ vulicu Viery Charužaj, što stvaraje prablemy dla transpartu.