Mikoła Dziadok: Varyjant zastacca ŭ turmie nie razhladaŭ

Vyzvaleny 11 vieraśnia palitviazień Mikoła Dziadok adrazu paśla pryjezdu ŭ Vilniu daŭ karotkaje intervju «Biełsatu», u jakim raskazaŭ, ci hatovy byŭ pajści za prykładam Mikoły Statkieviča i admovicca ad vyzvaleńnia, kali jano źviazanaje z prymusovaj departacyjaj.

Mikoła Dziadok paśla vyzvaleńnia. Fota: skrynšot ź videa

Dziadok adznačyŭ, što ŭsie hetyja hady jaho padtrymlivała viera ŭ Boha i «va ŭłasnuju racyju».

«Ja płanuju budučyniu źviazać ź Biełaruśsiu, ja praciahnu zmahacca za praŭdu, za spraviadlivaść, u hetym majo žyćcio, i ja nie baču sensu adstupać.

Što da taho, kab zastacca ŭ Biełarusi, to ja ŭ hetym płanie realist, i ja razumieju, što dla mianie zastacca ŭ Biełarusi — heta toje ž samaje, što zastacca ŭ turmie. Ci šmat ja karyści pryniasu tam, siedziačy? Ja tak nie dumaju. Tamu ja, pa ščyraści, taki varyjant nie razhladaŭ. Vykinuli i vykinuli, budziem niešta rabić u takoj situacyi — nie my pieršyja, nie my apošnija», — skazaŭ jon.

37-hadovy Mikałaj Dziadok u 2010 hodzie byŭ zatrymany pa niekalkich spravach, źviazanych z akcyjami anarchistaŭ. U 2011 hodzie asudžany na 4,5 hoda kałonii, paźniej atrymaŭ jašče hod pa artykułu 411 KK RB. U turmie nieadnarazova padviarhaŭsia cisku, admaŭlaŭsia prasić pamiłavańnia. Byŭ pryznany palitviaźniem, jaho padtrymlivali jeŭrapiejskija palityki. U 2015 hodzie pamiłavany razam ź inšymi palitviaźniami.

Paśla vyzvaleńnia skončyŭ EHU, pracavaŭ žurnalistam (hazieta «Novy Čas» i inšyja), vioŭ błohi i videakanał, napisaŭ niekalki knih. Nieadnarazova zatrymlivaŭsia i štrafavaŭsia za ŭdzieł u akcyjach i publikacyi ŭ sacsietkach, jaho pieraśledvali za «ekstremizm».

Paśla pačatku pratestaŭ 2020 hoda zastavaŭsia ŭ Biełarusi i praciahvaŭ vieści kanał na hramadska-palityčnuju tematyku. Zatrymali jaho 11 listapada 2020 hoda. 10 listapada 2021 hoda Minski haradski sud pryhavaryŭ anarchista da 5 hadoŭ kałonii. Jaho pryznali vinavatym pa troch artykułach: zakliki da dziejańniaŭ suprać nacbiaśpieki Biełarusi (častka 3 artykuła 361 KK), udzieł u hrubym parušeńni paradku (častka 1 artykuła 342 KK) i niezakonnyja dziejańni ŭ dačynieńni da haručych rečyvaŭ (Častka 1 artykuła 295-3). 

Sioleta 4 krasavika jon pavinien byŭ vyjści na volu, ale zamiest hetaha byŭ pieraviedzieny ŭ SIZA №1 u miežach novaj kryminalnaj spravy pa artykule 411 — za «złosnaje niepadparadkavańnie patrabavańniam administracyi kałonii».

Kamientary da artykuła