Adna ź lidarak apazicyi Hruzii zatrymanaja za nadpis «Rasijskaja mara» na pieradvybarčym baniery kiroŭnaj partyi
Elene Chaštaryja zrabiła nadpis u znak pratestu suprać kryminalnaha pieraśledu za anałahičny ŭčynak 23‑hadovaj aktyvistki apazicyi Miehi Dyasamidze.
Skrynšot videa Prime Time
Lidarka partyi «Droa» i apazicyjnaha abjadnańnia «Kaalicyja za pieramieny» Elene Chaštaryja była zatrymanaja za nadpis «Rasijskaja mara» na pieradvybarčym baniery kandydata ŭ mery Tbilisi ad kiroŭnaj partyi «Hruzinskaja mara» Kachi Kaładze, piša Bi-bi-si.
Elene Chaštaryja zrabiła nadpis u znak pratestu suprać kryminalnaha pieraśledu za anałahičny ŭčynak 23‑hadovaj aktyvistki apazicyi Miehi Dyasamidze.
U MUS Hruzii paviedamlajuć, što Chaštaryja zatrymanaja za toje, što 14 vieraśnia paškodziła baniery kandydata ŭ mery Tbilisi ad kirujučaj partyi «Hruzinskaja mara». Śledstva viadziecca pa artykule Kryminalnaha kodeksu Hruzii ab paškodžańni abo źniščeńni čužoj majomaści.
Skrynšot videa 93,5 FM
Na videa, jakija napiaredadni raspaŭsiudziła sama Chaštaryja na svajoj staroncy ŭ fejsbuku, vidać, jak jana markieram nanosić na pieradvybarčy banier z vyjavaj Kachi Kaładze nadpis «Rasijskaja mara». Tak krytyki ŭłady nazyvajuć kirujučuju partyju, abvinavačvajučy jaje ŭ słužeńni intaresam Kramla i źmienie prazachodniaha kursu Hruzii na prarasijski.
Chaštaryja taksama apublikavała na svajoj staroncy fatahrafiju pieradvybarčaha baniera Kaładze z nadpisam «Ruski», zajaviŭšy pry hetym pra salidarnaść z aktyvistkaj apazicyi Miehi Dzijasamidze.
Dzijasamidze była zatrymanaja pa abvinavačvańni ŭ paškodžańni pieradvybarčaha baniera kala niadaŭna adkrytaha pieradvybarčaha štaba kirujučaj partyi 10 vieraśnia. Dziaŭčynu paźniej vyzvalili z zały suda pad zakład, ale jana ŭsio jašče znachodzicca ŭ statusie abvinavačvanaj pa kryminalnaj spravie.
Terytoryja kala raźmieščanaha ŭ centry Tbilisi pieradvybarčaha štaba Kachi Kaładze — mera i kandydata ad kiroŭnaj partyi na pieravybary meram stalicy, stała novym ačahom antyŭradavych pratestaŭ, jakija nie ścichajuć u Hruzii ŭžo dziasiaty miesiac.
8 vieraśnia tut adbyłasia bojka pamiž praciŭnikami i prychilnikami «Hruzinskaj mary», u vyniku jakoj paciarpieli niekalki demanstrantaŭ. Pratestoŭcy abvinavacili palicyju ŭ tym, što jana biaździejničała, kali na ich i žurnalistaŭ napali prychilniki «Hruzinskaj mary».
Paźniej palicyja zatrymała dvuch prychilnikaŭ kirujučaj partyi, ale ŭžo praz dva dni abviaściła, što abodva zatrymanyja vyzvalenyja i nie buduć pryciahnutyja da adkaznaści.
Abvinavačańnie Chaštaryja aficyjna pakul nie vystaŭlena. U liście ź izalatara jana zaklikała svaich prychilnikaŭ nie zdavacca.
«Addanaść praŭdzie zrobić nas pieramožcami na hetym šlachu. Adpaviedna, kali jany prydumali, što nadpis na baniery — heta złačynstva, dyk tak, my pavinny pakazać, što nie padparadkoŭvajemsia ich prydumanamu biezzakońniu. Druhoje, na čym hruntujecca naša baraćba — heta salidarnaść. Kožny hramadzianin, kožny aktyvist, kožny zmahar pavinien viedać, što my nie pakiniem ich sam-nasam ź sistemaj», — napisała Chaštaryja ŭ liście, jaki raspaŭsiudziła partyja «Droa».
Advakat Chaštaryja Šota Tutbierydze zajaviŭ, što ŭ jaje dziejańniach niama prykmiet złačynstva. Bolš za toje, na jaho dumku, tut niama navat administracyjnaha pravaparušeńnia, bo havorka idzie pra akt, ździejśnieny ŭ miežach svabody palityčnaha vykazvańnia.
Advakat kaža, što Chaštaryja nie naniesła nijakaj škody, a nadpis, jaki jana pakinuła, lohka možna było ścierci za niekalki chvilin.