Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony
«Našaj Nivie» stali viadomy niekatoryja detali razhladu «małočnaj spravy», jakaja razharnułasia vakoł byłoha ministra sielskaj haspadarki i pamočnika Alaksandra Łukašenki pa Viciebskaj vobłaści Ihara Bryło.
Ihar Bryło. Skrynšot ź videa
U Minsku praciahvajecca razhlad «małočnaj spravy», fihurantami jakoj stali 18 čałaviek.
U centry historyi — sponsar pieršaj prezidenckaj kampanii Łukašenki Hienadź Skitaŭ (Elkind), a taksama ministr sielskaj haspadarki i pamočnik Łukašenki Ihar Bryło.
Pieršapačatkova, pavodle KDB, padazravanych było 26 čałaviek, ale na łavie padsudnych apynulisia tolki 18 ź ich. Ich abvinavačvajuć pa 12 kryminalnych artykułach.
Jak stała viadoma «Našaj Nivie», abvinavačvańnie ŭ asnoŭnym hruntujecca na pryznalnych pakazańniach Ihara Bryło, u toj čas jak bolšaść inšych fihurantaŭ admaŭlajuć svaju vinu.
Raniej «Naša Niva» paviedamlała, što Bryło, pa słovach znajomych z chodam spravy, trapiŭšy ŭ składanyja žyćciovyja abstaviny, u chodzie śledstva staŭ «biespardonna hruzić siabie i inšych».
«Narod z usioj krainy jeździć na dopyty, kab vysłuchać i dezavujavać to adnu historyju, to inšuju», — kazali nam.
Čytajcie taksama: «Hruzić siabie i inšych»: były pamočnik Łukašenki Ihar Bryło biare na siabie vinu ŭ pramysłovych abjomach
«Bryło pryznaŭ, uspomniŭ, prydumaŭ — nazyvajcie heta jak chočacie — chabaraŭ na $2 miljony. Vakoł hetaj ličby i krucicca abvinavačvańnie. Kaho jon nazvaŭ — tych i chapali», — paviedamiŭ «Našaj Nivie» infarmavany surazmoŭca.
Pa «Małočnaj spravie» prachodziać 18 čałaviek. Siarod ich, u tym liku, brat Hienadzia Skitava, Siarhiej Elkind (jon zachavaŭ proźvišča baćki, u toj čas jak Hienadź źmianiŭ habrejskaje na bolš, pa jaho mierkavańni, miłahučnaje proźvišča maci — Skitaŭ), jaki nie mieŭ dačynieńnia da małočnaha biznesu, ale taksama siarod abvinavačanych.
Surazmoŭca «Našaj Nivy» pryvodzić prykład taho, jak jon staŭ fihurantam spravy.
Ihar Bryło
«Bryło «ŭspomniŭ», što atrymlivaŭ $5 tysiač ad Skitava. Sam ža Skitaŭ śćviardžaje, što hetyja hrošy jon daryŭ Bryło na dzień naradžeńnia ŭ jakaści padarunka i pry śviedkach. A śledstva ličyć, što heta byŭ chabar pad vyhladam padarunka na dzień naradžeńnia», — paviedamiŭ surazmoŭca.
51‑hadovy Ihar Bryło naradziŭsia ŭ Barysavie, jak i Hienadź Skitaŭ (Elkind). Karjera Bryło pačynałasia tam. U stalicu jaho zabrali z pazicyi namieśnika staršyni Barysaŭskaha rajvykankama pa sielskaj haspadarcy. Barysaŭski rajon značny jak pa kolkaści bujnych sielhaspradpryjemstvaŭ, tak i svaimi pierapracoŭčymi vytvorčaściami.
Surazmoŭcy «Našaj Nivy» ŭ Barysavie ŭspaminali: kali Skitaŭ kiravaŭ Barysaŭskim miasakambinatam, Bryło byŭ jahonym padnačalenym. Jon pracavaŭ tam vieterynaram paśla zakančeńnia Viciebskaj vieterynarnaj akademii. Hetaja infarmacyja paćviardžajecca vypiskami z baz «Biełpoła».
Z hetaj pazicyi Bryło atrymaŭ pavyšeńnie ŭ hałoŭnyja vieterynary rajona (2004—2006), potym — u rajvykankam (2011—2013), potym — u Ministerstva sielskaj haspadarki pieršym namieśnikam (2013—2021). U lutym 2022‑ha jon staŭ ministram sielskaj haspadarki.