Prarasijski błok razhromna prajhraje vybary ŭ Małdovie
U Małdovie 28 vieraśnia prachodziać vybary ŭ parłamient. Jany vyznačać, ci budzie kraina pa-raniejšamu prytrymlivacca prajeŭrapiejskaha kursu.
Były prezident Małdovy Ihar Dadon, adzin ź lidaraŭ Patryjatyčnaha błoku. 28 vieraśnia 2025 hoda. Fota: AP Photo/Aurel Obreja
Pa vyniku padliku 83% pratakołaŭ prarasijski Patryjatyčny błok nabiraje tolki 27% hałasoŭ. Hetaja ličba jašče źnizicca ŭ kančatkovych vynikach, bo najpaźniej padličvajuć pratakoły ŭ vializnaj jeŭrapiejskaj dyjaspary, jakaja tradycyjna hałasuje za prajeŭrapiejskija partyi, a taksama ŭ stalicy ź jaje vialikimi ŭčastkami, dzie prarasijskija partyi taksama nabirajuć mienš.
Kiraŭničaja Partyja dziejańnia i salidarnaści (PAS) nabiraje 44% hałasoŭ.
Miarkujučy pa ŭsim, PAS budzie abo kiravać adnaasobna, abo budzie zmušanaja ŭtvaryć kaalicyju z adnoj ź mienšych partyj, jakija padtrymlivajuć jeŭraintehracyju i vystupajuć suprać Dadona. Imi mohuć być abo pravaja PPDA, za jakuju hałasuje rumynskamoŭnaja pravincyja, abo papulisckaja «Naša partyja» — kali jany projduć u parłamient u kančatkovym rachunku.
Napiaredadni vybaraŭ ad udziełu ŭ ich byli adchileny dźvie prarasijskija partyi — «Vialikaja Małdova» (Moldova Mare), jakoj kiruje Viktoryja Furtune, i «Serca Małdovy».