«Zrazumieła, što takoje być darosłaj». Prahramistka pierajechała ŭ Łos-Andželes z EPAM i syšła ŭ Disney
«Ružovyja akulary», šlach u minułaje i niedachop šeraści za aknom: pra pierajezd z Minska ŭ Łos-Andželes, žyćcio i pracu ŭ Kalifornii raspaviadaje Devby.io Julija Hałuza, Senior Software Engineer u The Walt Disney Company.
Tut i dalej foty Julii ź jaje instahrama
«Za heta, kaniečnie, dziakuj EPAM»
Jak i bolšaść dziaciej, baćki jakich mierkavali, što niedzie dakładna lepš, čym doma, ja jašče sa škoły maryła pierajechać u ZŠA. Zrešty, z časam pryjšło razumieńnie, što heta ŭsio ž nie maje mary. I ja pačała šukać svajo miesca. Šmat padarožničała, i ŭ Minsku mnie zaŭsiody było jak byccam ciesna. A ŭ 2020 hodzie tak atrymałasia, što Minsk pierastaŭ być dla mianie ciesnym. Narešcie palubiła jaho jak dom.
Ale ŭ hetym ža 2020 hodzie adbylisia tyja samyja vybary, pratesty, źjaviłasia milicyja, jakaja patruluje tvoj rajon i chodzić pad voknami kožnyja paŭhadziny. Kali tabie 20 ź nievialikim, u padobnaj situacyi ŭ tabie viruje žudasnaje pačućcio niespraviadlivaści z-za ŭsiaho, što adbyvajecca. Ahidna žyć u takim miescy.
Ja pierajazdžała ŭ ZŠA jak Senior Software Engineer u EPAM. Vybar byŭ pamiž Niderłandami i ZŠA, i ja vybrała ZŠA, bo hety varyjant lepš vyhladaŭ z punktu hledžańnia mahčymaści atrymańnia dośviedu. Tut u razy bolš bujnych kampanij, i dośvied u Štatach cenicca bolš. Napačatku płan byŭ taki: u ZŠA na paru hadoŭ, nabracca dośviedu, a potym — u Niderłandy, dzie chočacca žyć na samoj spravie.
Praces lehalizacyi dla mianie byŭ davoli prostym. Za heta, kaniečnie, dziakuj EPAM: kampanija biare heta na siabie. Ty zaŭsiody viedaješ, čaho čakać na kožnym kroku. Na dadzieny momant u mianie ŭžo jość hryn karta.
Samym składanym było čakańnie. Tamu što praces atrymańnia hryn karty moža doŭžycca jak dva hady, tak i čatyry. I pakul čakaješ, nie možaš ni pierajechać, ni źmianić asnoŭnuju pracu.
Zrešty, kali vielmi zachacieć, to źmianić pracu možna. U mianie ŭ vyniku tak i atrymałasia — pierajšła ŭ Disney (u EPAM ja 5 hadoŭ pracavała nad tym ža prajektam dla Disney) u pracesie čakańnia hryn karty. Ale mnohija advakaty nie rajać tak rabić, mohuć uźniknuć uskładnieńni.
Z astatnimi biurakratyčnymi pracedurami spravy išli praściej. Miedstrachoŭku robić kampanija, mnie treba było tolki razabracca ŭ varyjantach. Kali ščyra, tolki na piaty hod žyćcia tut ja, narešcie, razumieju, jakaja miedstrachoŭka dakładna mnie patrebna i jak jany ŭsie pracujuć na samaj spravie.
Adkryć rachunak u banku, atrymać amierykanskija pravy — heta ŭsio supier prosta, ale čamuści ŭsio roŭna zajmaje minimum hadzinu času. I paasobku byccam usio lohka, ale razam i adrazu hetaja biurakratyja davałasia dosyć ciažka. U niejki momant chaciełasia, kab chto-niebudź zrabiŭ usio heta zamiest mianie.
«Dumała, što pierajazdžaju ŭ budučyniu, a pierajechała ŭ minułaje»
Z adaptacyjaj na pracy ŭsio było prosta. Ja pierajechała na toj ža prajekt, i ŭsie pa-raniejšamu pracavali z doma i bačylisia tolki ŭ zumie.
A voś adaptacyja na novym miescy była nie nadta lohkaj. Adny pošuki kvatery čaho vartyja. U mianie byŭ usiaho miesiac, i bolšuju jaho častku ja praviała ŭ šoku ad taho, jak ludzi tut žyvuć biez narmalnych padłoh i plitak u vannaj. Jany jość, ale daloka nie ŭsiudy.
Zrešty, u astatnim uvieś pieršy hod u Kalifornii prajšoŭ pad znakam zachapleńnia ad novaha miesca, novaha žyćcia, novych mahčymaściaŭ. Sapraŭdnaja adaptacyja pačałasia ŭžo paśla taho, jak z vačej źnialisia ružovyja akulary i ja pačała ŭśviedamlać, što i praŭda žyvu tut, a nie časova tusujusia.
Dumała, što pierajazdžaju ŭ budučyniu, a pierajechała ŭ minułaje. Pieršy čas moj tata śmiajaŭsia, što telefanuje mnie ŭ minułaje — tamu što tut u nas tolki pačynaŭsia dzień, jaki ŭ Biełarusi ŭžo zakančvaŭsia. Ale jon navat nie zdahadvaŭsia, nakolki mieŭ racyju ŭ inšym sensie.
Ja ŭžo nie pamiataju, kali ŭ Biełarusi ŭ apošni raz płaciła za što-niebudź papiarovymi hrašyma ci fizičnaj kartaj, usiudy možna było raźličycca z dapamohaj Apple Pay. A paśla pierajezdu pryjšłosia vučycca nasić z saboj kartku. Praź piać hadoŭ tut stała krychu lepš, ale biez karty ŭsio jašče nie atrymajecca zapłacić za parkoŭku.
Budynki, jakija vy bačyli ŭ starych filmach pra Łos-Andželes, vyhladajuć zaraz dakładna hetak ža. Hateli supierstaryja, niavažna kolki ŭ ich zorak. Haspadary madernizujuć niekatoryja, ale ŭ asnoŭnym usio pracuje pa pryncypie «nie marnuj hrošy na renavacyju, pakul heta pracuje i nie vykarystana na 100%».
Bjuci pracedury (manikiur, cyrulnik) dobryja tolki ŭ majstroŭ, jakija pryjechali ź Jeŭropy i našaha rehijonu. Miascovyja byccam navat nie viedajuć, što takoje mahčyma. Pošuki smačnaj ježy i kavy — jašče adzin čelendž (heta ŭ Minsku možna ŭ kožnaj druhoj ustanovie smačna pajeści), a kali chočacca pajeści jašče i ŭ estetyčnym miescy, šancy možna dzialić na dva.
«Disney — prosta čarhovaja karparacyja, ale atrymać ich ofier vielmi pryjemna»
Zrazumieła, dziaŭčynka Jula nie ŭjaŭlała, što moža trapić u Disney na pracu. U dziacinstvie mnie vielmi padabalisia ich filmy, usie multfilmy pra prynces. Zdalok usie hetyja vialikija kampanii z hučnymi nazvami zdajucca takimi: «Vau!» Ale kali pačynaješ ź imi pracavać, mocna rasčaroŭvaješsia.
Da momantu pierachodu z EPAM u Disney, paśla 5 hadoŭ pracy na hetym prajekcie, užo było vyraznaje razumieńnie, što havorka nie pra mahiju — ja prosta ŭładkoŭvajusia na pracu ŭ čarhovuju karparacyju. Tym nie mienš, atrymać offier ad Disney było vielmi pryjemna. Heta dało bolš svabody.
Raniej nikoli nie pracavała na adnym prajekcie bolš za dva hady. I na prajekcie dla Disney u EPAM taksama nie płanavała. Dumała, pierajedu, atrymaju hryn kartu i pajdu ŭ FAANG za šmat hrošaj. Ale potym źjavilisia asabistaje žyćcio i intaresy. Zrazumieła, što lepš mieć narmalny work-life balance, čym žyć na pracy. Plus moj prajekt staŭ u razy cikaviejšy.
Pry hetym ja mahła zastacca ŭ EPAM. Ale ŭ kantraktara ŭ ZŠA niama mahčymaści raści. Ty nie adčuvaješ siabie ni častkaj EPAM, ni častkaj Disney. Padkreślivaju, što razmova mienavita pra ZŠA: u minskim EPAM usio ž jość adčuvańnie prynaležnaści da kampanii i bolš opcyj dla rostu.
Da pryniaćcia finalnaha rašeńnia schadziła na paru sumoŭjaŭ, ale šukać pracu było adnaznačna ciažej, čym u Minsku. Dy i čas nie samy prydatny, rynak u vielmi drennym stanie.
Jak ja daviedałasia ŭ pracesie pošuku, vialikaja častka vakansij u ahulnym dostupie na samoj spravie niesapraŭdnyja. Z-za lejofaŭ i skaročanych biudžetaŭ najm doŭha byŭ na stopie, i kali ŭdavałasia znajści biudžet na novuju pazicyju, čaściej za ŭsio ŭ kampanii ŭžo byŭ kandydat. Ale pa praviłach kampanija abaviazana vykłaści pazicyju anłajn. Tak i stvaralisia «niesapraŭdnyja» pazicyi, možaš padacca — ale biez šancaŭ na adkaz.
Kali ščyra, pa sutnaści ŭ vyniku ja vybrała samy lanivy varyjant.
U pieršy pracoŭny dzień ja była jak raz u siaredzinie dyzajnu novaha prajekta. Disney abnaviŭ moj akaŭnt, i z-za hetaha ja straciła dostup da ŭsich pracoŭnych sistem na tydzień. Usia praca spyniłasia. Disney — zanadta vialikaja, tut pastajanna što-niebudź z čymści mieržycca, tamu pytańnie dostupaŭ zaŭsiody vielmi balučaje. Kali źjaŭlajecca niejkaja prablema, jana moža vyrašacca pa niekalki tydniaŭ.
Zaraz my pracujem u źmiašanym režymie: z sakavika 2025 hoda supracoŭniki pavinny chadzić u ofis čatyry dni na tydzień. Pry hetym naš ofis zaŭsiody amal pusty.
Disney nie spansuje svaich supracoŭnikaŭ dla atrymańnia pracoŭnych viz i hryn kart. Tamu zusim niadaŭnich mihrantaŭ tut mała. Ale ludziej roznych nacyjanalnaściaŭ chapaje. Asabista znajomaja ź inšymi biełarusami i ŭkraincami.
Nad čym ja pracuju ŭ Disney? Heta ŭnutranyja prajekty dla raspracoŭščykaŭ, prydumlajem cacki dla siabie samich ža. Zaraz zajmajusia dyzajnam i raspracoŭkaj novaj unutranaj sistemy.
«Daroha ŭ ofis zajmaje hadzinu ŭ adzin bok u lepšym vypadku»
U pieršy hod u Kalifornii ja była litaralna začaravanaja ŭsim: soncam, uśmieškami, plažnym vajbam. Vychodziš z doma ŭ drennym nastroi, ale voś sonca śviecić i prymušaje ciabie ŭśmichacca.
Zaraz žyvu ŭ one bedroom apartment u Redonda-Bič [prymorski horad u składzie Vialikaha Łos-Andželesa]. Heta spalnia i haścioŭnia. U takoha žylla šmat minusaŭ: pralnaja mašyna adna na ŭvieś kompleks, maleńkaja kuchnia. Tut u pryncypie mała miesca dla dvaich. Ja ŭjechała siudy da svajho chłopca na paŭhoda, ale praz try hady my ŭsio jašče tut.
Jość u našych apartamientaŭ i vialikija plusy — pryhožy vid na akijan, za košt akijanskaha bryzu byvaje horača roŭna tydzień na hod. Dzieviać miesiacaŭ na hod ja žyvu ŭ chmarnaj Kalifornii.
Redonda-Bič — heta typovy pryharad, dzie ŭ asnoŭnym žyvuć siemji albo stałyja ludzi. Tut čysta, spakojna, niama biazdomnych. Ale za heta prychodzicca płacić adsutnaściu dobrych restaranaŭ i volnaha času, jak u bolš moładzievych rajonach.
U ZŠA pryjšłosia navučycca kiravać, u bolšaści amierykanskich haradoŭ biez mašyny žyć vielmi składana.
Daroha ŭ ofis zajmaje hadzinu ŭ adzin bok u lepšym vypadku. Z zatorami moža być da dźviuch hadzin u adzin bok. Kab dajechać na hramadskim transparcie, pryjšłosia b źmianić try maršruty, minimum 1 hadzina 45 chvilin.
Ale paru dzion na tydzień usio jašče ŭdajecca pracavać z doma.
Z-za mašyny ja ŭ razy mienš ruchajusia, i ład žyćcia pryjšłosia mianiać na bolš uśviadomleny, vyłučać čas na špacyry, choć u nas tut niašmat miescaŭ dla ich — akijan i maleńki park. Duža lublu huk akijana, pieršy hod ja tam amal kožny dzień była.
Moj racyjon taksama «raźviarnuŭsia» na 360 hradusaŭ — z-za pačatku bolš uśviadomlenaha etapu ŭ žyćci. U pobyt dadalisia pachody na fiermierskija rynki. Heta prykmietny plus Kalifornii: tut kruhły hod što-niebudź raście, i siezony śviežaj sadaviny pastajanna źmianiajuć adzin adnaho: siezon jabłykaŭ -> siezon hranataŭ -> siezon cytrusavych -> siezon truskavak -> siezon piersikaŭ i śliŭ -> siezon inžyru i tak dalej.
U razy bolš stała dumać ab uśviadomlenym spažyvańni — jak što-niebudź pierapracavać, kuplać bolš ekałahičnyja rečy, mienš adnarazovych (choć tut pierapracavać tyja ž batarejki składaniej, čym u Biełarusi).
Taksama pryjšłosia navučycca rabić samoj rečy, jakija tut nie dastupny: naprykład, desierty. Spačatku radavałasia, što tut niama smačnych pirožnych u kožnaj kaviarni. A z časam zrazumieła, što žyć bieź ich nie mahu.
U Biełarusi mnie padabałasia zamaŭlać bukiety, kab doma było ŭtulniej. Tut niama takoj kolkaści kvietkavych kram, ale davoli prosta nabyć dobryja kvietki ŭ fiermieraŭ abo ŭ praduktovaj kramie i sabrać ź ich bukiet samoj.
Ź niepryjemnych rečaŭ: davodzicca pastajanna praviarać, što ciabie nie skamiać: infarmacyjna, padpiskami, zvankami, kali kuplaješ ci pradaješ što-niebudź, kali zdymaješ kvateru. Zrešty, paśla pieršaha hoda ŭžo dobra atrymlivajecca raźbiracca.
Jakija stereatypy pra ŁA paćvierdzilisia? Šmat sielebryci, kali žyvieš bližej da pahorkaŭ, vielmi doraha, vielizarnyja zatory!
Vysoki ŭzrovień złačynnaści? Nie viedaju. Ja zaŭsiody žyła ŭ biaśpiečnych rajonach. Ale pieršaje što mnie skazaŭ taksist u aeraporcie: «Nie chadzi paśla zachadu sonca ŭ Daŭntaŭn adna». Toje ž paŭtaryŭ instruktar pa kiravańni, na zaniatki jon zaŭsiody vaziŭ z saboj pistalet. Staŭleńnie da zbroi ŭ miascovych, viadoma, dziŭnaje. Pistalet moža nabyć chto zaŭhodna, adkazaŭšy na kasie na 30 pytańniaŭ — pryčym u adkazach možna zrabić siem pamyłak. I heta samyja strohija praviły ŭ Kalifornii! Ale ahułam, kali nie chadzić u vidavočna drennyja rajony (a takich niašmat), to ŭsio ok.
«U niejki momant usia zarpłata stała sychodzić na rachunki»
Adna z rečaŭ, jakoj mianie navučyła Amieryka: tut nieabchodna vieści biudžet, inakš sydzieš u minus. Asabliva paśla žyćcia prahramista ŭ Biełarusi, kali nie pryzvyčaiŭsia ličyć hrošy.
U pieršy hod nie zaŭvažała asablivaj roźnicy — atrymała šmat bonusaŭ i dobry padatkovy zvarot. Ale ŭ niejki momant usia zarpłata stała sychodzić na rachunki. I raptam razumieješ, što hrošaj ni na adpačynak, ni na zabavy nie zastałosia. Palahčej stała, kali my stali zdymać kvateru 50/50 z partnioram i pakinuli adnu mašynu na dvaich.
Tut moža być dastatkova adnaho vielmi vialikaha miedycynskaha rachunku, kab apynucca na vulicy. Navat sa strachoŭkaj.
Asnoŭnyja artykuły vydatkaŭ vyhladajuć prykładna tak:
- Rachunki (kredyt i strachoŭka za mašynu, kvatera, bills) — 30% ad majho dachodu. Ale tolki tamu, što ja płaču za heta 50/50 z maim partnioram. Inakš było b 60%.
- Ježa (groceries, takeout) — 15-20%.
- Zaniatki sportam. Joha, piłates — zvyčajna 200-300$ za 8 zaniatkaŭ u miesiac. Ja zaraz zajmajusia z trenieram u zale, i hety artykuł vydatku niepryjemna vyhladaje ŭ biudžecie — 10%.
Što jašče? Ja tak i nie navučyłasia kuplać miascovaje adzieńnie. Jano albo ŭ try razy daražej adzieńnia biełaruskich brendaŭ, albo vielmi drennaje pa jakaści.
Jašče jość častka vydatkaŭ, jakaja vyličvajecca da vypłaty padatkaŭ: miedstrachoŭka, rachunki na miedycynskija vydatki, adličeńni ŭ [piensijny fond] 401(k) — tut užo ŭsio jak sam sabie vybieraš.
Za volny čas možna addać šmat hrošaj (snoŭbordynh, kancerty, tematyčnyja parki). A možna i pa minimumu — community events, chajkinh, nacyjanalnyja parki na luby hust: pustyni, lasy ź siekvojami, skały z akijanam. Pieršyja dva hady my tolki ich i daśledavali!
U Biełarusi ja adnaznačna mahła dazvolić sabie bolš. Tam nikoli nie davodziłasia dumać «a ci varta zaraz što-niebudź kupić, ci lepš pačakać?»
Ź inšaha boku, žyćcio tut adnaznačna jarčejšaje.
Biez padarožžaŭ žyćcio dla mianie hublaje farby. U pieršy hod emihracyi ja mahła vyjazdžać za miežy Štataŭ — źjeździła na Bali, u Jeŭropu, u Turcyju. U nastupnyja try hady pryjšłosia padarožničać pa Amierycy — Ńju-Jork, Sietł, roŭd tryp pa Jucie, Kałarada, Kalifornii. Ale pa Amierycy padarožničać doraha. Nievialikaja pajezdka na dva-čatyry dni čaściej za ŭsio kaštuje jak tydzień u Jeŭropie. Tut pierad nami vybar: žyć u bolš kamfortnaj kvatery abo bolš padarožničać. I my vybirajem druhoje.
U Biełarusi žyćcio było bieskłapotnym i prostym, časam zdavałasia, byccam baćki maniać, što darosłym być składana. A ŭ Kalifornii ja pačała adčuvać, što takoje być darosłaj.
«Pierajazdžała ŭ svabodnuju krainu, ale jana ŭsio bolš robicca padobnaj na tuju Biełaruś»
Zaraz my ŭ pracesie pierajezdu ŭ štat Vašynhton. Vielmi chočacca źmieny abstanoŭki, źmieny siezonaŭ, mienš zatoraŭ. A pa canie adnapakajovaj kvatery ŭ dobrym rajonie Łos-Andželesa možna źniać dom z čatyrma pakojami.
I pryroda! Pryroda Vašynhtona bolš padobnaja na zvykłuju, u Biełarusi. Złaviła siabie na dumcy, što šeraść za aknom prynosić niejkaje nievierahodnaje pačućcio spakoju. Jana nahadvaje pra Biełaruś, i ad hetaha robicca krychu spakajniej na dušy.
U budučyni, kali dazvolać dakumienty, płanuju pierajechać u Jeŭropu. Ja pierajazdžała ŭ svabodnuju krainu. Ale z novym uradam jana ŭsio bolš robicca padobnaj na tuju Biełaruś, ź jakoj ja źjazdžała. I heta nie toje miesca, u jakim ja chaču žyć.
Tak i pa kaštoŭnaściach my sa Štatami taksama nie syšlisia. Ci, moža być, z Kalifornijaj. Zaraz mnie tut usio zdajecca paviarchoŭnym, pustym, niaŭtulnym.
«Daviadziecca raści ŭ bok lideršypa»
U Disney jość mahčymaści dla rostu. Moj mieniedžar daŭno ŭ hetym zacikaŭleny, i zaraz narešcie moža što-niebudź dla hetaha rabić. Ja b z zadavalnieńniem rasła jak inžynier, ale inžynierny rost vielmi abmiežavany. Tamu pryjdziecca raści ŭ bok lideršypa.
Zrešty, heta jašče nie dakładna. Sistema rostu ŭ Dyśniei nieprazrystaja, i navat kali tvaje mieniedžery prosiać ciabie pavysić, niedzie ŭ black box mohuć admović. Tady pryjdziecca šukać novuju kampaniju. Ja čałaviek prosty: kali što-niebudź nie pracuje — sychodzim i šukajem miesca, dzie pracuje.
Nie biarusia što-niebudź raić biełarusam, jakija chočuć u ZŠA. Mahu tolki parekamiendavać vyrašać prablemy z uśmieškaj, budzie potym što dzieciam ci ŭnukam raskazać. A jašče — treba viedać, navošta ty siudy pierajazdžaješ, i być adkrytym da novaha.