Minhandlu vypadkova źliło dakumient, u jakim pakazała, jak i za što naličvaje premii
Namieśnica ministra Śviatłana Karatkievič vypisała sabie najbolšuju premiju — za arhanizacyju vizitu rasijskaj delehacyi ŭ Biełaruś.
Fota z kanała MARH
Siońnia ŭ 15:39 u kanale Ministerstva antymanapolnaha rehulavańnia i handlu źjaviłasia i adrazu ž było vydalena paviedamleńnie z unutranym dakumientam. Na listku farmatu A6 paznačana, kamu treba vypłacić premii za vierasień.
Pryznačany jon Aksanie Kotlinaj, načalnicy adździeła finansavańnia i buchhałtarskaha ŭliku MARH. Padpisany imionami namieśnic ministra Śvietłany Karatkievič i Natalli Vasileŭskaj.
Najbolšuju premiju — pamieram 600 rubloŭ — vypisała sama sabie namieśnica ministra Śviatłana Karatkievič za arhanizacyju vizitu delehacyi z rasijskaha Baškartastana.
Śviatłana Karatkievič. Fota: MARH
Druhuju pa pamiery premiju — 500 rubloŭ — atrymała pamočnica ministra Kaciaryna Cichančuk, jakaja zajmaje pasadu sakratara jačejki BRSM u ministerstvie. Jaje vypisali za pracu ŭ niepracoŭny čas.
Kaciaryna Cichančuk. Skrynšot ź videa telekanała STB
300 rubloŭ premii atrymała načalnica ŭpraŭleńnia abarony pravoŭ spažyŭcoŭ i kantrolu za rekłamaj Ina Haŭrylčyk — za pracu sa ŚMI. Jana sapraŭdy časta źjaŭlajecca ŭ efirach dziaržaŭnych miedyja pa roznych nahodach.
Inna Haŭrylčyk. Skrynšot ź jutuba BT
200 rubloŭ vypisali namieśnicy ministra Natalli Vasileŭskaj. Nahoda — za dadatkovuju nahruzku i aktyŭny ŭdzieł u dziejnaści MARH.
Natalla Vasileŭskaja. Fota: MARH
Taksama 200 rubloŭ atrymaje Natalla Čarapovič, namieśnica načalnika adździeła mietadałohii kiravańnia arhanizacyi handlu i hramadskaha charčavańnia. Pryčyna — za pracu pa dakładzie.
Natalla Čarapovič. Skrynšot ź videa ANT
Pa 150 rubloŭ atrymajuć dva supracoŭniki, a jašče šeść — pa 50 rubloŭ. Jany dapamahali pierajazdžać redakcyi časopisa MARH, jaki nazyvajecca «Hiermies». Heta šerahovyja supracoŭniki ministerstva.