«Ja nie chaču prablem, u mianie ŭsio dobra, ja lublu Biełaruś». Student z Konha, jaki skardziŭsia Łukašenku na ceny, pabyvaŭ u milicyi
Student z Konha Natan Tiełofat, jaki vučycca ŭ Biełarusi, paviedamiŭ u novym videa, što byŭ u milicyi. Heta adbyłosia paśla taho, jak staŭ virusnym jaho rolik pra anamalnaje padvyšeńnie cenaŭ u Biełarusi na koka-kołu. Pavodle słoŭ Natana, ciapier u jaho «ŭsio dobra».
«Usim pryvitańnie! U mianie ŭsio dobra! Mnie nichto nie pahražaje! Ja ŭ Biełarusi», — napisaŭ na videa chłopiec.
Natan paviedamiŭ, što byŭ u milicyi.
«My parazmaŭlali, i jany skazali, što ja ničoha drennaha nie zrabiŭ. Jany byli vielmi dobryja da mianie i pavodzili siabie pazityŭna. Zaraz ja ŭ Minsku, u svajoj kvatery, usio dobra», — skazaŭ jon.
Jon paprasiŭ «nie raspaŭsiudžvać iłžyvuju infarmacyju» pra jaho.
«Ja lublu Biełaruś, i mnie tut padabajecca, voś i ŭsio.
Ja sam heta pisaŭ, ja nie chaču prablem. U mianie ŭsio dobra, ja ŭ Biełarusi», — paŭtaraŭ jon.
Pavodle jaho słoŭ u milicyju jaho vyklikali nie praz koka-kołu. «Heta było inšaje videa», — skazaŭ jon, ale nie ŭdakładniŭ, u čym reč.
«Ja ŭ Biełarusi, ja lublu hetuju krainu, i ŭsio dobra. Dakładna, na sto pracentaŭ. Vy možacie taksama padpisacca, tamu što, ja dumaju, ja budu rabić jašče videa», — paabiacaŭ jon.
U kancy vieraśnia Natan vykłaŭ rolik, dzie vykazaŭ ździŭleńnie tym, što dvuchlitrovaja butelka koka-koły kaštuje 5,21 rubla, chacia jašče ŭ 2021 hodzie była kala 2 rubloŭ. Natan źviartaŭsia da biełaruskich ministraŭ i Łukašenki i prasiŭ dapamahčy. Videa stała virusnym.
Ludzi masava padtrymali studenta-afrykanca.
Praź niekalki dzion jon zapisaŭ videa z vybačeńniami, adznačyŭšy, što nie mieŭ namieru zakranać palityčnyja temy. Potym źjaviŭsia rolik užo ź vidavočnaj tryvohaj: Natan paviedamiŭ, što jamu telefanavali ź milicyi i jon «nie viedaje, što rabić»: «U mianie ciapier prablemy ŭ Biełarusi, i heta zusim nie žart. Kali mianie nie budzie ŭ internecie praz dva-try-čatyry dni, kali łaska: Black Lives Matter».