Śviedka nastupstvaŭ žudasnaha DTZ pad Śvietłahorskam: Kiroŭca maršrutki zanadta pozna pabačyŭ toj traktar

Z redakcyjaj Onliner.by źviazaŭsia čytač, jaki raskazaŭ, što padjechaŭ da miesca DTZ praz paru chvilin paśla zdareńnia.

— Na abočynie ŭ napramku Azaryčaŭ stajaŭ traktar z pryčepam typu MUVU (mašyna dla ŭniasieńnia vadkich uhnajeńniaŭ). Abodva levyja koły pryčepa byli zhornutyja. Habaryty i avaryjka pieršych mašyn—«śviedkaŭ» byli vyrazna bačnyja na adlehłaści. A voś na traktary nie było nivodnaha ahieńčyka — ni śpieradu, ni zzadu.

— Supastaŭlajučy abstanoŭku i apoviedy dziaciej, mahu vykazać zdahadku, što traktar biez ahnioŭ stajaŭ na abočynie. Ciemra, drobny doždž, kryvoje pakryćcio darohi pahoršyli situacyju — kiroŭca maršrutki zanadta pozna ŭbačyŭ hety traktar. Z-za «harbataj» darohi nie zdoleŭ vypravić situacyju… A tut jašče i sustrečnaja mašyna «prylacieła», — ahučvaje svaju viersiju śviedka.

Trahiedyja zdaryłasia ŭčora kala 19:00 u Śvietłahorskim rajonie na 72‑m kiłamietry aŭtadarohi R31. Kiroŭca maršrutki abjazdžaŭ traktar z paŭpryčepam, paśla čaho nie spraviŭsia z kiravańniem i vyjechaŭ na pałasu sustrečnaha ruchu, dzie ŭrezaŭsia ŭ «Falksvahien». Šeść čałaviek zahinuli na miescy zdareńnia, vosiem čałaviek, u tym liku dvoje kiroŭcaŭ, špitalizavanyja.

DAI prosić, kali kali chto-niebudź staŭ śviedkam DTZ abo vałodaje niejkimi źviestkami, milicyja prosić paviedamić pra heta ŭ apieratyŭna-dziažurnuju słužbu DAI UUS Homielskaha abłvykankama pa telefonie 8 (0232) 50— 44‑44 abo pa telefonie 102.

Kamientary da artykuła