Dziaržava prosić u biełarusaŭ padzialicca svaim bačańniem raźvićcia krainy na piać hod napierad — možna ananimna i biez rehistracyi

Praŭładnyja arhanizacyi da kanca kastryčnika pravodziać novaje sacyjałahičnaje daśledavańnie na temu vobraza budučyni Biełarusi na 2026‑2030 hady. Paŭdzielničać u apytańni možna anłajn praz sajt mierkavańnie.bieł.

Takaja ž apytanka ŭžo pravodziłasia viasnoj, i jaje vyniki akazalisia małapryjemnymi dla čynoŭnikaŭ — ludzi karystalisia mahčymaściu vykazacca i skardzilisia na drennyja darohi, brudnuju vadu, śmiećcie, daŭhabudy i karupcyju. Pahladzieli, što cikavić pradstaŭnikoŭ dziaržavy ŭ novym daśledavańni.

Anłajn-ankieta «Narodnaja piacihodka» stała častkaj sacyjałahičnaha daśledavańnia krainy, anansavanaha premjer-ministram Alaksandram Turčynym nieŭzabavie paśla svajho pryznačeńnia. Arhanizatarami vystupili praŭładnyja sacyjołahi ź Biełaruskaha instytuta stratehičnych daśledavańniaŭ (BISD), a taksama hramadskija abjadnańni pad nazvaj «Štab patryjatyčnych sił». U jaho ŭvachodziać raznamasnyja partyjščyki, prafsajuźniki i kamsamolcy — «Biełaja Ruś», BRSM, Biełaruski sajuz aficeraŭ, «Patryjoty Biełarusi» i inšyja.

Jak i ŭ viasnovaj apytancy, u novaj pieravažna źbirajucca mierkavańni nakont ekanamičnych składnikaŭ — važnaść pryjarytetaŭ sacyjalna-ekanamičnaha raźvićcia, najlepšyja kirunki rehulavańnia ekanomiki, šlachi stymulavańnia zaniataści pracazdolnych hramadzian, raźvićcio rehijonaŭ i pryvatnaha biznesu.

Aŭtary cikaviacca taksama kankretnym uzroŭniem žyćcia respandentaŭ, prosiačy padzialicca tym, na što chapaje hrošaj i na kolki hod napierad ludzi vyrazna ŭjaŭlajuć svaju stabilnuju budučyniu.

Prosiać parazvažać biełarusaŭ i na temy idealnaj schiemy pracy sistemy achovy zdaroŭja i adukacyi. A taksama raspavieści, dzie biełarusy čytajuć naviny i čaho bolš za ŭsio bajacca (u adkazach prysutničaje, naprykład, patencyjnaje zakryćcio miežaŭ, novyja pandemii, uciahvańnie Biełarusi ŭ bujnyja ŭzbrojenyja kanflikty, strata Biełaruśsiu suvierenitetu, a taksama pryniaćcie niepapularnych rašeńniaŭ, pad jakimi majucca na ŭvazie novyja zabarony, abmiežavańni i patrabavańni).

Siarod pytańniaŭ, jak i ŭ minułaj apytancy, niama naŭprostava palityčnych, jakija b dazvolili krytykavać režym Łukašenki (chacia amal usie formy adkazaŭ majuć adkryty punkt «Inšaje», kudy možna zapisvać aŭtarskaje mierkavańnie pa temie). Ale niekatoryja topiki mohuć uskosna namiakać na aktualnyja tryvohi čynoŭnikaŭ.

Tak, pra heta śviedčyć pytańnie «Što, na vašu dumku, umacuje žadańnie moładzi žyć i pracavać u Biełarusi?». Što admietna, siarod prapanavanych adkazaŭ jość navat varyjant «Pašyreńnie sietki moładzievych hramadskich abjadnańniaŭ», ale ničoha pra ŭmovy raźmierkavańnia, zarobki ci bazavuju biaśpieku i vykanańnie pravoŭ.

Parupilisia praŭładnyja sacyjołahi i mihracyjnaj palitykaj. Akramia mierkavańniaŭ nakont staŭleńnia da prytoku mihrantaŭ u Biełaruś, ich cikavić, ci varta ŭzmacnić kantrol za vyjezdam i ŭjezdam u krainu hramadzian Biełarusi i ci cikava miascovym žycharam raźvićcio suviaziaŭ ź biełaruskaj dyjasparaj za miažoj.

Nie abyšłosia i biez pytańnia pra narodnaje adzinstva. Siarod adkazaŭ na pytańnie «Što, na vašu dumku, spryjaje ŭmacavańniu narodnaha adzinstva biełarusaŭ?» jość i takija: dalejšaje praviadzieńnie pamiłavańniaŭ i amnistyj, naładžvańnie suviaziaŭ z kanstruktyŭna nastrojenymi biełarusami zamiežža i viartańnie ich na Radzimu, a taksama pašyreńnie vykarystańnia biełaruskaj movy (darečy, samo apytańnie dastupna vyklučna na ruskaj movie).

Asobna varta adznačyć prapanavanyja opcyi pazicyjanavańnia Biełarusi ŭ śviecie.

Placoŭka pramysłovaj zborki? Centr pramysłovych kampietencyj i navukovych škoł? Charčovy donar rehijona? Hienieratar inavacyj i praryŭnych idej? Krynica jakasnych pracoŭnych resursaŭ? Ekałahičny fłahman rehijona? Ajci– i kibierchab? Donar miru i stabilnaści ŭ rehijonie? Mižnarodnaja pieramoŭnaja placoŭka? Most pamiž Zachadam i Uschodam?

Što b vybrali vy?

Hałoŭnaja meta apytanki «Narodnaja piacihodka» sfarmulavana dosyć pafasna — uciahnuć kožnaha hramadzianina ŭ stratehiju raźvićcia krainy i vyznačyć klučavyja pryjarytety i sacyjalna značnyja prajekty. Praŭda, raniej «Naša Niva» razam z sacyjołaham Filipam Bikanavym užo tłumačyła, čamu vyniki hetaha daśledavańnia pa zmoŭčvańni nie mohuć być abjektyŭnymi:

— Kab daśledavańnie pakazała, što sapraŭdy miarkujuć biełarusy, treba, kab vybarka była imaviernasnaja. To-bok šaniec trapić u hetuju vybarku pavinien być pryblizna adnolkavy ŭ kožnaha biełarusa. Ale ž zrazumieła, što heta nie tak.

Kamientary da artykuła