Polšča pieradała byłuju palitźniavolenuju Natallu Padleŭskuju ŭ Litvu
Udzień 23 kastryčnika Polšča pieradała byłuju palitźniavolenuju, 60‑hadovuju Natallu Padleŭskuju litoŭskamu boku pavodle Dublinskaha pahadnieńnia.
Fota: belaruswomen.org
Hetuju infarmacyju «Biełsatu» paćvierdzili jurystka Hanna Macijeŭskaja, daradca Śviatłany Cichanoŭskaj pa pravavych pytańniaŭ Lavon Marozaŭ i kiraŭnik Narodnaha antykryzisnaha ŭpraŭleńnia Pavieł Łatuška.
Da Natalli Padleŭskaj, jakaja ŭ Polščy žyła pad Urocłavam, uviečary 22 kastryčnika pryjšli pradstaŭniki pamiežnaj achovy i zajavili, što jany musiać vykanać rašeńnie pavodle Dublinskaha rehłamientu i vysłać žančynu ŭ Litvu. Biełaruscy navat nie dali dastatkova času, kab sabracca, i dastavili ŭ Poznański aeraport, raspaviała «Biełsatu» jurystka Hanna Macijeŭskaja.
Udzień 23 kastryčnika polskija pamiežniki pieradali Natallu litoŭskamu boku.
Lavon Marozaŭ atrymaŭ infarmacyju pra kiejs Padleŭskaj uviečary 22 kastryčnika ad jurystki Hanny Macijeŭskaj.
«My adrazu ŭklučylisia ŭ pracu pa hetym pytańni. Adrazu paśla atrymańnia infarmacyi jurydyčnaja kamanda Ofisu Śviatłany Cichanoŭskaj padrychtavała aficyjny list ad majho imia, jaki byŭ nakiravany ŭ niekalki instytucyjaŭ, i miž inšym, namieśniku hałoŭnaha kamiendanta Pamiežnaj słužby Polščy. U liście my padrabiazna apisali palityčnyja pieraśledy, jakim padviarhałasia Natalla ŭ Biełarusi, i jejny stan zdaroŭja. My padkreślili nieabchodnaść dać joj mahčymaść praciahnuć razhlad zajavy ab mižnarodnaj abaronie ŭ Polščy. Taksama źviarnuli ŭvahu na pracesualnyja parušeńni i na toje, što sud jašče nie razhladaŭ chadajnictva Natalli pra prypynieńnie vykanańnia rašeńnia», — raspavioŭ Lavon Marozaŭ.
Daradca Cichanoŭskaj padkreśliŭ, što Natallu nie departavali, a pieradali Litvie pavodle Dublinskaha rehłamientu, jaki aznačaje, što asoba moža być nakiravanaja ŭ krainu Jeŭrasajuza, adkaznuju za razhlad jaje zajavy na mižnarodnuju abaronu. Natalla ŭjechała ŭ Polšču pa litoŭskaj vizie, tamu Polšča maje prava pieradać razhlad zajavy ab mižnarodnaj abaronie ŭ Litvu.
«U vypadku spadaryni Natalli Padleŭskaj havorka idzie pra asobu, jakaja pieražyła palityčny pieraśled i była źniavolenaja ŭ Biełarusi. Na kolki mnie viadoma, jana maje prablemy sa zdaroŭjem. Da taho ž jaje siamja žyvie ŭ Polščy, i sud jašče nie vynies rašeńnia pa jaje spravie. My zaklikajem polskija ŭłady ŭličyć humanitarnyja akaličnaści i zabiaśpiečyć, kab rašeńni prymalisia z pavahaj da pryncypaŭ pravoŭ čałavieka, humanizmu i prava na siamiejnaje žyćcio», — kaža Marozaŭ.
Daradca biełaruskaj lidarki zapeŭniŭ, što jak u Polščy, tak i ŭ Litvie Ofis Śviatłany Cichanoŭskaj, Abjadnany pierachodny kabiniet, fond «Kraina dla žyćcia» hatovyja akazać Natalli Padleŭskaj usiu mahčymuju dapamohu i padtrymku.
Natalla Padleŭskaja žyła ŭ Polščy ź vieraśnia 2024 hoda. Jak tolki jana pryjechała ŭ hetuju krainu, adrazu padałasia na mižnarodnuju abaronu. U dačynieńni da žančyny, adnak, byŭ vykarystany Dublinski rehłamient, jaki dazvalaje krainie pieradać prasiciela prytułku ŭ krainu, jakaja vydała vizu. U Natalli była litoŭskaja viza.
Natalla pajšła ŭ sud, kab abskardzić «dublinskaje rašeńnie», adnak pieršy pazoŭ sud adchiliŭ, bo «nie spadabałasia adna farmuloŭka». Biełaruska na nastupny ž dzień adpraviła ŭ sud novy list z vypraŭlenaj farmuloŭkaj. Žančyna prasiła prypynić vykanańnie rašeńnia ab departacyi i razhledzieć jejnuju zajavu da 17 kastryčnika. Ale razhlad zaciahnuŭsia. Pasiedžańnie pryznačyli tolki na 24 kastryčnika.
23 kastryčnika ŭ sudzie była jurystka inicyjatyvy «Partyzanka», jakaja zajmajecca hetym kiejsam, adnak sud admoviŭsia vydać rašeńnie raniej.
«10 kastryčnika Natalla padała zajavu ab prypynieńni vykanańnia rašeńnia pa Dublinskim rehłamiencie, ale sud nie razhledzieŭ zvarot za 12 dzion. Tamu 22 kastryčnika Natallu zatrymała pamiežnaja achova dla pieradačy ŭ Litvu, za dzień da pasiedžańnia. My siońnia jeździli ŭ sud, prasili ekstranna razhledzieć jejnuju zajavu, kab jaje nie pieradavali ŭ Litvu, ale, na žal, sudździa nie zachacieła ničoha siońnia rabić i prapanavała termin na zaŭtra. Ale heta ŭžo pozna», — raspaviała jurystka «Partyzanki».
Siastra byłoj palitźniavolenaj raspaviała nam, jak vyhladała zatrymańnie pamiežnaj achovaj, a taksama, što dahetul nie moža źviazacca z Natallaj:
«Ja pytałasia ŭ pamiežnikaŭ, čamu Natalla nie adkazvaje na maje telefanavańni, mnie skazali, što joj zahadali pakłaści telefon u sumku, i pakul zabaranili adkazvać i telefanavać. Kali jany pryjšli, jana paśpieła ŭziać u zaplečnik tolki leki, i jaje zabrali. U Litvie ŭ nas nikoha niama, chto moh by jaje pryniać».
Natalla Padleŭskaja była zatrymanaja 3 listapada 2021 hoda. Jaje abvinavacili ŭ abrazie pradstaŭnika ŭłady (art. 369 Kryminalnaha kodeksu Biełarusi) i ŭ abrazie Alaksandra Łukašenki (art. 368 KK) dy asudzili da adnaho hoda pazbaŭleńnia voli ŭ kałonii va ŭmovach ahulnaha režymu i štrafu ŭ pamiery 100 bazavych vieličyniaŭ.
4 lipienia 2022 hoda Natalla vyjšła na volu praz zakančeńnie terminu.