Časopis MZS Rasii prapanavaŭ prymianiać va Ukrainie saviecki dośvied akupacyi Hiermanii
Asablivuju ŭvahu aŭtarki artykuła, byłoj vykładčycy fizkultury, pryciahnuła praca «kamisij pa denacyfikacyi».
Fota: Minabarony RF
Časopis Ministerstva zamiežnych spraŭ Rasii «Mieždunarodnaja žizń» apublikavaŭ artykuł ab nieabchodnaści prymianieńnia savieckaha dośviedu akupacyi Hiermanii paśla Druhoj suśvietnaj vajny pry vyrašeńni «adnoj z najvažniejšych met SVA — denacyfikacyi Ukrainy», piša «Ahientstvo».
Artykuł «Dośvied Savieckaha Sajuza pa ažyćciaŭleńni denacyfikacyi ŭ savieckaj zonie akupacyi Hiermanii» napisała kiraŭnica navukova-daśledčaha adździeła Vajennaha ŭniviersiteta imia Alaksandra Nieŭskaha Minabarony Rasii Iryna Hračova. Raniej jana vykładała fizkulturu.
Va ŭvodzinach jana zhadała zvarot Uładzimira Pucina ad 24 lutaha 2022 hoda, u jakim jon «vyznačyŭ u jakaści adnoj z najvažniejšych met SVA denacyfikacyju Ukrainy». Dla dasiahnieńnia hetaj mety, pavodle jaje słoŭ, treba vykarystoŭvać «bahaty praktyčny dośvied», jaki byŭ nazapašany savieckimi ŭładami «pry vyrašeńni anałahičnaj zadačy na terytoryi zony Hiermanii, akupavanaj Čyrvonaj armijaj u vyniku Druhoj suśvietnaj vajny».
Na pačatku artykuła Hračova adznačyła, što dośvied «denacyfikacyi» savieckija ŭłady pačali atrymlivać jašče na zaklučnym etapie vajny, u tym liku za košt pracy NKUS na froncie.
Zatym aŭtarka nahadała pieršy zahad savieckaha vajennaha kamiendanta Bierlina, jaki raspuściŭ struktury nacysckaj partyi, a ich kiraŭnictva i vajennych abaviazaŭ źjavicca ŭ kamiendatury na praciahu niekalkich sutak. Tych, chto nie źjaviŭsia abo chavaŭ ich, čakała «strohaja adkaznaść pa zakonach vajennaha času», piša Hračova.
Aŭtarka taksama nieadnarazova pracytavała adzin z dakumientaŭ vajennaj rady i palitupraŭleńnia 1‑ha Ukrainskaha frontu. Jon pradpisvaŭ dla «vytraŭlivańnia jadu nacyzmu ź niamieckaha arhanizma» pryciahvać niamieckaje nasielnictva. Taksama dakumient praduhledžvaŭ prapahandysckuju pracu, jakaja, u tym liku, pavinna była «dać nasielnictvu pravilnaje ŭjaŭleńnie pra Saviecki Sajuz» i «papularyzavać vykazvańni tavaryša Stalina pra Hiermaniju i niamiecki narod».
Hračova apisała i dośvied savieckaj vajennaj administracyi, jakuju stvaryli dla kiravańnia savieckaj zonaj akupacyi Hiermanii. Asabliva jaje ŭvahu pryciahnuła praca «kamisij pa denacyfikacyi».
Jak piša aŭtarka, jany da 1948 hoda «vydalili» z orhanaŭ samakiravańnia i z pradpryjemstvaŭ kala 520 tysiač «byłych členaŭ nacysckaj partyi, militarystaŭ i vajennych złačyncaŭ». 150 tysiač byłych słužačych SS, hiestapa i nacysckaj partyi byli internavany, 17 tysiač ź ich trapili ŭ turmy, piša aŭtarka.
U toj ža čas jana adznačyła, što nie ŭsie savieckija čynoŭniki bačyli roźnicu pamiž roznymi palityčnymi siłami Hiermanii, «z-za čaho aryštam padviarhalisia ludzi nievinavatyja, a to i, naadvarot, tyja, chto zmahaŭsia suprać nacysckaha režymu». U jakaści prykładu Hračova pryviała aryšt obierburhamistra Ejzienacha doktara Frejesdorfa, nie ŭdakładniŭšy, što jon pravioŭ piać hadoŭ u śpiecłahiery NKUS.
Jak piša Hračova, da 1948 hoda vajennaja administracyja «praviała va Uschodniaj Hiermanii asnoŭnyja demakratyčnyja pieraŭtvareńni, ačyściła orhany samakiravańnia, palicyju i sudovyja orhany ad vidavočnych i skrytych nacystaŭ, sfarmiravała ziamielnyja i pravincyjnyja ŭrady», jakim zatym pieradała ŭsie paŭnamoctvy.
«Nazapašany savieckimi akupacyjnymi ŭładami dośvied pa denacyfikacyi Hiermanii metazhodna vykarystoŭvać orhanam ułady i vajennaha kiravańnia RF pry praviadzieńni anałahičnaj pracy na terytoryjach, vyzvalenych u chodzie SVA (tak prapahanda nazyvaje vajnu. — NN) ad ułady kijeŭskaha nieanacysckaha režymu. Na žal, pakul taki dośvied vykarystoŭvajecca ŭ abmiežavanych maštabach», — reziumavała Hračova.