Rasijskaj śpiavačcy Naoka dali štraf za pieśniu Manietački. Jana vykonvaje na vulicy pieśni zabaronienych muzykantaŭ
Pierad hetym 18‑hadovaja dziaŭčyna adsiadzieła 13 sutak.
Fota: Miedyjazona
Leninski rajonny sud Pieciarburha siońnia razhledzieŭ administracyjny pratakoł ab dyskredytacyi rasijskaj armii ŭ dačynieńni da 18‑hadovaj vuličnaj śpiavački Dzijany Łohinavaj, viadomaj jak Naoka, piša «Miedyjazona».
Dziaŭčyna ŭžo praviała 13 sutak u śpiecpryjomniku — jaje pryznali vinavataj u arhanizacyi masavaha mierapryjemstva (častka 1 artykuła 20.2.2 KaAP). Siońnia adrazu paśla vyzvaleńnia jaje pavieźli ŭ sud dla razhladu nastupnaha administracyjnaha pratakoła.
U vyniku sudździa Alena Samsonava aštrafavała Naoku na 30 tysiač rasijskich rubloŭ (380 dalaraŭ) pa pratakole ab «dyskredytacyi» armii z-za vykanańnia pieśni Manietački «Ty sałdat».
Adnak dziaŭčynu nie adpuścili z zały suda paśla vyniasieńnia štrafu, jaje z kanvojem vyvieli z suda. Adzin ź siłavikoŭ, jakija jaje supravadžali, skazaŭ, što Dyjana Łohinava «pracesualna zatrymanaja»: jaje paviazuć nazad u 76‑y adździeł milicyi dla składańnia čarhovaha pratakołu. Što heta za pratakoł — nieviadoma.
18‑hadovaja Naoka (Dzijana Łohinava) viadomaja jak vakalistka vuličnaha hurta Stoptime, svaje vystupy muzyki anansavali ŭ telehram-kanale. U internecie stali virusnymi videa jaje vystupleńniaŭ z vykanańniem piesień «Pornafilmaŭ», Manietački, Noize MC i inšych muzykaŭ, pryznanych u Rasii «zamiežnymi ahientami».
Na adnym z apublikavanych videa muzyki vykonvajuć pieśniu «Kaapieratyŭ «Lebiadzinaje voziera»» repiera Noize MC, jakuju ŭ mai rasijski sud zabaraniŭ, ukazaŭšy, što ŭ joj «vykarystoŭvajucca prynižalnyja i abraźlivyja charaktarystyki, jakija mohuć być atajasamleny ź fihuraj, što simvalizuje narod RF».
U žniŭni muzykaŭ zatrymlivali paśla anałahičnaha vystupleńnia, i tady jany paabiacali, što nie stanuć źmianiać repiertuar. U toj raz pryčynaj dla zatrymańnia stała parušeńnie režymu cišyni — muzykaŭ adpuścili paśla afarmleńnia štrafaŭ.
«Viadoma, my praciahniem strytavać, bo my nie napužanyja i nie złamanyja», — padkreślivała Naoka.
Naoku zatrymali 15 kastryčnika ŭ Pieciarburhu. Jana noč praviała ŭ pastarunku milicyi Pieciarburha. Noč u adździele praviali taksama Alaksandr Arłoŭ i Uładzisłaŭ Lavonćjeŭ, udzielniki Stoptime. Joj dali 13 sutak (Jaje pryznali vinavataj u arhanizacyi masavaha mierapryjemstva). Jaje kalehaŭ asudzili na takija ž terminy.
Siońnia Naoku paśla vyzvaleńnia znoŭ pryvieźli ŭ sud. Adkazvajučy na pytańni sudździ, dziaŭčyna kaža, što prosta vykonvała pieśni, jakija joj padabajucca, u tym liku pieśni Viktara Coja i «Hramadzianskaj abarony».