Vychodzić kino pra biełarusak u palitycy. Adna z hałoŭnych hieraiń — Śviatłana Cichanoŭskaja
Suśvietnaja premjera stužki pad nazvaj «Nie stvoranyja dla palityki» (Not made for politics) adbudziecca na 29‑m estonskim kinafiestyvali «Ciomnyja nočy» (Black Nights). Dla režysiorki Voli Čajkoŭskaj heta debiutny poŭnamietražny dakumientalny film, nad jakim jana pracavała apošnija piać hadoŭ.
Śviatłana Cichanoŭskaja. Kadr ź filma «Nie stvoranyja dla palityki» / Allfilm, Yuzu Productions, Sorrento Productions
Padčas pratestaŭ 2020 hoda režysiorka Vola Čajkoŭskaja znachodziłasia za miažoj. Tam jana aktyŭna ŭdzielničała ŭ akcyjach salidarnaści. Tak Vola sama stała hierainiaj ułasnaha filma pra biełarusak u palitycy, dałučyŭšy tudy historyi jašče troch žančyn — Śviatłany, Nadziei i Mašy. Ich mužčyny byli kinutyja ŭ biełaruskija turmy, a sami jany byli vymušanyja nie tolki nieści na sabie ciažar žonak palitviaźniaŭ, ale i supraćstajać dyktatury Łukašenki.
Viadoma, apovied pra biełarusak u palitycy nie byŭ by poŭnym biez historyi Śviatłany Cichanoŭskaj — mienavita pra jaje fihuru i rolu ŭ palityčnych pracesach daviedajucca hledačy stužki.
Nadzieja Zielankova i Vola Čajkoŭskaja. Kadr ź filma «Nie stvoranyja dla palityki» / Allfilm, Yuzu Productions, Sorrento Productions
«Škada, što ja nie mahu źniać usich biełaruskich žančyn, jakija adyhrali i praciahvajuć mieć padstavovuju rolu ŭ biełaruskaj revalucyi! Škada, što chronamietraž adnaho filma i maje ŭłasnyja mahčymaści tak abmiežavanyja. Dla mianie asabista heta stała padarožžam, što źmianiła žyćcio.
Uvieś praces režysury, pradusavańnia i vykanańnia mnostva inšych rolaŭ u prajekcie byŭ nievierahodna źvilistym, ale taksama poŭnym radaści, viedaŭ i nadziei. Ja spadziajusia, što ŭ hetyja niestabilnyja i składanyja časy film iznoŭ pryciahnie ŭvahu da majoj rodnaj krainy Biełarusi, da jaje zmahańnia za volu i demakratyju, a taksama da žyćciova važnaj roli kožnaj žančyny ŭ supraćstajańni patryjarchalnaj tyranii», — vykazała nadzieju režysiorka.
Vola Čajkoŭskaja — biełaruskaja kiniematahrafistka i art-mieniedžarka. Jana arhanizoŭvaje fiestyval «Paŭnočnaje źziańnie» i źjaŭlajecca suzasnavalnicaj Biełaruskaj niezaležnaj kinaakademii (BIFA). Darečy, sioletniaje «Paŭnočnaje źziańnie» ŭ samym razhary — filmy dastupnyja dla prahladu jak afłajn, tak i anłajn.