U kastryčniku ŭ Biełarusi vyraśli prodažy lehkavych aŭtamabilaŭ
U kastryčniku biełaruski rynak novych lehkavych aŭtamabilaŭ pakazaŭ značny ŭzdym. Pavodle danych aŭtamabilnaj asacyjacyi «BAA», ich prodažy vyraśli bolš čym na 15% adnosna vieraśnioŭskich pakazčykaŭ, piša Office Life.
Fota: OL
Pry hetym, kali paraŭnoŭvać abjom rynku novych aŭtamabilaŭ hod da hoda, to ŭ kastryčniku 2025 hoda jon zastaŭsia na ŭzroŭni 2024-ha.
U BAA ličać, što na stanoŭčuju dynamiku da vieraśnia paŭpłyvała pašyreńnie madelnaha rada ŭ dyleraŭ. Najbolšy stymuł rynku nadaŭ aktyŭny vychad na rynak hibrydnych i elektryčnych navinak. Akramia taho, u kastryčniku na 10% u paraŭnańni ź vieraśniem pavialičyŭsia impart elektramabilaŭ u krainu.
Na aŭtamabilnym rynku Biełarusi pa-raniejšamu lidziruje Belgee. Za kastryčnik u krainie pradali 2 395 aŭtamabilaŭ hetaha brenda.
Admietna, što z usich madelaŭ aŭtavytvorcy pa prodažach lidziruje Belgee X50. Z pačatku 2025 hoda było pradadziena bolš za 8,4 tys. krasovieraŭ hetaj madeli.
Ekśpierty prahnazujuć, što da kanca 2025 hoda na rynku zachavajecca trend, navat z ulikam nadychodu zimovaha pieryjadu. Pry hetym prodažy elektramabilaŭ praciahnuć demanstravać apieradžalnyja tempy rostu ŭ apošnija dva miesiacy hoda.
U pačatku kastryčnika my paviedamlali, što za vierasień 2025 hoda aficyjnyja dylery ŭ Biełarusi pradali 4 352 lehkavyja aŭtamabili. Heta na 2% bolš, čym u žniŭni.