Dyviersant na polskaj čyhuncy dapuściŭ dziŭnuju pamyłku — padarvaŭ nie tuju rejku
Ad vybuchu na čyhuncy ŭ Polščy nichto nie paciarpieŭ. Ekśpiert u raźminiravańni kaža «Biełsatu», što dyviersanty zrabili pamyłku — uzarvali nie tuju rejku. Ekśpiert nie vyklučaje, što pamyłka była naŭmysnaj: metaj moh być nie padryŭ kankretnaha ciahnika, a demanstracyja zdolnaściaŭ.
Razłamanaja rejka na čyhuncy miž Varšavaj i Lublinam. Fota: Dyspozytura Trakcji / X
16 listapada na čyhuncy miž Varšavaj i Lublinam vyjavili paškodžańnie rejki, vyklikanaje vybucham. Žurnalist polskaj słužby «Biełsatu» parazmaŭlaŭ pra dyviersiju z Vojciecham Vujcińskim — kamandziram patruloŭ raźminiravańnia padčas polskich misij u Afhanistanie, Iraku i Livanie, suzasnavalnikam Lebanon Mine Action Center.
Ad dyviersii nichto nie paciarpieŭ, paškodžańnie rejek vyjavili da taho, jak niejki ciahnik trapiŭ u avaryju. Vujciński ličyć, što pracu daručyli amataru.
«Ciapier uźnikaje pytańnie, ci chacieli dyviersanty zahadzia źniščyć rejku, kab niešta syšło z rejek, — razvažaje ekśpiert. — Ci, moža, jak śpiekulujuć miedyi, padarvać ciahnik u ruchu. Sprobu padryvu ciahnika ŭ ruchu ja adrazu b adkinuŭ z taktyčnych pryčynaŭ. Kab vyklikać vybuch u patrebny momant, treba było b znachodzicca na miescy, a heta ryzykoŭna.
Miarkuju, što zadańniem było paškodzić rejku, spadziejučysia, što fizika zrobić svajo».
Miesca idealna padychodziła dla dyviersii: za prapusknoj truboj pad rejkami, na pačatku pavarotu, tłumačyć ekśpiert. Dastatkova padarvać adnu rejku, na jakoj vahony trymajucca na pavarocie, i ciahnik vylecić napierad. Ale kab takoje zdaryłasia, padarvać treba vonkavuju rejku pavarotu, a dyviersant padarvaŭ unutranuju.
Heta mahło vyratavać ciahniki, jakija prajazdžali praź miesca padryvu. Miascovyja žychary raskazvali palicyi pra huk, padobny da vybuchu, jašče viečaram suboty — a paškodžańnie vyjavili ranicaj niadzieli. Z paviedamleńniaŭ u polskich miedyjach vynikaje, što niešta padazronaje, jak raskoł rejki, vyjaviŭ miechanik mižharodniaha ciahnika, jaki prajechaŭ praz paškodžany ŭčastak na vialikaj chutkaści.
Vujciński dapuskaje, što vybuch moh być zanadta słaby, kab razburyć rejku, abo vybuchoŭka była zakładziena niapravilna. Mahčyma, tolki paśla prajezdu niekalkich ciahnikoŭ adarvaŭsia prykmietny kavałak rejki.
Donald Tusk i kiraŭniki polskich siłavych strukturaŭ na miescy dyviersii. Fota: MSWiA / X
Vybuch niesumnienna byŭ, kaža Vujciński. Niekatoryja kamientatary ŭ internecie ździŭlalisia tamu, što na miescy vybuchu nie raskidanyja kamiani. Ekśpiert davodzić: rejki nasamreč krochkija — nie treba mocnaha zaradu, kab ich razrezać, niby nažnicami.
Najpraściejšuju vybuchoŭku možna zrabić u chatnich umovach, nahadvaje ekśpiert. Dla hetaha nie treba być inžynieram — kožny, chto prajšoŭ vajskovuju słužbu, musić mieć peŭnyja viedy padryŭnoj spravy. Vujciński nie vyklučaje, što zamoŭnik moh pieradać vykanalniku jak instrukcyi vyrabu vybuchoŭki, tak i sami vybuchovyja rečyvy.
Kali buduć vyjaŭlenyja zamoŭniki i vykanalniki, to hetkuju dyviersiju možna traktavać jak akt vajny, ličyć Vujciński. Ale paŭstaje prablema interpretacyi.
«Dastatkova pasłuchać palitykaŭ, kolki štodnia my majem kibieratak na lubuju mahčymuju infrastrukturu: vadu, haz, elektryčnaść, ciapier i čyhunku, — pieraličvaje jon. — Kolki ludziej, što supracoŭničali z rasiejskimi FSB i HRU, z KDB Biełarusi, zatrymali našyja słužby. A havorka tolki pra niekalki adsotkaŭ, bo astatnija lubiać cišyniu.
Hledziačy na maštaby, možam skazać, što my na vajnie. Moža, tut jašče niama rasiejskich tankaŭ, ale ciapier vajna vyhladaje inakš, i heta adzin ź jaje elemientaŭ».
Premjer-ministr Polščy Donald Tusk paviedamiŭ, što padazravanyja — dvoje hramadzianaŭ Ukrainy, jakija supracoŭničali z rasiejskaj Fiederalnaj słužbaj biaśpieki i zdoleli pakinuć Polšču. Niekatoryja ŭ Polščy padazrajuć u dyviersii Ukrainu, choć papiaredniaja viersija polskich uładaŭ — dziejnaść rasijskich śpiecsłužbaŭ.
Vujciński adznačaje, što vinavacić Ukrainu niekatorym prosta vyhadna, dyj vykarystać dla dyviersii čałavieka z Ukrainy było b zručna. Ale ekśpiert pierakanany: kali kapnuć hłybiej, to vyjavicca, što za dyviersijaj staić Rasieja.
Na jahonuju dumku, Rasieja chacieła pakazać, što moža nanieści ŭdar, pieradusim vyklikać paralič i paniku. Maŭlaŭ, kali b niešta syšło z rejek, heta było b bonusam. Ekśpiert nie vyklučaje, što niapravilnuju rejku mahli padarvać naŭmysna.