Kaśmičnaja turystka Maryna Vasileŭskaja vyjšła zamuž za kasmanaŭta Navickaha? Jany nosiać piarścionki
Pra viasielle rasijskaha kasmanaŭta, uradženca Biełarusi Aleha Navickaha i kaśmičnaj turystki Maryny Vasileŭskaj niečakana raskazali ŭ muziei kasmanaŭtyki, što ŭ ahraharadku Tamašoŭka Bresckaha rajona, źviarnuła ŭvahu «Lusterka».
Kasmanaŭt Aleh Navicki i kaśmičnaja turystka Maryna Vasileŭskaja. Fota: instahram Vasileŭskaj
Muziej kasmanaŭtyki pracuje pry škole imia Piatra Klimuka — pieršaha biełaruskaha kasmanaŭta. Ekskursiju pravodziŭ dyrektar škoły Jaŭhien Hryhorjeŭ.
«Darečy, kali sočycie za navinami, to, napeŭna, letam nie prapuścili toj fakt, što na siońniašni dzień Aleh Navicki i Maryna Vasileŭskaja źjaŭlajucca mužam i žonkaj», — raskazaŭ Hryhorjeŭ naviedvalnikam muzieja.
Aficyjna pra toje, što Navicki i Vasileŭskaja pažanilisia, ničoha nie paviedamlałasia. Sami jany nijak nie kamientavali svajo asabistaje žyćcio.
Adzinym, chto paviedamiŭ pra ich viasielle, byŭ rasijski partał Digital report. Vydańnie pisała pra heta 4 lipienia 2025 hoda sa spasyłkaj na «krynicy ŭ kaśmičnym centry padrychtoŭki kasmanaŭtaŭ u Zornym haradku» (havorka pra centr im. Haharyna ŭ Maskoŭskaj vobłaści). Nibyta vidavočcy raskazali Digital report, što «viasielle adbyłosia ŭ vuzkim kole siabroŭ i kaleh».
Navicki i Vasileŭskaja rychtujucca da zapusku «Sajuza» na Mižnarodnuju kaśmičnuju stancyju. Kazachstan, Bajkanur, 21 sakavika 2024 hoda. Fota: Bill Ingalls, NASA
Infarmacyju pra asabistaje žyćcio ŭradženca Biełarusi abnavili navat na jaho staroncy ŭ Vikipiedyi. Ale znoŭ ža sa spasyłkaj na rasijskaje miedyja.
Darečy, Navicki i Vasileŭskaja paśla palotu nie raz razam naviedvali roznyja mierapryjemstvy ŭ hetym hodzie. Naprykład, u studzieni pahladzieli ekspazicyju BMZ na vystavie «Maja Biełaruś», u mai sustrelisia z navučencami Słuckaha kadeckaha vučylišča. A ŭ červieni razam pryjazžali ŭ Smalavičy «nie z aficyjnym vizitam, a kab paznajomicca ź miascovymi śviatyniami».
Aleh Navicki i Maryna Vasileŭskaja ŭ Smalavičach, červień 2025 hoda. Fota: smolevichi-24.by
Žurnalistka «Lusterka» patelefanavała kasmanaŭtu z prośbaj prakamientavać hetuju infarmacyju.
«Vy mianie śmiešycie. Ja vas nie viedaju, vy nie viedajecie mianie i sprabujecie niešta spytać i paćvierdzić, — zajaviŭ jon. — Niechta niešta raskazaŭ, i vy sprabujecie heta vyśvietlić. Voś vy žanatyja? A jakoje maje značeńnie, z kim ja žanaty?»
Paśla jon paraiŭ «nie zajmacca łuchtoj» i pakłaŭ słuchaŭku.
«Naša Niva» źviarnuła taksama ŭvahu, što Navicki i Vasileŭskaja stali nasić piarścionki, padobnyja da zaručalnych, na biezymiennym palcy pravaj ruki.
Maryna Vasileŭskaja ŭ listapadzie 2025 hoda. Fota: instahram Vasileŭskaj
Navicki i Vasileŭskaja ŭ lipieni 2025 hoda. Fota: instahram Vasileŭskaj
Alehu Navickamu 54 hady. Z žonkaj Julijaj Navickaj (joj zaraz 52 hady) jany byli razam prynamsi da zimy 2022 hoda, bolš za 26 hadoŭ. U Navickaha dźvie dački — 29‑hadovaja Jana i 8‑hadovaja Marharyta.
Kaśmičnaj turystcy Marynie Vasileŭskaj 35 hadoŭ. Da palotu na MKS jana pracavała bortpravadnicaj avijakampanii «Biełavija». Paśla viartańnia na Ziamlu žančyna atrymała zvańnie «Hieroj Biełarusi».