Stali viadomyja padrabiaznaści pra dvuch ukraincaŭ, jakija ździejśnili dyviersiju na polskaj čyhuncy i ŭciakli ŭ Biełaruś

Paviedamlajecca, što dvoje hramadzian Ukrainy, Jaŭhien Ivanoŭ i Alaksandr Konanaŭ, padazrajucca ŭ arhanizacyi dyviersii na polskaj čyhuncy na zadańnie Rasii. Im adpaviedna 41 i 39 hadoŭ. Abodva tolki na niekalki hadzin pryjazdžali ŭ Polšču, a asnoŭnuju pracu za ich nibyta vykonvali pamahatyja, jakich polskija słužby ŭžo zatrymali, piša Onet.pl.

Razłamanaja rejka na čyhuncy miž Varšavaj i Lublinam. Fota: Dyspozytura Trakcji / X

Pavodle infarmacyi ŭkrainskich miedyja, Ivanova rasijskija śpiecsłužby mahli zavierbavać jašče ŭ studzieni 2024 hoda. Jon, jak śćviardžajuć, supracoŭničaŭ z aficeram HRU Juryjem Sizavym i zajmaŭsia padrychtoŭkaj dyviersii na pradpryjemstvie pa vytvorčaści dronaŭ u Lvovie.

Polskaja prakuratura vystaviła Ivanovu i Konanavu abvinavačańni ŭ terarystyčnaj dyviersii na karyść Rasijskaj Fiederacyi. Im pahražaje pažyćciovaje źniavoleńnie. Abodva ciapier znachodziacca na terytoryi Biełarusi.

Paviedamlajecca taksama pra pieršyja zatrymańni inšych udzielnikaŭ apieracyi.

Nahadajem, što ŭ niadzielu, 16 listapada, mašynist zaŭvažyŭ paškodžańni kala stancyi Mika na linii Demblin — Varšava. Vyśvietliłasia, što častku rejek uzarvali. Na miescy znajšli kamieru i jašče adno, nierazarvanaje, vybuchovaje prystasavańnie. Paźniej pad horadam Pułavy byŭ zafiksavany druhi incydent — paškodžanaja kantaktnaja sietka, ad čaho ŭ ciahniku vybiła škło.

Polskaja prakuratura rasśleduje spravu jak akt teraryzmu i dyviersii suprać čyhunačnaj infrastruktury na karyść zamiežnaj raźviedki.

Kamientary da artykuła