Niekatoryja bankamaty ŭ Biełarusi nie prymajuć 100‑rublovyja kupiury. U čym prablema?

U Biełarusi niekatoryja bankamaty časova pierastali prymać 100‑rublovyja banknoty novaha ŭzoru 2022 hoda. Prablemu zaŭvažyli karystalniki sacsietak, adzin z klijentaŭ Alfa-Banka navat apublikavaŭ fota paviedamleńnia bankamata: «Časova nie prymajucca kupiury naminałam 100 BYN uzoru 2022 hoda», zaŭvažyŭ Telegraf.news.

Skrynšot ź videa

Pa stanie na siońnia ŭ abaračeńni znachodziacca dva ŭzory 100‑rublovych banknot — 2009 hoda (vypuščanyja ŭ 2016 hodzie) i 2022 hoda. Dyzajn u ich padobny, ale novyja banknoty majuć adroźnieńni: adsutničaje podpis staršyni praŭleńnia Nacbanka, a taksama inšyja elemienty abarony ad padrobki. Abodva ŭzory źjaŭlajucca zakonnym srodkam apłaty.

Posmotrieť v Threads

Prablemy z novymi 100‑rublovymi banknotami ŭźnikajuć nie tolki ŭ klijentaŭ Alfa-Banka, ale i ŭ inšych bankach, a taksama pry apłacie ŭ terminałach aŭtazapravačnych stancyj (naprykład, sietki A100) i ŭ terminałach mabilnych apierataraŭ.

U pres-słužbie Alfa-Banka patłumačyli pryčynu: niekatoryja bankamaty zachodniaj vytvorčaści nie padtrymlivajuć novyja banknoty, bo vytvorcy pakinuli Biełaruś i bolš nie absłuhoŭvajuć abstalavańnie. Tamu bankam ciažka nastroić validatary na novy ŭzor.

Usie novyja prystasavańni, adnak, užo prymajuć novyja banknoty, i staryja bankamaty pastupova buduć vyvodzicca z vykarystańnia, ale heta patrabuje času. Takaja prablema raniej uźnikała i ŭ inšych bankach, naprykład, Bielinviestbanku, dzie heta tłumačyli abmiežavanym absłuhoŭvańniem bankamataŭ amierykanskaj kampanii Diebold Nixdorf z funkcyjaj cash-recycling.

Vyrašyć pytańnie ŭ poŭnaj miery va umovach sankcyj Zachadu pakul nie ŭdałosia, tamu banki prosta pastupova zamianiajuć «prablemnyja» aparaty pa miery ich znosu.

Kamientary da artykuła