Paźniak pra Babaryku i Kaleśnikavu: Nijakaja turma nie pierarobić takich

Vieteran biełaruskaha ruchu Zianon Paźniak apublikavaŭ tekst pra pres-kanfierencyju, dadzienuju 14 śniežnia ŭ Kijevie vyzvalenymi napiaredadni čatyrma palitviaźniami: Viktaram Babarykam, Maryjaj Kaleśnikavaj, Uładzimiram Łabkovičam i Alaksandram Fiadutam. Babaryka i Kaleśnikava, jak zaŭsiody, byli vielmi žorstka raskrytykavanyja. 

Zianon Paźniak. Fota: «Naša Niva»

«Na kanfierencyi ŭražanyja ŭkraincy ŭbačyli zblizku abličča ruskamirskich staŭleńnikaŭ (Babaryki, Kaleśnikavaj). Staŭleńniki nie padtrymali Ukrainu, nie asudzili ruskuju ahresiju suprać Ukrainy, nie padtrymali biełaruskich dabraachvotnikaŭ, baraćbu i achviary pałka Kalinoŭskaha. Naadvarot, byŭ vykazany žal z pryčyny achviaraŭ ruskich akupantaŭ u ichnaj ahresiŭnaj vajnie suproć Ukrainy», — kanstatuje Paźniak.

Jon paŭtaraje zvyčajnyja tezisy pra toje, što apazicyja da Łukašenki ŭ 2020 hodzie była stvoranaja Maskvoj z metaj «skarystaŭšy vybary i antyrežymnyja nastroi ŭ narodzie, zamianić Łukašenku na hazpramaŭskuju kreaturu bankira Babaryku i lehitymizavać uładu ŭ Biełarusi dziela nastupnaj anieksii krainy ŭ Rasiju i stvareńnia vyhadnych umovaŭ dla akupacyi Ukrainy».

Paśla, praŭda, heta apazicyja razam ź biełaruskimi patryjotami apynułasia ŭ adnoj turmie. 

«I voś, dziakujučy Amierycy i našym ahulnym biełaruskim namahańniam, ruskamircy na svabodzie. Jany zahavaryli, jak niekali, pakazvajučy svajo palityčnaje ništo. Prapahandysckija burbałki, stvoranyja vakoł hetych zaanhažavanych pustych piersanažaŭ sapraŭdy «nievierajatnyja», — havoryć Paźniak, zhadvajučy i pra «niamiecki śled u hetaj padstupnaj historyi», jaki «prajavicca sam i paźniej».

A dalej pierachodzić da ahulnych vysnoŭ.

«Z vopytu našaj 200‑hadovaj biełaruskaj baraćby vynikaje nastupnaje: maskal i tym bolš tyja, chto pradalisia i słužać maskalu, nie źmianiajucca ni pry jakich abstavinach. Jany zastajucca vorahami nacyi nazaŭsiody, niahledziačy na mahčymaje potym prystasavańnie i źmienu rytoryki. Hetyja, jakija havorać na kanfierencyi, navat rytoryki nie mianiajuć i paŭtarajuć z cyničnaj uchmyłačkaj svaju zavučanuju rasiejskuju słužbu.

Nijakaja turma, nijakija turemnyja ździeki ź biełaruskaha čałavieka, ź jaho movy i hodnaści, nijakija karcery i hłum nie pierarobiać takich, nie pierajnačać śviadomaść, nie viernuć ich da movy, da biełaruščyny, nie vykličuć rachunku nacyjanalnaha sumleńnia, bo jaho ŭ ich nie zachavałasia navat u piacie. 

Ich nie cikaviać achviary i zmahańnie biełaruskich dobraachvotnikaŭ suprać ruskich zachopnikaŭ. Nijaki ruski fašyzm, nijaki rašyzm, nijakaja Buča, nijakaje zabojstva ŭkrainskaha naroda maskoŭskimi ahresarami i zabojcami nie vykličuć u takich ščyraha spačuvańnia, nie pabudziać da pytańniaŭ, nie pieralakajuć i nie sabjuć ich z falšy i demahohii ruskaha tropu. Napieradzie ŭ ich źmiena rytoryki i znoŭ čarhovyja pravalnyja burbałki ŭ ahienturnym teatry. Ale nie ŭdasca», — praročyć Paźniak.

Kamientary da artykuła