Pad Słuckam budujuć sakretny vajskovy zavod — źbirajucca rabić 240 tysiač snaradaŭ štohod dla patreb Rasii

Na sakretny abjekcie pad šyfram «Učastak», jaki budujecca ŭ Słuckim rajonie, źbirajucca naładzić sieryjnuju vytvorčaść bojeprypasaŭ poŭnaha cykła. «Biełpoł» raskazvaje, što pra heta viadoma.

Biełaruskaja madyfikacyja BM-21B «BiełHrad-2». Fota: Wikimedia Commons

Chto za hetym staić

Pavodle źviestak, jakija atrymaŭ «Biełpoł», sakretny abjekt na terytoryi Słuckaha rajona budujuć praź śpiecyjalna stvoranuju jurydyčnuju asobu — ZAT «Zavod korpusnych vyrabaŭ» (ZKV).

Jak stała viadoma z atrymanych dakumientaŭ, zasnavalnikami pradpryjemstva vystupili dva dziaržaŭnyja hihanty: AAT «Vołataŭta» i «Zavod dakładnaj elektramiechaniki».

Choć Alaksandr Łukašenka padpisaŭ sakretnaje rasparadžeńnie №181 ab stvareńni hetaha abjekta ŭ listapadzie 2023 hoda, aktyŭnaja padrychtoŭka, zakupka linij i zamiežnyja kamandziroŭki pačalisia jak minimum za paŭhoda da aficyjnaha zahadu. Administracyja zavoda, kab paźbiehnuć niebiaśpieki, raźmiaściłasia ŭ centry Minska na vulicy Zacharava, 76, a kiravać pracesam byŭ pryznačany Dźmitryj Karatkievič, były namieśnik dyrektara «Vołataŭta». Kaniec budaŭnictva zapłanavany na śniežań 2026 hoda.

Skryn videa: osbbelpol / YuTube

Što viadoma pra miesca budoŭli

Miesca dla budučaha zavoda abrali kala viosak Paŭłaŭka i Šyščycy ŭ Słuckim rajonie. U 1996 hodzie na terytoryi Centra ŭtylizacyi elemientaŭ rakiet, jaki ŭ toj čas tam znachodziŭsia, adbyŭsia pažar, u vyniku jakoha zdetanavała zvyš 1200 umoŭnych vahonaŭ bojeprypasaŭ.

Pavodle danych «Biełpoła», navat praź dziesiacihodździ hetaja ziamla zastajecca niebiaśpiečnaj. Padčas vykarčoŭvańnia pnioŭ i źniaćcia hrunta budaŭniki praciahvajuć znachodzić bojeprypasy, jakija nie razarvalisia, dziasiatkami, što mocna tarmozić pracy. Sapiory Ministerstva abarony pravodziać tolki pavierchnievuju ačystku hleby na hłybiniu da 30 santymietraŭ, u toj čas jak nierazarvanyja snarady znachodziacca značna hłybiej. 

Heta ŭžo pryviało da zasakrečanych incydentaŭ. U pačatku śniežnia pry zahruzcy adchodaŭ bietonu ŭ drabnilnuju mašynu adbyŭsia vybuch bojeprypasu i ŭzharańnie samoj drabnilnaj mašyny, što ledź nie kaštavała žyćciaŭ budaŭnikam.

240 tysiač snaradaŭ štohod dla patreb Rasii

Zhodna z techničnaj dakumientacyjaj, da jakoj atrymali dostup rasśledvalniki, abjekt raźličany na 50 hadoŭ pracy. Jaho asnoŭnaja zadača — načynka snaradaŭ vybuchoŭkaj i ich zborka.

Na pačatkovym etapie zavod pavinien vypuskać 120 tysiač reaktyŭnych snaradaŭ dla sistem «Hrad» (kalibr 122 mm) i 120 tysiač artyleryjskich strełaŭ kalibra 152 mm u hod. Rasśledvalniki źviartajuć uvahu na toje, što adzinym zakazčykam hetaj pradukcyi źjaŭlajecca Rasija.

Skryn videa: osbbelpol / YuTube

Zhodna z atrymanymi dakumientami, rasijskaje akcyjaniernaje tavarystva «Tiechnodinamika» zabiaśpiečvaje abjekt linijaj dla parcyjnaha presavańnia artyleryjskich snaradaŭ i hałaŭnych častak rakiet dla sistem «Hrad».

U svaju čarhu, 20 śniežnia 2023 hoda «Zavod dakładnaj elektramiechaniki» zaklučyŭ damovu z kitajskaj kampanijaj China National Electronics Import & Export Corporation na pastaŭku linii pa snaražeńni hałaŭnoj častki reaktyŭnaha snarada kalibra 122 mm.

Dadatkova da pracesu pryciahnuta kitajskaja kampanija ALIT (Aerospace Long-March International Trade), jakaja adkazvaje za technałahičnaje navučańnie biełaruskaha piersanału.

Pavodle płanaŭ, pieršaje abstalavańnie pavinna być dastaŭlena na abjekt da krasavika 2026 hoda, a biełaruskija inžyniery ŭžo prachodziać navučańnie na anałahičnych vytvorčaściach u Kitai i Rasii.

Chto jašče ŭdzielničaje ŭ prajekcie

Adnak samaj vostraj prablemaj zastajecca adsutnaść ułasnaj chimičnaj syraviny. Krytyčnaja zaležnaść ad impartu vymušaje šukać pastaŭščykoŭ traciłu i hieksahienu ŭ Iranie i Pakistanie. Minsk sprabuje damovicca ab pieradačy technałohij vytvorčaści «poŭnaha cykła», kab stvaryć aŭtanomnuju bazu vybuchovych rečyvaŭ u Biełarusi.

Pierad Ministerstvam pramysłovaści i Dziaržaŭnym vajenna-pramysłovym kamitetam pastaŭlena zadača terminova asvoić technałohii vytvorčaści vybuchoŭki i porachu na terytoryi Biełarusi. Da hetaj pracy pryciahnuty kancerny «Biellesbumpram», «Biełnaftachim» i «Biellehpram». Asablivaja rola advodzicca Aršanskamu ilnokambinatu, jaki pavinien naładzić vytvorčaść celułoznaj syraviny dla dalejšaha vyrabu porachu.

Dla navukovaha supravadžeńnia prajekta pryciahnuty śpiecyjalisty Instytuta chimii novych materyjałaŭ Akademii navuk i Biełaruskaha dziaržaŭnaha technałahičnaha ŭniviersiteta (BDTU).

Niepasredna ŭ BDTU adkryta novaja śpiecyjalnaść — «Chimičnaja technałohija enierhanasyčanych materyjałaŭ i vyrabaŭ». Jana ŭklučaje dva profilnyja napramki: «technałohija porachaŭ, ćviordych rakietnych palivaŭ i vyrabaŭ» i «technałohija vybuchovych rečyvaŭ i vyrabaŭ». U 2025 hodzie adbyŭsia pieršy nabor studentaŭ.

Skryn videa: osbbelpol / YuTube

Pavodle źviestak «Biełpoł», Minski padšypnikavy zavod užo pačaŭ rychtavać karpusy snaradaŭ kalibra 152 mm, Maładziečanski zavod paraškovaj mietałurhii naładžvaje vypusk uzryvalnikaŭ da reaktyŭnych snaradaŭ, a zavody «BMZ», «BiełAZ» i «Lehmaš» zadziejničany ŭ pastaŭkach miechaničnych kamplektujučych.

Rasśledavańnie pakazała, što ŭ prajekt uklučana navat pienitencyjarnaja sistema: u papraŭčych kałonijach arhanizavana vytvorčaść draŭlanych skryń dla transpartavańnia hatovych bojeprypasaŭ.

Kamientary da artykuła